काठमाण्डौं । आगामी फागुन २१ गते हुने प्रतिनिधिसभा निर्वाचनलाई स्वच्छ, निष्पक्ष र विश्वसनीय बनाउन निर्वाचन आयोगले आचारसंहिता उल्लङ्घन नियन्त्रणमा कडाइ गरेको छ।
आचारसंहिताको पूर्ण पालना गराउन आयोगले राजनीतिक दल, उम्मेदवार, संस्था तथा सरोकारवाला सबै पक्षलाई निरन्तर ध्यानाकर्षण गराउँदै आएको जनाएको छ ।
केन्द्रीय आचारसंहिता अनुगमन समितिमा प्राप्त उजुरी र जानकारीका आधारमा हालसम्म २१ वटा स्पष्टीकरण सोधिएको र ३०२ हानिकारक सूचना कानुनी कारबाहीका लागि सम्बन्धित निकायमा पठाइएको आयोगले जनाएको छ ।
राजनीतिक दल, उम्मेदवार र संस्थासहित २१ जनासँग स्पष्टीकरण सोधिएकोमा तीमध्ये पाँच वटा स्पष्टीकरणको मात्र जवाफ प्राप्त भएको छ भने बाँकी स्पष्टीकरणका लागि ताकेता भइरहेको छ । समयमै जवाफ नआएमा कानुनबमोजिम थप कारबाही प्रक्रिया अघि बढाइने आयोगको भनाइ छ।
आयोगका अनुसार आचारसंहिताको उल्लङ्घन हुने गरी मिथ्या, भ्रमपूर्ण तथा घृणास्पद अभिव्यक्ति दिने व्यक्ति तथा समूहको निगरानीलाई पनि आयोगले तीव्र बनाएको छ। गैरकानुनी गतिविधिमा संलग्न व्यक्ति वा संस्थालाई नियामक निकायसँगको सहकार्यमा कानुनी दायरामा ल्याउन पहल भइरहेको आयोगले जनाएको छ ।
आयोगमा स्थापना गरिएको निर्वाचन सूचना सम्प्रेषण तथा समन्वय केन्द्रअन्तर्गतको सूचना सदाचार प्रवद्र्धन इकाई पूर्ण रूपमा क्रियाशील रहेको छ ।
उक्त इकाईले हालसम्म पहिचान गरेका कूल ३०२ वटा हानिकारक सूचनालाई निर्वाचन आचारसंहिता, २०८२, विद्युतीय (इलेक्ट्रोनिक) कारोबार ऐन, २०६३ तथा प्रेस काउन्सिल ऐन, २०४८ बमोजिम कारबाहीका लागि सम्बन्धित निकायमा पठाइएको आयोगका प्रवक्ता नारायणप्रसाद भट्टराईले जानकारी दिए ।
आयोगले सबै राजनीतिक दल, उम्मेदवार, सञ्चारमाध्यम र आम नागरिकलाई निर्वाचन आचारसंहिता पूर्ण रूपमा पालना गरी लोकतान्त्रिक अभ्यासलाई सफल बनाउन सहयोग गर्न आग्रह गरेको छ।

मलंगवा । नेपाली कांग्रेसका सभापति गगन थापा सर्लाहीको पाँचदिने दौडाहापछि काठमाडौं फर्किएका छन् । आफ्नो निर्वाचन क्षेत्र सर्लाही–४ मा रहँदै उनले नेता, कार्यकर्ता र स्थानीय मतदातासँग प्रत्यक्ष संवाद र भेटघाट गरेका थिए ।
१२ माघमा सर्लाही पुगेका सभापति थापा घरदैलो कार्यक्रम, छलफल र अन्तरक्रियामा सक्रिय रहे । यस क्रममा पार्टी संगठन सुदृढीकरणसँगै स्थानीय जनताका समस्या, गुनासा र अपेक्षालाई नजिकबाट बुझ्न आफू केन्द्रित रहेको उनले जनाएका छन् ।
सर्लाही आगमनका बेला पार्टीका नेता तथा कार्यकर्ताले उनलाई भव्य स्वागत गरेका थिए । भावी प्रधानमन्त्रीका रूपमा समेत चर्चामा रहेका थापाले सर्लाही–४ को विकास र समृद्धिका लागि आफ्नो भूमिका प्रभावकारी हुने प्रतिबद्धता जनाए ।
सर्लाही छोड्नुअघि सञ्चारकर्मीसँग बोल्दै सभापति थापाले भने, ‘यहाँ आइपुग्दा द्विविधा थियो, तर फर्किँदा भरोसा बोकेर जाँदैछु । जनताको माया र विश्वासले थप जिम्मेवारीको अनुभूति गराएको छ ।’
उनले सर्लाहीमा तटबन्ध निर्माण, उखु किसानको बाँकी भुक्तानी, कृषिजन्य उत्पादनको बजारीकरण, शिक्षा, स्वास्थ्य र कृषि क्षेत्र प्रमुख चुनौतीका रूपमा रहेको जनाए । उनका अनुसार कृषिसम्बन्धी टोली फर्किसकेको छ भने सिँचाइसम्बन्धी टोली जिल्लामै रहेर अध्ययन गरिरहेको छ । सूचना प्रविधिसम्बन्धी टोली पनि छिट्टै सर्लाही पुगेर समस्याको अध्ययन गर्ने उनले जानकारी दिए ।
सभापति थापा जनकपुर विमानस्थल हुँदै काठमाडौं फर्किएका हुन् । काठमाडौं प्रस्थानअघि उनले जनकपुरस्थित नेपाली कांग्रेसको प्रदेश कार्यालयमा पार्टी नेता तथा कार्यकर्तासँग भेटघाट गरे ।

काठमाण्डौं । राष्ट्रिय स्वतन्त्र पार्टीका वरिष्ठ नेता बालेन शाहले शहीदहरूको बलिदानलाई बेवास्ता गर्ने छुट कसैलाई नभएको जनाएका छन् ।
शहीद दिवसको अवसरमा सामाजिक सञ्जालमार्फत शुभकामना दिदै शाहले राणा शासनको अन्त्यको माग गर्दै सङ्घर्ष गर्ने गङ्गालाल श्रेष्ठ, दशरथ चन्द , धर्मभक्त माथेमा र शुक्रराज शास्त्रीको तत्कालीन राज्यले क्रूरतापूर्वक हत्या गरेको ८५ वर्ष भएको स्मरण गरे ।
‘त्यसको दश वर्षपछि राणा शासनको अन्त्य भयो तर राज्य जनताको बन्न सकेन । यसपछि पनि नेपाली जनताले निरन्तर सङ्घर्ष गरिरहनु पर्‍यो । ८५ वर्षमा पटक–पटक व्यवस्था फेरियो, सत्ताको चरित्र फेरिएन’, उनले सन्देशमा भनेका छन् ।
‘८५ वर्ष पहिलेजस्तै, यसपालि पनि भदौको जेनजी आन्दोलनमा सुशासन र भ्रष्टाचार अन्त्यको माग राखेर शान्तिपूर्ण आन्दोलनमा उत्रिएका युवा र विद्यार्थीले आफ्नो अमूल्य जीवन बलिदान दिनुपर्‍यो । अहिले हामी ती शहीदका सपना पुरा गर्ने बाटोमा अघि बढिरहेका छौँ । लामो सयमसम्म जरा गाडेको भ्रष्टाचारको अन्त्य गरी सुशासन कायम गर्दै नेपाललाई आर्थिक रूपमा उन्नत मुलुक बनाउनुपर्ने दायित्व हाम्रो काँधमा छ । राज्यका निकायहरूमा भएको चरम दलीयकरणको अन्त्य गर्दै राज्यलाई जवाफदेही र पारदर्शी बनाउनुपर्ने दायित्व हामीसँग छ । अब समय आएको छ–शहीदका रगतलाई सम्मान गर्दै वहाँहरूको सपना पुरा गर्ने । सुशासनयुक्त, भ्रष्टाचारमुक्त देश बनाउने’,शाहले उल्लेख गरेका छन् ।
फेरी कसैले शहीद बन्नु नपरोस् भन्दै शाहले सम्पूर्ण शहीदहरू प्रति भावपूर्ण श्रद्धाञ्जली पनि अर्पण गरेका छन् ।

काठमाडौं । नेकपा (एमाले) का अध्यक्ष केपी शर्मा ओलीले अमर सहिदहरूको बलिदानको मूल्यलाई आफूले कहिल्यै नबिर्सने र राष्ट्रिय स्वाधीनता तथा लोकतन्त्रको रक्षाका लागि सधैं प्रतिबद्ध रहेको जनाएका छन् ।
सहिद दिवसको अवसरमा सामाजिक सञ्जालमा लेख्दै अध्यक्ष ओलीले आज माघ १६ गते मनाइँदै आएको सहिद दिवस केवल क्यालेन्डरको एउटा मिति मात्र नभई नेपाली जनताले प्राप्त गरेको स्वतन्त्रता र लोकतान्त्रिक अधिकारको इतिहाससँग गहिरो रूपमा जोडिएको दिन भएको उल्लेख गरेका छन् ।
आजको अवस्थाबाट हेर्दा यो दिन केवल क्यालेन्डरको एउटा मितिजस्तो लाग्नसक्ने भए पनि विगतमा फर्केर हेर्दा अहिले उपभोग गरिरहेको स्वतन्त्रता ठूलो संघर्ष र बलिदानबाट प्राप्त भएको स्पष्ट हुने अध्यक्ष ओलीले जनाए ।
वि.सं. १९९७ सालमा प्रजातन्त्रको पक्षमा आवाज उठाउने शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठलाई निरङ्कुश राणा शासनले मृत्युदण्ड दिएको स्मरण गर्दै अध्यक्ष ओलीले त्यही बलिदानबाट लोकतान्त्रिक आन्दोलनको बीऊ रोपिएको जनाए । निरङ्कुश र जहानियाँ शासनको अन्त्य गर्दै आजका लोकतान्त्रिक अधिकार स्थापित गर्न कम्युनिष्ट र कांग्रेसको संयुक्त आन्दोलनले महत्वपूर्ण भूमिका खेलेको ओलीले स्मरण गरे ।
‘निरङ्कुश र जहानियाँ शासनको ठाउँमा आजको लोकतान्त्रिक अधिकार स्थापित गर्ने आन्दोलनको बीऊ त्यसरी रोपिएको थियो । कम्युनिस्ट र कांग्रेसको संयुक्त आन्दोलनको उपज हो आज समाजले पाएको लोकतान्त्रिक अधिकार ।’ अध्यक्ष ओलीले फेसबुकमा लेखेका छन्, ‘यस ऐतिहासिक विरासतलाई स्मरण गर्दै अमर शहीदहरू दशरथ चन्द, शुक्रराज शास्त्री, धर्मभक्त माथेमा र गंगालाल श्रेष्ठलाई हार्दिक श्रद्धाञ्जली अर्पण गर्दछु । अमर सहिदहरूका बलिदानको मूल्यलाई हामी कहिल्यै भुल्ने छैनौँ, हाम्रो राष्ट्रिय स्वाधीनता र लोकतन्त्रको रक्षा गर्ने छौँ ।’

काठमाडौं । नेकपा एमालेका अध्यक्ष केपी शर्मा ओलीले देशका विरुद्ध हुने कुनै पनि समर्पण अस्विकार्य हुने जनाएका छन् ।
आगामी निर्वाचनमा घोषणा पत्र तयारीका लागि पार्टी केन्द्रीय कार्यालय च्यासलमा विज्ञहरुसँग सुझाव लिने क्रममा अध्यक्ष ओलीले सो कुरा जनाएका हुन् । उनले राष्ट्रियता,सार्वभौमिकता, राष्ट्रिय सुरक्षा र स्वाभिमानको रक्षा समपर्णबाट हुन नसक्ने भन्दै त्यसको प्रतिरोध, प्रतिवाद र प्रतिरक्षा हुने जनाए ।
अध्यक्ष ओलीले सरकारले हालसम्म पनि निर्वाचनको वातावरण बनाउन नसकेको उल्लेख गरे । ‘पार्टीले हाल राज्यले गरेका गतिविधि नजिकबाट नियाली रहेको छ ’ अध्यक्ष ओलीलाई उधृत गर्दै प्रचार तथा प्रकाशन संयोजक मीनबहादुर शाहीले जारी गरेको विज्ञप्तीमा भनिएको छ ‘सरकारले आजका दिनसम्म पनि निर्वाचन निष्पक्ष,स्वतन्त्र र धाँधली रहित ढंगले गर्ने वातावरण बनाउन सकेको छैन । ’
अध्यक्ष ओलीले २०७२ को भूकम्पपछि एमालेले पुननिर्माणको नेतृत्व गरेको स्मरण गराउँदै सुदृढ र तल्लो निकायसम्म संगठन भएकोले भदौको विध्वंसपछिको निर्माण पनि एमालेले गर्ने जनाए ।
‘नेकपा एमाले सुदृढ संगठन,व्यापक जनमत र सर्वाधिक लोकप्रिय पार्टीका रुपमा स्थापित रहेको छ । भूकम्पले पुर्याएको क्षतिको पुननिर्माण उदाहरणीय रुपमा सफल पारेको एमालले’ शाहीले जारी गरेको विज्ञप्तीमा भनिएको छ ‘गत भदौको विध्वसंले राष्ट्रियता,लोकतन्त्र र संविधानमा पुर्याएको क्षतिको पुननिर्माण ’क्षतिको पुननिर्माण,राष्ट्रिय सुरक्षा र सुदृढ राष्ट्रिय एकता कायम गर्न उच्च मनोबलका साथ प्रदान गर्नेछ । ’

रूपन्देही । रुपन्देही जिल्ला अदालतले राष्ट्रिय स्वतन्त्र पार्टीका सभापति रवि लामिछानेसहित जोडिएको संगठित अपराध र सम्पत्ति शुद्धीकरण सम्बन्धी मुद्दा तत्काल फिर्ता लिन इन्कार गरेको छ ।
महान्यायाधिवक्ता कार्यालयको निर्णय कार्यान्वयनका लागि जिल्ला सरकारी वकिल कार्यालयमार्फत पेश गरिएको निवेदन अदालतले रोकिदिएको हो।
अदालतले यस विषयमा सर्वोच्च अदालतमा दायर रिट विचाराधीन रहेकाले अन्तिम टुंगो नलागेसम्म निर्णय कार्यान्वयन नगर्न आदेश दिएको जनाएको छ।
इजलासले सर्वोच्च अदालतबाट स्पष्ट आदेश आएपछि मात्र अगाडि बढ्ने संकेत गरेको छ। यसअघि सहकारी ठगी मुद्दा यथावत् राख्दै अन्य दुई अभियोग फिर्ता लिने तयारी गरिएको थियो।