काठमाण्डौं । इजरायल र लेबनानबीच झन्डै एक महिना लामो युद्धपछि १० दिनको युद्धविराम भएको छ । योसँगै नागरिकहरूले केही शान्तिको महसुस गरेका छन् ।
लामो समयदेखि विस्थापित भएका हजारौँ मानिसहरू आफ्नो घर फर्किन थालेका छन् भने सडकहरूमा उत्साह देखिएको छ । दक्षिणी लेबनानमा इजरायलले एक महिनाभन्दा बढी समयसम्म गरेको आक्रमणका कारण विस्थापित भएका नागरिकहरू सामूहिक रूपमा फर्किरहेका छन् ।
कतिपय मानिसले सडकमा नाचगान गर्दै युद्ध विरामको स्वागत गरेका छन् । अमेरिकी पहलमा भएको यो सम्झौता प्रारम्भिक रूपमा १० दिनका लागि लागू गरिएको हो, जसलाई आवश्यक परे थप विस्तार गर्न सकिने भनिएको छ ।
इजरायली प्रधानमन्त्री बेन्जामिन नेतान्याहुले युद्ध विरामलाई ऐतिहासिक शान्तिको अवसर भएको जनाएका छन् । लेबनानका राष्ट्रपति जोसेफ खलील औनले पनि यसलाई सकारात्मक भएको प्रतिक्रिया दिएका छन् । हिजबुल्लाहले युद्धविराम मान्ने सङ्केत गरे पनि लेबनानको सबै ठाउँमा आक्रमण पूर्ण रूपमा रोकिनुपर्ने सर्त अघि सारेको छ ।
साथै, इजरायली सेना दक्षिणी लेबनानबाट पूर्ण रूपमा फिर्ता हुनुपर्ने माग पनि गरेको छ । इजरायलले भने दक्षिणी लेबनानमा १० किलोमिटर क्षेत्रलाई सुरक्षा क्षेत्रका रूपमा कायम राख्ने जनाएको छ, यसले भविष्यमा फेरि तनाव बढ्न सक्ने सङ्केत कायमै छ ।
विश्लेषकहरूका अनुसार यो युद्धविराम कमजोर र अस्थायी हुन सक्ने अनुमान छ । मध्यपूर्वमा दीर्घकालीन शान्तिका लागि इरान, अमेरिका र अन्य क्षेत्रीय शक्तिबीचको समस्या समाधान हुनुपर्ने विश्लेषकहरूको भनाइ छ ।

काठमाण्डौं । अमेरिका र इरानबिच असफल बनेको पहिलो चरणको वार्तापछि फेरि संवाद सुरू हुन सक्ने संकेत देखिएको छ ।
पाकिस्तानका सेना प्रमुख असीम मुनीर नेतृत्वको उच्चस्तरीय प्रतिनिधिमण्डल इरानको राजधानी तेहरान पुगेका छन् । टोलीमा पाकिस्तानका गृहमन्त्री मोहसिन नक्वी पनि सहभागी छन् ।
इरान सरकारको आधिकारिक स्रोतले यो भ्रमणका तस्बिर सार्वजनिक गरेको छ । यो भ्रमणलाई अमेरिका–इरानबिच पुनः वार्ता गराउने प्रयासका रूपमा हेरिएको छ ।
यसअघि वार्ता निष्कर्षविहीन बनेपछि अहिले दुवै देशबीच पाकिस्तानी मध्यस्थतामार्फत सन्देश आदान–प्रदान भइरहेको इरानको भनाइ छ । अमेरिकी राष्ट्रपति डोनाल्ड ट्रम्पले पनि हालैको अन्तर्वार्तामा इरानसँग फेरि वार्ता हुन सक्ने जनाएका थिए ।
उनले युद्ध अन्त्य नजिक पुगेको दाबी गरे पनि आवश्यक परे थप कारबाही हुन सक्ने संकेत पनि दिएका छन् । तर हर्मुज जलमार्गमा जहाज आवतजावतको विषय अझै अन्योलपूर्ण छ ।
पाकिस्तानको सक्रिय कूटनीतिक पहलकाबीच अमेरिका–इरान सम्बन्ध पुनः संवादतर्फ उन्मुख हुने संकेत देखिए पनि क्षेत्रीय तनाव भने अझै कायमै रहेको अन्तर्राष्ट्रिय सञ्चारमाध्यमहरूले जनाएका छन् । दुई देशबीचको दुई हप्ते युद्ध विरामको समय आउँदो हप्ता सकिँदैछ ।