Tuesday, October 21, 2025

तोसिमाको आक्रोश, कसले भन्यो गेट आउट?

राष्ट्रिय स्वतन्त्र पार्टी (रास्वपा) की नेता एवं पूूर्वसांसद तोसिमा कार्कीले पार्टी संस्थापनविरुद्ध आक्रोश पोखेकी छिन्। फेसबुकमा पोस्ट राख्दै उनले रुपान्तरण गरौँ भन्दा गेटआउट (पार्टीबाट निस्किहाल) भनेर प्रहार गरिएको भन्दै भण्डाफोर गर्ने चेतनावी दिएकी छिन्। ‘पार्टीलाई थप सुदृढ बनाऔँ, सफल बनाऔँ र समय सापेक्षिक रुपान्तरण गरौँ भनी जिम्मेवारपूर्ण तरिकाले राजनीतिक विषय उठान गर्दा गेटआउट भनेर बुल्ली गर्ने र गर्न लाउने अनि त्यो सब टुलुटुलु हेरेर बस्ने महाशयहरूको सार्वजनिक भण्डाफोर गर्नु नपरोस्,’ उनले लेखेकी छन्। आफूले पार्टी बनाउने उद्देश्यका साथ ४ बुँदे पत्र बुझाएको भए पनि राजीनामा दिन लागेको भनेर प्रचार गरिएको कार्कीको भनाइ छ। उनको प्रश्न छ, ‘कहिले राजीनामा दिन लाग्यो भनेर अफवाह फैलाउने, कहिले पार्टी बनाउने उद्देश्यका साथ पेस गरिएको पत्रको ४ बुँदा राम्रोसँग अध्ययनसमेत नगरी पार्टी सभापतिको विकल्प खोज्यो भनेर विषय अतिरन्जित गर्ने, विकल्प खोज्नेलाई छाड्नहुन्न, पार्टीबाट निकाल्नुपर्छ आदि भनेर मिडिया ट्रायल गरेर पार्टी पंक्तिमा भ्रम छर्न खोज्ने?’उनले हिम्मत भए पार्टी संस्थापनले विशेष अधिवेशन गर्नुपर्ने समेत चुनौती दिएकी छिन्। ‘हिम्मत भए संस्थापनले खुल्ला विशेष अधिवेशन गरोस्, पार्टी सभापतिको आशिर्वाद लिएर लाखौं कार्यकर्ता तथा शुभेच्छुकको मत लिएर दिईएको जिम्मेवारी सम्हाल्ने आँट छ तोसिमा सँग,’ कार्कीले लेखेकी छिन्।

कसले गेटआउट भनेको हो र कसले बुल्ली गरेको हो भनेर उनले नामचाहिँ खुलाएकी छैनन्। 

जंगी अड्डाको निष्कर्षः अवस्था सामान्य, चुनौती अझै उच्च

नेपाली सेनाको वार्षिक कार्यतालिकाअनुसार हुने पृतनापति समन्वयात्मक बैठक यो वर्ष असोज १० र ११ गते सैनिक मुख्यालय जंगी अड्डा, भद्रकालीमा सम्पन्न भएकाे छ । बैठकमा विभिन्न विभाग, महानिर्देशनालय तथा निर्देशनालयका प्रमुखहरूको भौतिक उपस्थिति र पृतनापतिहरूको भर्चुअल सहभागिता थियो ।

बैठकमा २३ र २४ भदौमा देशभर भएको जेनजी प्रदर्शनपछि नेपालको सुरक्षा चुनौती बारे छलफल भएकाे छ । प्रदर्शनमा पहिलाे दिन सुरक्षाकर्मीको गोली लागेर काठमाडौं र सुनसरीमा २१ जनाको मृत्यु भएको थियो । सोही दिन तत्कालीन गृहमन्त्री रमेश लेखकले राजीनामा दिएका थिए । त्यसबेला महत्त्वपूर्ण संरचनाहरूको सुरक्षामा कमजोरी देखिएको भन्दै आलोचना भएको थियो ।

पृतनापति बैठकमा यिनै घटनाक्रमका बारेमा गम्भीर छलफल भएको उच्च सैनिक स्रोतले जनाएको छ । स्रोतका अनुसार सेनाले सुझबुझपूर्ण ढंगले स्थिति नियन्त्रणमा लिन सफल भए पनि मानवीय क्षतिबाट मात्र भौतिक संरचना जोगाउनुपर्ने चुनौतीबारे गहिरो समीक्षा गरिएको थियो ।

सैनिक प्रवक्ता सहायक रथी राजाराम बस्नेतका अनुसार बैठकमा समसामयिक सुरक्षा अवस्था, क्षेत्रगत ब्रीफिङ, आगामी योजना र सुझावहरू प्रस्तुत गरिएकाे छ ।

पृतनापति बैठकअघि सैनिक मुख्यालयले जीवित पूर्वप्रधानसेनापतिहरूसँग पनि परामर्श भएकाे छ । उपस्थित पूर्वप्रधानसेनापतिहरू प्रज्वलशमशेर राणा, प्यारजङ्ग थापा, गौरवशमशेर राणा, पूर्णचन्द्र थापा र प्रभूराम शर्माले बदलिँदो राजनीतिक अवस्थाबारे आफ्नो धारणा राखेका थिए ।

बैठकमा २४ भदौको राति सेनाले सम्पूर्ण सुरक्षा कमाण्ड हातमा लिएर परिस्थिति सामान्य पार्न खेलेको भूमिकाको समीक्षा गरिएको थियो । पूर्वप्रधानसेनापतिहरूले पनि सेनाको भूमिकाको प्रशंसा गरेका थिए ।

बैठकमा आउँदो २१ फागुनमा प्रस्तावित प्रतिनिधि सभा निर्वाचनबारे पनि छलफल भएकाे बताइएकाे छ । निर्वाचन समयमै हुने–नहुने, दलहरूको धारणा, र चुनाव नहुँदा उत्पन्न हुन सक्ने सम्भावित सुरक्षा चुनौतीबारे विस्तृत विचार–विमर्श भएको सैनिक स्रोतले बताएकाे छ ।

हाल माओवादी केन्द्र र नेपाली कांग्रेसका केही युवा नेताहरू चुनावको पक्षमा देखिए पनि अन्य दलहरूले आधिकारिक धारणा सार्वजनिक गरेका छैनन् । यही कारण चाडपर्वपछि सुरक्षा जोखिम अझ बढ्न सक्ने निष्कर्ष बैठकले निकालेको छ ।

पृतनापति समन्वयात्मक बैठकले देशको अवस्था विस्तारै सामान्य बन्दै गइरहेको स्वीकार गरे पनि सुरक्षा चुनौती अझै उच्च रहेको ठहर गरेको छ । सैनिक मुख्यालयले जेनजी घटनाबारे आधिकारिक विवरण केही समयपछि सार्वजनिक गर्ने तयारी गरेको जनाएको छ ।

मधेश सरकारबाट कांग्रेसको समर्थन फिर्ता

काठमाडौं । नेपाली कांग्रेसले मधेश प्रदेश सरकारलाई दिएको समर्थन फिर्ता लिएको छ । आज जनकपुरमा बसेको कांग्रेस संसदीय दलको बैठकले यस्तो निर्णय गरेको संसदीय दलका नेता कृष्णप्रसाद यादवले जानकारी दिए।
कांग्रेस प्रदेश सांसद अन्जना पण्डितले कांग्रेस संसदीय दलको बैठकले समर्थन फिर्ता लिने र नयाँ सरकार गठनको प्रयास थाल्ने निर्णय समेत गरेको जानकारी दिइन् ।
गत भदौ २४ गते जीनजी आन्दोलनको क्रममा मधेसका मुख्यमन्त्री सतिशकुमार सिंहले राजीनामा घोषणा गरेका थिए। तर फेरि कुरा फेरेपछि जनमतले सरकारमा रहेका आफ्ना मुख्यमन्त्री सहित दुई मन्त्रीलाई फिर्ता र समर्थन फिर्ता लिएको पत्र मधेश प्रदेश सभामा भदौ ३१ गते बुझाइसकेको छ ।
तर मुख्यमन्त्री सिंह पछि कुरा फेरेर सदन फेस गर्ने अडानमा छन् । कांग्रेसले अहिलेसम्म समर्थन कायमै राखेको थियो भने एमालेले उनलाई विश्वासको मतसम्म दिने भनिसकेको छ।
‘कांग्रेसले जनमतको नेतृत्वमा सरकारलाई समर्थन दिएको थियो । जब जनमतले नै समर्थन फिर्ता लिइसकेपछि कुनै व्यक्तिलाई समर्थन दिइरहनुको औचित्य रहेन’ दलका नेता यादवले भने ।

राष्ट्रपति पौडेल र प्रधानमन्त्री कार्कीबीच भेटवार्ता

काठमाडौँ । राष्ट्रपति रामचन्द्र पौडेल र अन्तरिम सरकारका प्रधानमन्त्री सुशीला कार्कीबीच भेटवार्ता भएको छ ।
राष्ट्रपति भवन शीतल निवासमा भएको भेटमा समसामयीक राजनीति, फागुन् २१ म तोकिएको प्रतिनिधिसभा निर्वाचनको तयारी तथा सुरक्षा अवस्थाका बारेमा छलफल भएको राष्ट्रपतिको सचिवालयले जनाएको छ ।

बालेन र प्रधानमन्त्री कार्कीबीच भेटवार्ता

काठमाडौं । काठमाडौं महानगरपालिकाका मेयर बालेन्द्र साह (बालेन) ले प्रधानमन्त्री सुशिला कार्कीसँग बालुवाटारमा भेटवार्ता गरेका छन्।
स्रोतका अनुसार भेटमा बालेनले जेनजी आन्दोलनले उठाएका मागहरू सम्बोधन गर्नुपर्नेमा जोड दिएका थिए। उनले विशेषगरी आन्दोलनका मुद्दा र जनताले उठाएका विषयहरूलाई प्राथमिकतामा राख्न प्रधानमन्त्रीलाई सुझाव दिएका हुन्।
जवाफमा प्रधानमन्त्री कार्कीले आफू जेनजी आन्दोलनका मागप्रति प्रतिबद्ध रहेको जनाउँदै निर्वाचन, सुशासन र पारदर्शितालाई आफ्नो सरकारको केन्द्रमा राखेको स्पष्ट गरिन्।
करिब ३० मिनेट चलेको भेटमा प्रधानमन्त्रीका श्रीमान् दुर्गा सुवेदीसहित सचिवालय सदस्यहरूको उपस्थिति थियो भने मेयर साह तर्फबाट सहयोगी कुमार बेनको समेत सहभागिता रहेको थियो।

बालेन लक्षित ओलीको टिप्पणी, पहिल्यै सिंहदरबार जलाउँछु भन्दै थिए, योजनाबद्ध काम हो यो

काठमाडौं । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले काठमाडौं महानगरपालिकाका मेयर बालेन शाहलाई लक्षित गर्दै सिंहदरबार आगजनी योजनाबद्ध काम भएको टिप्पणी गरेका छन्।
भक्तपुरको गुण्डुस्थित निवासमा भेट्न पुगेका युवा तथा विद्यार्थीलाई सम्बोधन गर्दै उनले नेपालको लोकतन्त्र, गणतन्त्र र राष्ट्रिय स्वाधीनताको रक्षा युवाको काँधमा अडिएको जनाए।
ओलीले भने, “यो देश हाम्रो हो, हामीले नै बनाउनुपर्छ। अहिले कसले जलायो भन्ने प्रष्ट छैन तर देश र इतिहासलाई माया गर्नेले पक्कै सिंहदरबार जलाउँदैन। घुसपैठ गर्ने तत्त्वहरूले मात्र यस्तो कार्य गर्छन्।”
उनले काठमाडौं महानगर प्रमुख बालेन शाहलाई लक्षित गर्दै थपे, “जो पहिल्यैदेखि भन्दै थिए सिंहदरबार जलाउँछु भनेर, यो योजनाबद्ध काम हो। यस्तो कुरा हामीले बुझ्नुपर्छ।”

मुग्लिन–नारायणगढ सडक अनिश्चितकालका लागि बन्द

काठमाडौं । तुइनखोलामा भयंकर सुक्ख पहिरो खसेसँगै नारायणगढ–मुग्लिन सडकखण्ड अनिश्चितकालका लागि बन्द भएको छ । चितवनको इच्छाकामना गाउँपालिका–५ तुइनखोलास्थित सडकमा मंगलबार दिउँसो ३ः२० बजे खसेको भयंकर सुक्खा पहिरोले सडक समेत भासिने जोखिम बढेको चितवनको एसपी गोविन्द पुरीले जानकारी दिए ।
एसपी पुरीले भने, ‘तुइनखोलामा अत्यन्तै ठूलो पहिरो खसेको छ । सुक्खा पहिरो खसेका कारण सडक नै भासिने जोखिम बढेको छ । जसका कारण तत्कालै सडक खुल्ने कुनै सम्भावना छैन ।’
सडक खुल्न कति दिन लाग्ने भन्ने कुनै निक्र्योल गर्न नसकिने अवस्था रहेको उनको भनाइ छ । यसविषयमा निर्णय लिन सडक विभागको टोलीसहित सुरक्षा समितिको बैठक अहिले बसिरहेको एसपी पुरीले जनाए ।
सडक नै भासिन सक्ने जोखिमका कारण अहिले सवारीसाधनलाई फिर्ता गरेर वैकल्पिक बाटो प्रयोग गर्न अनुरोध गरिएको उनले बताए । पहिरो निरन्तर खसिरहेकोले तत्काल पहिरो पन्छाउन सक्ने सम्भावना नरहेको उनले जनाए ।

निर्वाचनको तयारीमा जुटे सरकार र निर्वाचन आयोग

काठमाण्डौं । आगामी फागुन २१ गते हुने प्रतिनिधिसभा सदस्य निर्वाचनलाई स्वच्छ, स्वतन्त्र, निष्पक्ष र भयरहित बनाउन सरकारले निर्वाचन आयोगसँग मिलेर तयारी तीव्र पारेको छ ।
प्रधानमन्त्री सुशीला कार्की र आयोगका पदाधिकारीबीच मंगलबार प्रधानमन्त्री तथा मन्त्रिपरिषद्को कार्यालयमा भएको छलफलमा निर्वाचन तयारीलाई प्राथमिकता दिँदै आवश्यक स्रोतसाधन, जनशक्ति र सुरक्षाको व्यवस्था गर्ने विषयमा सहमति गरिएको छ ।
प्रधानमन्त्री कार्कीले निर्वाचन नेपाल सरकारको उच्च प्राथमिकता भएको उल्लेख गर्दै आयोगलाई आवश्यक सहयोग गर्न सरकार प्रतिबद्ध रहेको जनाईन । उनले शान्ति–सुरक्षाको भरपर्दो व्यवस्था मिलाइने, सरोकारवालाहरूसँग निरन्तर छलफल गरिने र निर्वाचन सहज बनाउन अनुकूल वातावरण तयार गरिने स्पष्ट पारिन् ।
सो अवसरमा कार्यबाहक प्रमुख निर्वाचन आयुक्त रामप्रसाद भण्डारीले मतपेटिका सहितका आवश्यक सामग्री मौज्दातमै रहेको र बाँकी सामग्री पनि स्वदेशमै उत्पादित सामग्रीलाई प्राथमिकता दिँदै प्रतिस्पर्धात्मक तरिकाले खरिद गरिने जानकारी दिए । उनले निर्वाचन सुरक्षाका लागि सरकारलाई अनुरोध गर्दै, राजनीतिक दल, नागरिक समाज र सञ्चार जगतसहित सबै सरोकारवालाको सक्रिय सहयोग प्राप्त हुने विश्वास व्यक्त गरे ।
छलफलमा अर्थमन्त्री रामेश्वर प्रसाद खनाल, गृहमन्त्री ओमप्रकाश अर्याल, कानून, न्याय तथा संसदीय मामिला मन्त्री अनिलकुमार सिन्हा, मुख्य सचिव एकनारायण अर्याल लगायत अधिकारीहरूको उपस्थिति थियो । आयोगका तर्फबाट आयुक्त डा। जानकी कुमारी तुलाधर, सगुन सम्शेर जबरा तथा सचिव महादेव पन्थसहित पदाधिकारीहरूको सहभागिता थियो ।

नेशनल लाइफको संस्थापक शेयर बिक्रीमा

काठमाडौं । नेशनल लाइफ इन्स्योरेन्स कम्पनी लिमिटेडले १ लाख ६० हजार कित्ता संस्थापक शेयर बिक्रीमा राखेको छ।
कम्पनीले बीमा प्राधिकरणको निर्देशन अनुसार हाल उक्त शेयर कम्पनीकै विद्यमान संस्थापक शेयरधनीले मात्रै किन्न पाउने गरी बिक्रीमा राखेको हो।
सो शेयर किन्न इच्छुक शेयरधनीले अबको ३५ दिनभित्र आवश्यक कागजात सहित काठमाडौंको लाजिम्पाटस्थित कम्पनीको प्रधान कार्यालयमा आवेदन दिनु पर्नेछ।
शेयरको बिक्रीमूल्य प्रचलित नियमानुसार हुने मूल्यभन्दा कम नहुने कम्पनीले स्पष्ट पारेको छ। साथै उक्त समयावधिभित्र संस्थापक शेयरधनीबाट आवेदन प्राप्त नभएमा सो शेयर सर्वसाधारणलाई बिक्री गर्न प्रक्रिया अघि बढाइने जानकारी दिएको छ।

सानिमा रिलायन्स लाइफको क्लब अचिभर्स इभेन्ट २०८२ भव्यताका साथ सम्पन्न, क्लब छनौट भएका एजेन्सी सम्मानित

काठमाडौं । सानिमा रिलायन्स लाइफ इन्स्योरेन्सले क्लब अचिभर्स इभेन्ट २०८२ सम्पन्न गरेको छ । लेमन ट्री प्रिमियर, बूढानीलकण्ठ काठमाडौंमा आयोजना गरिएको उक्त कार्यक्रम देशभरि रहेका शाखा तथा उपशाखामा कार्यरत रही क्लब योजनामा सहभागी हुन सफल अभिकर्ताको उपस्थितीमा सम्पन्न भएको हो ।
कार्यक्रममा कम्पनीको अध्यक्ष रतन लाल केडिया , प्रमुख कार्यकारी अधिकृत शिवनाथ पाण्डे लगायत उच्च व्यवस्थापन समूहको उपस्थिति रहेको थियो । कार्यक्रमलाई सम्बोधन गर्दै कम्पनीका अध्यक्ष रतन लाल केडियाले देशका विभिन्न ठस्थानबाट आएका क्लब सदस्यता प्राप्त गर्न सफल बीमा सल्लाहकारहरूमा न्यानो अभिवादन टक्रयाएका थिए । साथै उनले कम्पनीप्रति देखाउनु भएको अगाढ विश्वास र कम्पनीको व्यवसाय वृद्धिमा उहाँहरुले पुर्‍याउनु भएको अतुलनीय योगदान प्रति हार्दिक आभार तथा धन्यवाद व्यक्त गरेका छन् ।
कार्यक्रमा कम्पनीका प्रमुख कार्यकारी अधिकृत शिवनाथ पाण्डेले सबै क्लब सदस्यहरू प्रति आभार प्रकट गर्दै कम्पनीको मेरुदण्डका रूपमा रहेका बीमा सल्लाहकारहरूलाई प्रोत्साहन गर्ने खालका कार्यक्रमहरू भविष्यमा पनि ल्याउने कुरा व्यक्त गरेका छन् । कम्पनीका डेपुटी सिईओ निराजन कंडेलले सफल बीमा सल्लाहकार बन्नको लागि आवश्यक सीपहरु लगायतका विषयहरूमा बोलेका थिए ।
कम्पनीले आर्थिक वर्ष २०८१–०८२ को अभिकर्ता प्रोत्साहन योजना अन्तर्गत गोधूली क्लब, पृथ्वी क्लब, अग्नी क्लब , आकाश क्लब र ग्यालेक्सी क्लबका योजनाहरु प्रस्तुत गरेको छ। । क्लबमा सहभागी हुन वैक्तिगत कोड र टिम व्यवसायमा संकलन गर्नुपर्ने न्यूनतम बीमाशुल्कको लक्ष्य तोकिएको हुन्छ । तोकिएको लक्ष्य हासिल गर्न सफल बीमा सल्लाहकारहरू क्लबमाको सदस्यता प्राप्त गरी कार्यक्रममा सहभागी हुन्छन्। सबै क्लबका सहभागीहरूलाई कम्पनीले सम्मान प्रदान गरेको थियो ।
नेपाल टेलिभिजनकी बरिस्ठ समाचार सम्पादक शिवानी थापा बस्न्यात कार्यक्रम संचालिका रहेकी थिइन भने चर्चित गायिका समिक्षा अधिकारी र हास्य कलाकार सुन्दर खनालले आफ्ना प्रस्तुतिहरु पस्कदै कार्यक्रममा रौनक थपेका थिए । कार्यक्रमलाई मनोरन्जनात्मक बनाउन बिच बिचमा नृत्य कार्येक्रम पनि समाबेश गरिएको थियो ।

123...15Page 1 of 15

लेटेष्ट समाचार

हमासको ग्रिनेड फालेर साथीहरूलाई जोगाए, आफू युद्धभूमिमै बिलाए विपिन

इजरायल र हमासबीचको युद्ध दुई वर्षपछि अन्त्य भएपछि सोमबार हमासले २० इजरायली बन्धक मुक्त गर्‍यो। गाजामा बन्धक बनाइएकाहरुको परिवारमा पुनर्मिलन हुँदाको क्षणले इजरायलमा खुसीयाली छ।...

‘जेनजी विद्रोह’पछि एमाले र माओवादीद्वारा मंसिरमा महाधिवेशन घोषणा, माैन कांग्रेस

काठमाडौं । भदौ २३ र २४ गतेको ‘जेनजी विद्रोह’पछि देशको राजनीतिक परिदृश्य उथलपुथल बनेको छ । यसबीच, दुई ठूला कम्युनिस्ट दल—नेकपा एमाले र नेकपा...

ओली–लेखकविरुद्धको जाहेरी प्रहरीबाटै सीधै जाँचबुझ आयोगमा

काठमाडौं । निवर्तमान प्रधानमन्त्री केपी शर्मा ओली र निवर्तमान गृहमन्त्री रमेश लेखकविरुद्ध परेको जाहेरी प्रहरीमार्फत दर्ता नभई सीधै जाँचबुझ आयोगमा पुगेको छ। जेनजी आन्दोलनका क्रममा...
कुटेखेलो मिडिया प्रा.लि. सूचना विभाग दर्ता नंः ४२६६-२०८०/२०८१ कीर्तिपुर-१०, काठमान्डौ President : Pramod Kumar Dhital, Editor : Santosh Acharya , Reporter : Indira Acharya Email : kutekhelo.com@gmail.com URL://www.kutekhelo.com सम्पर्क नं. - ९८४१४२८७६४

POPULAR POSTS

POPULAR CATEGORY

© copyright@ www.kutekhelo.com Kutekhelo Media Pvt.Ltd.