काठमाडौं । अमेरिकी राष्ट्रपति डोनाल्ड ट्रम्पले इरानका सर्वोच्च नेता मोजतबा खामेनीसँग भेट्ने इच्छा व्यक्त गरेका छन् । मोजतबा युद्ध अन्त्यका लागि जारी कूटनीतिक प्रयासमा पूर्ण रूपमा संलग्न रहेको ट्रम्पको दाबी छ ।
‘न्युयोर्क पोस्ट’लाई दिएको अन्तर्वार्तामा ट्रम्पले भने, “उहाँ यस प्रक्रियाको हिस्सा हुनुहुन्छ । निश्चित रूपमा, मेरो विचारमा इरानका जनता उहाँको निकै सम्मान गर्छन् ।”
यद्यपि, इरानमा युद्ध सुरु भएयता मोजतबा खामेनी सार्वजनिक रूपमा देखिएका छैनन् । उनी टेलिभिजन प्रस्तोताहरूले पढेर सुनाउने लिखित सन्देशमार्फत मात्र देशलाई सम्बोधन गर्दै आएका छन् ।
अमेरिकी अधिकारीहरूले लामो समयदेखि युद्धको पहिलो दिन भएको भीषण बमबारीमा उनका पिता आयातुल्लाह अली खामेनीको मृत्यु भएपछि मोजतबा खामेनी पनि गम्भीर रूपमा घाइते भएको र हाल उपचाररत रहेको दाबी गर्दै आएका छन् ।
“मलाई ठ्याक्कै थाहा छैन, किनकि मैले अहिलेसम्म उहाँलाई भेट्ने अवसर पाएको छैन,” मोजतबा खामेनीको स्वास्थ्य अवस्थाबारे सोधिएको प्रश्नमा ट्रम्पले भने, “तर, यदि सञ्चारमाध्यमहरूमा आएका समाचारहरूलाई विश्वास गर्ने हो भने उहाँको शरीरका धेरै अंगहरू गम्भीर रूपमा क्षतिग्रस्त भएका छन् ।”
भविष्यमा खामेनीसँग भेटवार्ता हुन सक्ने सम्भावनाबारे ट्रम्पले भने, “हो, म उहाँलाई भेट्न चाहन्छु । परिस्थिति कस्तो रहन्छ भन्नेमा निर्भर गर्छ । तर, कुनै न कुनै समयमा हामी अवश्य भेट्न सक्छौँ ।”

काठमाण्डौं । पूर्वप्रधानमन्त्री डा. बाबुराम भट्टराईले यतिवेला काठमाण्डौं र दिल्ली दुवैतिर सुनिएका गड्याङगुडुङका आवाज त्यति प्रिय नरहेको टिप्पणी गरेका छन् ।
सामाजिक सञ्जाल फेसबुकमा टिप्पणी गर्दै भट्टराईले लेखेका छन्, ‘रास्वपा सभापति रवि लामिछानेको हिन्दुस्तान टाइम्समा प्रकाशित लेखले नेपाल र भारतमा राम्रै तरङ्ग ल्याएको छ। त्यसमा हाम्रो पनि सहमति नै छ। खासगरी नेपाल–भारत सम्बन्धको मामिलामा विकास साझेदारी र सभ्यता–संस्कृति (रोटी–बेटी) का कुरा गरून्जेल दुबैतिर बाइबाई नै हुन्छ। मेरो पालामा आफ्नै तत्कालीन पार्टीभित्रका एकथरीको विरोधका बाबजुद मैले बिप्पा सम्झौता गर्दा अब विकासको ओइरो लाग्ने भो भनेर दुवैतर्फ खुसी छाएकै हो।तर कथाको त्यो बाहिर देखिने पाटो मात्रै हो।’
‘अर्को खुला नदेखिने तर भित्रभित्रै पुतपुताइरहने, दुबै पक्षले मनमनै गुनगुनाइरहने र सधैँ दुःख दिइरहने गम्भीर पाटो पनि छ। त्यसबारे हामी दुवैतर्फका जिम्मेवार मान्छेहरू खुला रूपमा बौल्दैनौँ तर खाष्टोमुनि मुड्की बजारीरहन्छौ, त्यो हो सामरिक सुरक्षा र राष्ट्रिय सार्वभौमसत्ताको कुरो, त्यसको पनि गाँठी कुरा हो–भारतीयहरूको दिलदिमागमा अङ्ग्रेजको पालादेखि जमेर बसेको सुरक्षाको मामिलामा हिमालको सेरोफेरो सबै मेरोु भन्ने सोच सीमा विवाद त्यसैको अभिव्यक्ति हो। अनि अर्कोतिर हामी नेपालीहरूमा गहिरोसँग गढेर बसेको राष्ट्रिय सार्वभौमसत्ताको विषयमा सधैँ झस्काइरहने ‘सिक्किमीकरणुको खतराको त्रास, यही जरो कारणले नेपाल भारत सम्बन्ध लामो समयदेखि ग्रिस मिथकको सिसिफसको कथा दोहोर्‍याउन अभिशप्त भइरहेछ ’, उनले लेखेका छन् ।
यही गाँठो फुकाउन आफूले नजिकबाट भारत र नेपालका जिम्मेवार मानिसहरू र आम जनसमुदाय समेतको मनोविज्ञान बुझेको आधारमा प्रबुद्ध व्यक्तिहरूको समूह ९इपीजी०को अवधारणा अघि सारेको उनले जनाएका छन् ।
इपीजीको प्रतिवेदन अहिलेसम्म मृत्युशैय्यामा छट्पटाइरहेको पनि उनको टिप्पणी छ । रवि लामिछानेको वर्तमान दिल्ली भ्रमण यो दुष्चक्र तोड्न सफल रहोस् भन्ने कामना पनि उनले गरेका छन् ।