काठमाडौं । नेपाल टेलिकमले देशका विभिन्न विकट तथा दुर्गम स्थानहरूमा स्याटेलाइट प्रविधिमा आधारित दूरसञ्चार सेवालाई तीव्रता दिएको छ। भौगोलिक प्रतिकूलताका कारण अन्य प्रविधि पुग्न कठिन भएका स्थानहरूमा कम्पनीले भीस्याट र जीएसएम प्रविधिमार्फत मोबाइल, टेलिफोन र डाटा सेवा उपलब्ध गराइरहेको छ।
चालु आर्थिक वर्षमा मात्रै टेलिकमले डोल्पाको कुगाउँ र निजाल, दोलखाको ना–गाउँ र रसुवाको चन्दनबारी गरी चार स्थानमा नयाँ जीएसएम मोबाइल सेवा विस्तार गरेको छ। यससँगै हाल देशभरका विभिन्न ३८ दुर्गम स्थानमा यो प्रविधिबाट सेवा प्रवाह भइरहेको छ।
कम्पनीका अनुसार सबैभन्दा बढी १४ वटा साइट डोल्पा जिल्लामा रहेका छन् भने हुम्ला र मुगुका ५–५ स्थानमा सेवा सञ्चालनमा छन्। यस्तै मनाङ, दोलखा, ताप्लेजुङ, सोलुखुम्बु, रसुवा, दार्चुला, बाजुरा र जुम्लाका अति विकट क्षेत्रहरूमा पनि यो प्रविधिमार्फत सञ्चार पहुँच पुर्याइएको छ।
न्यून जनसंख्या भएका र अत्यन्त विकट भौगोलिक अवस्थितिका कारण कतिपय स्थानमा हेलिकप्टरबाट उपकरण ओसारेर सेवा पुर्याइएको कम्पनीले जनाएको छ।
यी स्थानहरूमा लगानीअनुसार व्यावसायिक लाभ नहुने भए तापनि ‘नेपाल टेलिकम राष्ट्रको सञ्चार’ भन्ने मूल नारालाई सार्थक तुल्याउन सेवा विस्तार गरिएको टेलिकमको भनाइ छ। आगामी दिनमा यी स्याटेलाइट साइटहरूलाई अन्य अत्याधुनिक प्रविधिमा स्तरोन्नति गर्ने लक्ष्य समेत राखिएको छ।
कम्पनीले ब्याकबोन ट्रान्समिसन परियोजना अन्तर्गत अप्टिकल फाइबर नेटवर्क विस्तारको कार्यलाई पनि तीव्रता दिएको छ। पूर्व–पश्चिम तथा उत्तर–दक्षिण करिडोरका साथै ग्रामीण क्षेत्रमा उच्च क्षमताको डाटा ट्रान्समिसन सुनिश्चित गर्न नेपाली सेना र सडक विभागसँगको समन्वयमा ओएफसी विस्तार र सुदृढीकरण भइरहेको छ।
नेटवर्कलाई भरपर्दो बनाउन पुराना स्विच उपकरणहरूलाई आधुनिक राउटरमा स्तरोन्नति गर्ने र वैकल्पिक लिङ्क ९रिडन्डन्सी० स्थापना गर्ने कार्यलाई पनि प्राथमिकता दिइएको छ।
यसबाट एउटा लिङ्कमा समस्या आए पनि सेवा निरन्तर रहने सुनिश्चित गरिएको छ। विकट क्षेत्रमा सेवाको निरन्तरताका लागि मर्मतसम्भार र पूर्वाधार संरक्षणका उपायहरू समेत अवलम्बन गरिएको टेलिकमका प्रवक्ता रबिन्द्र मानन्धरले जानकारी दिएका छन ।
