काठमाण्डौ । ललितपुरको बालकुमारीमा मन्त्रीको गाडीमाथि भएको आगजनी घटनामा प्रहरीको गोली लागेर २ आन्दोलनकारीको मृत्यु भएको छ ।
मृत्यु हुनेमा दैलेखका २३ वर्षीय सुजन रावत तथा डोटीका २२ वर्षीय वीरेन्द्र शाह रहेका केन्द्रीय प्रहरी प्रवक्ता तथा प्रहरी नायब महानिरीक्षक कुवेर कडायतले जानकारी दिए ।
प्रहरीको गोली लागेर घाइते भएका आन्दोलनकारी रावतको उपचारको क्रममा किष्ट अस्पतालमा तथा शाहको पाटन अस्पतालमा मृत्यु भएको छ ।
रोजगार अनुमति प्रणाली (ईपीएस) मार्फत कोरियामा काम गर्न जान खोज्नेहरूले गरेको प्रदर्शन नियन्त्रणमा लिन प्रहरीले गोली चलाएको छ ।
प्रदर्शनकारीले भौतिक पूर्वाधार तथा यातायात मन्त्री प्रकाश ज्वाला चढ्ने बा २ झ ५८६१ नम्बरको गाडीमा आगो लगाएका थिए ।

काठमाडौं । दक्षिण कोरियास्थित पानीजहाज बनाउने (सिपबिल्डिङ) मा परीक्षामा दिएका सम्पूर्ण विद्यार्थीलाई कोरिया रोजगार अनुमति प्रणाली (इपिएस) परीक्षामा सहभागी गराउन अदालतले आदेश दिएको छ ।
उच्च अदालत पाटनले आज सबैलाई परीक्षामा सहभागी गराउन आदेश जारी गरेको हो । सिपबिल्डिङमा परीक्षा दिएकाहरुले कोरिया भाषा परीक्षामा भाग लिन नपाउने भनेपछि १८ जनाले पाटन उच्च अदालतमा मुद्दा हालेका थिए ।
परीक्षा दिन नपाउने भएपछि आज परीक्षार्थीले काठमाडौंको बालकुमारीमा प्रदर्शनसमेत गरेका थिए । त्यसक्रममा प्रहरीले बल प्रयोग गर्दा दुईजना प्रदर्शनकारीको मृत्यु भएको भएको छ ।

काठमाण्डौ । नेपाली कांग्रेसको भएको केन्द्रीय कार्यसमिति बैठक आज पनि बस्नेछ । बिहीबारदेखि शुरू भएको बैठक आज पनि जारी रहने भएको हो । बैठक बिहान ११ बजे पार्टीको केन्द्रीय कार्यालयमा नै बस्नेछ ।
बिहीबारको बैठकमा समसामयिक राजनीतिक विषयमा छलफल भएको थियो । हिजो महामन्त्री विश्वप्रकाश शर्माले प्रस्तावहरू प्रस्तुत गरेको पार्टी कार्यालयका मुख्यसचिव कृष्णप्रसाद पौडेलले जानकारी दिए ।
‘समुदायमा कांग्रेस अभियान’को कार्ययोजनाका सम्बन्धमा महामन्त्री गगन थापाले र जाजरकोट भूकम्पका सम्बन्धमा सहमहामन्त्री जीवन परियारले बैठकलाई जानकारी गराएका थिए ।
बैठकमा केन्द्रीय सदस्यहरू दिलेन्द्रप्रसाद बडू, कृष्णचन्द्र नेपाली पोखरेल, दीपक गिरी, मीनबहादुर विश्वकर्मा, मोहनबहादुर बस्नेत, देवेन्द्रराज कँडेल, डा. डिला सङ्ग्रौला, कर्णबहादुर बुढा, राजीव कोइराला, नैनसिंह महर, मुक्ताकुमारी यादव, रङ्गमती शाही, मदनकृष्ण श्रेष्ठ, भरतकुमार शाह, सीतादेवी देवकोटाले आ–आफ्नो धारणा व्यक्त गरेका थिए । आज थप केन्द्रीय सदस्यहरूले धारणा राख्ने जनाईएको छ ।

काठमाडौं । जिल्ला अदालत काठमाडौंमा क्रिकेटर सन्दीप लामिछानेविरुद्धको बलात्कारसम्बन्धी मुद्दामा अन्तिम सुनुवाइ प्रारम्भ भए पनि बहस नसकिएपछि ‘हेर्दाहेर्दै’मा आजका लागि राखिएको छ ।
न्यायाधीश शिशिरराज ढकालको इजलासमा यही पुस ८ गतेदेखि निरन्तर सुनुवाइ सुरु गरिए पनि बहस नसकिएपछि मुद्दा हेर्दाहेर्दैमा आज सुनुवाइ हुने भएको हो ।
यसअघि, नाबालिक बलात्कार मुद्दाको थुनछेक बहसमा काठमाडौं जिल्ला अदालतले सन्दीपलाई पुर्पक्षका लागि थुनामा पठाएको थियो भने उच्च अदालत पाटनले रु २० लाख धरौटीमा छाड्न आदेश दिएको थियो ।
सर्वोच्च अदालतले लामिछानेलाई विदेशका प्रतियोगितामा भाग लिन जान पाउने आदेशसमेत गरेको थियो ।
काठमाडौं जिल्ला अदालतमा पटक पटक पेसी तोकिए पनि अहिलेसम्म फैसला हुन सकेको छैन् ।

काठमाडौं । सरकारले प्रधानमन्त्री कार्यालयका ६८ वटा दरबन्दी कटौती गर्ने निर्णय गरेको छ । बिहीबार बसेको मन्त्रिपरिषद् बैठकको निर्णय सुनाउँदै सञ्चार तथा सूचना प्रविधिमन्त्री रेखा शर्माले त्यस्तो निर्णय भएको जानकारी दिइन् ।
“प्रधानमन्त्री तथा मन्त्रिपरिषद्को कार्यालयको प्रस्तावमा कार्यालयको पुनर्संरचनासहितको संगठन तथा सर्वेक्षण स्वीकृत गर्ने भन्ने निर्णय भएको छ । यस अनुसार प्रधानमन्त्री कार्यालयको हालको दरबन्दीमा ६८ वटा दरबन्दी कम हुने भन्ने छ,” उनले भनिन् ।
शर्माले प्रधानमन्त्री कार्यालयको ६८ दरबन्दी कटौती भएको जानकारी दिईन । प्रधानमन्त्रीले एक वर्ष पुगेको अवसरमा प्रधानमन्त्री कार्यालयको पुनर्संरचनाबाट सुरु गर्ने भनेको र सोही अनुसार भएको उनले जनाईन ।