काठमाण्डौं । अमेरिकी राष्ट्रपति डोनाल्ड ट्रम्पका दक्षिण तथा मध्य एसियाका विशेष दूत सर्जियो गोर ३ दिने नेपाल भ्रमणका लागि बिहीबार साँझ काठमाण्डौं आइपुगेका छन् ।
उनी ६ सदस्यीय प्रतिनिधिमण्डलको नेतृत्व गर्दै नेपाल वायुसेवा निगमको जहाजमार्फत काठमाण्डौं आएका हुन् ।
विशेष दूत गोरको सुरक्षा अवस्था र भ्रमणको पूर्वतयारी बुझ्न अमेरिकी संघीय अनुसन्धान ब्युरो (एसबीआई) का दक्षिण एसिया प्रमुख सुहेल दाउद उनीभन्दा अगावै काठमाण्डौं पुगेका थिए ।
राष्ट्रपति ट्रम्पका अत्यन्त विश्वासपात्र मानिने गोर हाल भारतका लागि अमेरिकी राजदूत समेत हुन् ।
नयाँ सरकार गठन भएयता नेपाल आउने उनी अहिलेसम्मकै उच्च तहका अमेरिकी कूटनीतिज्ञ हुन् ।
गोरले शुक्रबार र शनिबार परराष्ट्रमन्त्री शिशिर खनाल र अर्थमन्त्री डा. स्वर्णिम वाग्लेसँग द्विपक्षीय भेटवार्ता गर्ने कार्यक्रम छ । भेटमा वैदेशिक लगानी भित्र्याउन आवश्यक कानुनी सुधार र आर्थिक सहयोगका विषयमा छलफल हुने जनाईएको छ ।
विशेष दूत गोरले प्रधानमन्त्री बालेन्द्र शाह ‘बालेन’ सँग शिष्टाचार भेटका लागि समय मागेका छन् । प्रधानमन्त्री शाहले विदेशी राजदूत वा तल्लो तहका अधिकारीहरूलाई भेट्न अस्वीकार गर्दै आएका कारण भेटको टुङ्गो लागेको छैन । यसअघि आएका सहायक विदेशमन्त्री एस पावल कपुरसँग पनि प्रधानमन्त्रीले भेट गरेका थिएनन् ।
गोरले नेपाली सेनाका प्रधानसेनापति अशोकराज सिग्देलसँग पनि भेट्ने तालिका रहेको छ । राजनीतिक भेटघाटबाहेक उनले सगरमाथा क्षेत्रको भ्रमण गर्ने समेत योजना छ ।
नेपाल आउनुअघि गोरले बङ्गलादेश, भुटान, श्रीलङ्का र काजकिस्तानको भ्रमण गरिसकेका छन् । ती देशहरूमा उनले राष्ट्र प्रमुखहरूसँग उच्चस्तरीय भेटवार्ता गरेका थिए ।
गोर ३ दिने भ्रमण सकेर शनिबार वासिङ्टन फर्किने कार्यक्रम छ ।
