काठमाडौं । नेपाल इन्भेष्टमेण्ट मेगा बैंकले नेपालमै पहिलो पटक ‘पीओएस मेसिन’ मार्फत भुक्तानी गर्दा ‘इन्स्टा ईएमआई’ सुविधा ल्याएको छ ।
जसअनुसार अबदेखि एनआईएमबी क्रेडिट कार्ड प्रयोगकर्ताहरूले कुनैपनि व्यापारिक स्थानमा ‘एनआईएमबी पीओएस मेसिन’ मार्फत भुक्तानी गर्दा सोही क्षणदेखि किस्ताबन्दी सुविधा प्रयोग गर्न सक्नेछन्।
यो सुविधा ग्राहकवर्गहरूले ठूलो खर्चलाई सानो मासिक किस्तामा विभाजन गरेर सजिलै तिर्न सक्ने प्रणाली भएको र जुन छुट्टै आवेदन प्रक्रिया वा कुर्नु पर्ने झन्झटबिनै तुरुन्तै उपलब्ध हुनेछ।
बैंकले ‘इन्स्टा ईएमआई’सुविधा सुरु गर्नुको उद्देश्य ग्राहकवर्गहरूलाई आर्थिक लचिलोपन प्रदान गर्नुका साथै डिजिटल कारोबारलाई अझ सहज बनाउनु रहेको पनि जनाएको छ । यस सुविधाले विशेषगरी घरायसी सामान, विद्युतीय उपकरण, ग्याजेट, यात्राजस्ता सेवाहरू खरिद गर्न चाहने ग्राहकवर्गहरूलाई सस्तो मासिक किस्तामा भुक्तानी गर्ने विकल्प प्रदान गर्ने बैंकको भनाइ छ ।
सरल प्रक्रियामार्फत स्वचालित रूपमा सुरु हुने यो सुविधा, डिजिटल बैंकिङप्रतिको विश्वास र प्रयोगलाई थप सशक्त बनाउने विश्वास बैंकले लिएको छ।

काठमाडौं । शेयर बजार बढेर हिजो ३ हनार बिन्दु पार गरे पनि आज फेरि उच्च अंकले घटेको छ । नेप्से तल झरेसँगै कारोबार रकम पनि घटेको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार ४७.९३ अंकले तल झरेको हो । १.५९ प्रतिशतले बजार घट्दा नेप्से परिसूचक २९५४.१४ अंकमा ओर्लिएको छ ।
समग्रमा बजार घटे पनि अन्य समूह ०.८५ प्रतिशतले बढेको छन् । बाँकी अरु समूह राताम्मे भएका छन् ।
आज ३२७ कम्पनीका ३ करोड ६४ लाख १७ हजार ७ सय ४२ कित्ता शेयर किनबेच हुँदा १६ अर्ब ४४ करोड १३ लाख ५४ हजार ४ सय ८.५२ रुपियाँ बराबरको कारोबार भएको नेप्सेले जनाएको छ ।
सान्भी इनर्जी र ट्रेड टावरका लगानीकर्ताहरुले क्रमशः १० र ९.९९ प्रतिशतले नाफा कमाउँदा ग्रीन डेभलपमेन्ट बैंकका लगानीकर्ताहरुले सबैभन्दा बढी ८.०४ प्रतिशतले घाटा व्यहोरेका छन् ।
आज हिमालय रि–इन्स्योरेन्सको उच्च कारोबार भएको छ । उक्त कम्पनीको १ अर्ब ३२ करोड १२ लाख १८ हजार १ सय ९५.२० रुपियाँ बराबरको कारोबार भएको नेप्सेले जनाएको छ ।
साताको पहिलो दिन आइतबार १८.४४ अंकले बजार घट्दा २६ अर्ब ५७ करोड ७४ लाख ३८ हजार २ सय ३७.५१ रुपियाँ, सोमबार ७.१० अंकले बजार बढ्दा १९ अर्ब ३६ करोड ८ लाख ७३ हजार ३४.२९ रुपियाँ र हिजो मंगलबार ३०.७६ अंकले बजार बढ्दा १८ अर्ब ५२ करोड ९३ लाख २२ हजार ८ सय ८५.९३ रुपियाँ बराबरको कारोबार भएको थियो ।

काठमाडौं । दरमखोला हाइड्रो इनर्जी लिमिटेडले साउन १५ गते बिहीबारदेखि साउन १९ गते सोमबारसम्म सर्वसाधारणका लागि आईपीओ निष्काशन गर्ने भएको छ ।
कम्पनीले आफ्नो जारी पूँजीको ३८.३३ प्रतिशत अर्थात् प्रतिकित्ता अंकित मूल्य १०० रुपियाँका दरले ३९ लाख ५० हजार कित्ता आईपीओ सार्वजनिक निष्काशन गर्न नेपाल धितोपत्र बोर्डबाट अनुमति पाएको थियो ।
कम्पनीले पहिलो चरणमा आयोजना प्रभावितलाई १० लाख ३० हजार ५०० कित्ता र वैदेशिक रोजगारी गएका नेपालीलाई २ लाख ९१ हजार १५० कित्ता निष्कासन गरी बाँडफाँट गरिसकेको छ ।
त्यस्तै, सर्वसाधारणसमा निष्काशन हुने २९ लाख १९ हजार ५०० कित्ता शेयरमध्ये कम्पनीका कर्मचारीलाई ५८ हजार ३९० र सामूहिक लगानी कोषलाई १ लाख ४५ हजार ९७५ कित्ता सुरक्षित गरी बाँकी रहेको २४ लाख २३ हजार १८५ कित्ता शेयरका लागि आमसर्वसाधारणले आवेदन दिन पाउने बिक्री प्रबन्धक लक्ष्मी सनराइज क्यापिटलले जनाएको छ ।
उक्त आईपीओ २ लाख ४२ हजार २ सय १३ जनाले १०–१० कित्ता र ५ जनाले ११–११ कित्ताका दरले पाउने छन् ।

काठमाडौं । प्रभु महालक्ष्मी लाइफ इन्स्योरेन्स लिमिटेडको एनुअल ब्रान्च म्यानेजर्स कन्फरेन्स २०८२ सम्पन्न भएको छ। चितवनको नारायणगढमा साउन १० देखि १४ गतेसम्म ५ दिन विभिन्न कार्यक्रमका साथ सम्पन्न भएको हो।
कम्पनीका प्रमुख कार्यकारी अधिकृत (सीईओ) सन्तोष प्रसाईंले पानसमा दीप प्रज्ज्वलन गरी कार्यक्रमको उद्घाटन गरेका थिए। कार्यक्रममा देशैभरीका ११५ शाखाका शाखा प्रमुख र केन्द्रीय कार्यालयबाट व्यवस्थापन समूहको सहभागीता रहेको थियो।
कार्यक्रमलाई सम्बोधन गर्दै सीईओ प्रसाईंले सबैको मिहिनेतले गत आर्थिक वर्ष २०८१, ८२ मा व्यवसाय वृद्धिका हिसाबले नेपाली बीमा क्षेत्रमा प्रभु महालक्ष्मी लाइफलाई अब्बल साबित गर्न सहयोग गरेकोमा सबै शाखा प्रमुख, कर्मचारी, अभिकर्ता, व्यवस्थापन समूह, संचालक समिति लगायतलाई धन्यवाद व्यक्त गरेका थिए।
कम्पनीलाई विश्वास गरी बीमा गरेका सम्पूर्ण बीमितलाई धन्यवाद दिंदै विश्वासलाई जिम्मेवारीको रूपमा ग्रहण गर्ने जनाए। त्यसैगरी आर्थिक वर्ष २०८२–८३ को व्यवसायी लक्ष्य र उक्त लक्ष्य हासिल गर्ने कम्पनीको रणनीति प्रस्तुत गर्दै सोही अनुसार अगाडि बढ्न निर्देशन दिए।
यस कार्यक्रममा उत्कृष्ट कार्यसम्पादनका आधारमा विभिन्न विधामा कर्मचारीहरूलाई अवार्ड, प्रमाण पत्र सहित सम्मान गरीएको थियो।
कार्यक्रममा नायब प्रमुख कार्यकारी अधिकृत (डीसीईओ) किशोर प्रसाद लामिछानेले स्वागत मन्तब्य व्यक्त गरेका थिए। कम्पनीका नायब महाप्रबन्धक सोन बहादुर मगरले आर्थिक वर्ष २०८२, ८३ मा अझ सशक्त र आक्रामक बजार विस्तार गर्ने व्यवसायीक रणनीतिको बारेमा प्रकाश पारेका थिए।
कार्यक्रममा एनएलपी कोच मिन घलेले जीवन बीमा व्यवसायका समस्या, सोको समाधान, व्यवसाय विस्तारको कार्यगत रणनीतिका बारेमा व्यवहारीक तालीम समेत दिएका थिए। साथै कार्यक्रममा प्रसिद्ध कलाकार कम्पनीका ब्राण्ड एम्बेष्डर मनोज गजुरेलले मनोरञ्जनात्मक प्रस्तुती दिएका थिए।