काठमाडौं । तेस्रो त्रैमासमा सानिमा बैंकको नाफामा उल्लेख्य सुधार देखिएको छ । शुक्रबारमा जारी गरिएको तेस्रो त्रैमासको वित्तीय विवरणअनुसार अघिल्लो आर्थिक वर्षको यही समयको तुलनामा नाफामा उल्लेख्य सुधार देखिएको हो ।
यस अवधिमा बैंकले २ अर्ब ३५ करोड रुपैयाँ खुद नाफा आर्जन गरेको छ, जुन अघिल्लो आर्थिक वर्षको सोही अवधिको १ अर्ब ६५ करोड रुपैयाँको तुलनामा ४२.२३ प्रतिशतले बढी हो ।
बैंकको खुद ब्याज आम्दानी पनि उल्लेख्यरूपमा बढेको छ। अघिल्लो वर्षको ४ अर्ब २८ करोड रुपैयाँबाट बढेर यस वर्ष ५ अर्ब १६ करोड रुपैयाँ पुगेको छ। त्यस्तै, सञ्चालन आम्दानी छ अर्ब चार करोडबाट उक्लिँदै सात अर्ब २७ करोड रुपैयाँ पुगेको छ भने सञ्चालन नाफा २ अर्ब २५ करोडबाट वृद्धि भएर तीन अर्ब ३२ करोड रुपैयाँ पुगेको छ ।
तेस्रो त्रैमाससम्म बैंकको वितरणयोग्य मुनाफा २ अर्ब १४ करोड रुपैयाँ रहेको छ। वितरणयोग्य प्रति सेयर आम्दानी १८.५७ रुपैयाँ कायम भएको छ। यस अवधिमा प्रति सेयर आम्दानी २२ रुपैयाँ ९२ पैसा रहेको छ भने प्रति सेयर नेटवर्थ १७९.५५ रुपैयाँ पुगेको छ।
योसँगै सानिमा तेस्रो त्रैमासको वित्तीय विवरण बुझाउने पहिलो वाणिज्य बैंक बनेको छ ।
