काठमाडौं । लक्ष्मी सनराइज बैंकले आफ्ना दुई शाखा स्थानान्तरण गर्ने भएको छ ।
हालको काठमाडौं महनगरपालिका–३, नारायण गोपालचोकस्थित रहेको साविक सनराइज बैंकको शाखा यही वैशाख १२ गतेदेखि सूर्यविनायक नगरपालिका–२, भक्तपुरमा स्थानान्तरण गर्न लागिएको बैंकले जानकारी दिएको छ ।
सम्बन्धित शाखाबाट दिँदै आएको सेवा हालको भाटभटेनी सुपरमार्केट महारागन्जमा रहेको साविक लक्ष्मी बैंकको शाखाबाट प्रदान गरिने बैंकले जनाएको छ । यो सेवा यही ११ गतेदेखि सुरु हुनेछ ।
त्यसैगरी, बैंकले अर्को शाखा कामनपा–३२, पेप्सीकोला (साविक लक्ष्मी बैंक लिमिटेड) पनि वैशाख १२ गतेदेखि मध्यपुर थिमि नगरपालिका–८, भक्तपुर, बोडेमा स्थानान्तरण गर्न लागेको हो । सो शाखाबाट प्रदान गरिँदै आएको सेवा हालको स्थानबाट ३०० मिटर पूर्व–उत्तर सनराइज चोकनजिक रहेको लक्ष्मी सनराइज बैंक (साविक लक्ष्मी बैंक लिमिटेड) बाट दिइने बैंकले जनाएको छ ।

काठमाडौं । ग्लोबल आइएमई बैंक र हब इन्टरनेशनल एजुकेशन प्रालिबीच भारतमा उच्च शिक्षाका लागि जाने विद्यार्थीहरुलाई शैक्षिक कर्जा सहजरुपमा प्रवाह गर्ने सम्बन्धी समझदारी पत्रमा हस्ताक्षर भएको छ ।
उक्त समझदारी पत्रमा बैंकका नायव प्रमुख कार्यकारी अधिकृत सुमन पोखरेल तथा हब इन्टरनेशनल एजुकेशन प्रालिका संस्थापक तथा अध्यक्ष उद्धवबहादुर खड्काले हस्ताक्षर गरेका हुन् ।
समझदारी अनुसार बैंकले हब इन्टरनेशनलले सिफारिस गरेका विद्यार्थीहरुलाई भारतका विश्वविद्यालयहरुमा उच्च शिक्षाका निमित्त आवश्यक वित्तीय दायित्व वहन गर्न आवश्यक शैक्षिक कर्जा सहजरुपमा प्रवाह गर्नेछ ।
हब इन्टरनेशनल एजुकेशनमार्फत सिफारिस भएका विद्यार्थी तथा अभिभावकहरुले आवश्यक कागजात तथा विवरण सहित बैंकको शाखा कार्यालयमा निवेदन दिए पश्चात् छिटो, सरल तथा सहज रुपमा यो कर्जा प्रवाह गरिनेछ ।
बैंकको ३५४ शाखा कार्यालय, ३७९ एटिएम, २७७ शाखा रहित बैंकिङ्ग सेवा, ६७ एक्सटेन्सन तथा राजश्व संकलन काउन्टर तथा ३ वटा बैदेशिक प्रतिनिधि कार्यालय समेत गरी १,१०० भन्दा बढि सेवा केन्द्र छन् ।

काठमाडौं । नयाँ वर्ष २०८१ मा चार दिन शेयर बजार खुल्दा चारै दिन बजारमा गिरावट आएको छ । यी चार दिनमा बजार ५३.५४ अंकले घटेर नेप्से १९७२.१४ अंकमा आइपुगेको छ ।
यसैक्रममा साताको अन्तिम दिन आज बजार १९.५६ अंक तथा ०.९८ प्रतिशतले घटेको छ । सबै उपसूचक राताम्मे भएका छन् । लघुवित्त समूह सबैभन्दा बढी १.७२ प्रतिशतले घटेको हो ।
आज ३१५ कम्पनीका ५३ लाख ४४ हजार ६ सय १३ कित्ता शेयर किनबेच हुँदा २ अर्ब ९ करोड ३६ लाख १२ जहार ७ सय ९२.७८ रुपियाँ बराबरको कारोबार भएको छ ।
समग्रमा बजार घटे पनि खानीखोला हाइड्रोका लगानीकर्ताहरुले सबैभन्दा बढी ७.९४ प्रतिशतले नाफा कमाएका छन् । आज ५४ कम्पनीको शेयर मूल्य बढ्दा बाँकीको घटेको छ ।
त्यस्तै आज रुरु जलविद्युत, गोर्खाज फाइनान्स, सिभिल बैंकको डिबेञ्चर, सीवाईसी नेपाल लघुवित्त र सिद्धार्थ बैंकको ऋणपत्रका लगानीकर्ताहरुले क्रमशः ९.९९, ९.३९, ८.८९, ६.१२ र ५.८४ प्रतिशतले घाटा व्यहोरेका छन् ।
आज गोर्खाज फाइनान्सको उच्च कारोबार भएको छ । उक्त कम्पनीको १७ करोड ८२ लाख ८५ हजार ४ सय ४१.६० रुपियाँ बराबरको शेयर किनबेच भएको नेप्सेले जानकारी दिएको छ ।
साताको पहिलो आइतबार २.३५ अंकले बजार घट्दा ३ अर्ब ६ करोड ३७ लाख ७२ हजार ६ सय ५२.६२ रुपियाँ, सोमबार १६.८२ अंकले बजार घट्दा २ अर्ब ७९ करोड ७५ लाख ७७ हजार ४ सय ३२.६८ रुपियाँ र मंगलबार १४.८१ अंकले बजार घट्दा २ अर्ब १० करोड ३० लाख १९ हजार २ सय १८.५८ रुपियाँ बराबरको कारोबार भएको थियो ।

काठमाडौँ । एनएमबि बैंकले आज बल्खु शाखाबाट शुरु गरि किर्तिपुरमा अवस्थित उमा महेश्वर मन्दिर परिसर सम्मको पैदल यात्रा गरी एघारौँ हेरिटेज वाक कार्यक्रम सम्पन्न गरेको छ । एनएमबि बैंकले “हाम्रा सम्पदा हुन खुला संग्रहालय, इतिहास र संस्कृतिका महाविद्यालय” भन्ने मूल नाराको साथ मुलुकको ऐतिहासिक तथा सामाजिक रुपान्तरणको लागि सांस्कृतिक सम्पदा प्रवर्धन र साक्षरता अभिवृद्धि गर्ने उद्देश्यले उक्त कार्यक्रम सम्पन्न गरेको हो ।
बैंकले नेपाल हेरिटेज सोसाईटीको सहकार्यमा, बैंकका अध्यक्ष मनोज कुमार गोयल, संचालक जीवन कुमार कट्वाल, उत्तम भ्लोन, हरिश्चन्द्र सुवेदी, शिरिष कुमार मुरारका, बैंकका प्रमुख कार्यकारी अधिकृत सुनिल के.सी., किर्तिपुर महानगरपालिका प्रतिनिधिहररु, बैंकका कर्मचारी लगायत सर्वसाधारणहरु गरी लगभग ७५० जनाको सहभागितामा उक्त कार्यक्रम सम्पन्न गरेको छ । उक्त कार्यक्रममा प्रमुख अतिथिका रुपमा बाग्मती प्रदेशका संस्कृति, पर्यटन तथा सहकारी मन्त्री श्री शैलेन्द्र मान बज्रचार्यको उपस्तथिति थियो ।
उक्त कार्यक्रममा एनएमबि बैंकद्वारा संस्थागत सामाजिक उत्तरदायित्व अन्तर्गत सम्पदा संरक्षणको लागि नेपाल हेरिटेज सोसाईटीलाई ५ लाखको सहयोगका साथैे किर्तिपुर महानगरपालिकालाई डस्टविनहरु समेत हस्तान्तरण गरिएको थियो ।
बैंकले प्रदेश नं। १ मा इटहरी चोक देखी रामधुनी मन्दिर सम्म, मधेष प्रदेशमा जनकपुर शाखा देखी राम मन्दिर, चितवनमा भरतपुर शाखा देखी गणेश धाम, गण्डकी प्रदेशमा जिरो किलोमिटर शाखा देखी तालबाराही मन्दिर सम्म, लुम्बिनी प्रदेशमा गोल पार्क देखी सिद्धबाबा मन्दिर सम्म र कर्णाली प्रदे्रश र सुदूर पश्चिम प्रदेशमा सुर्खेत शाखा देखी काक्रेबिहार मन्दिर सम्म, महेन्द्रनगर शाखा देखी सिद्धनाथ मन्दिर सम्म र धनगढी शाखा देखी कृष्ण मन्दिर सम्म एकै साथ एघारौँ हेरिटेज वाक कार्यक्रम सम्पन्न गरेको छ ।
एनएमबि बैंक, विगत २७ वर्ष देखी अनवरत रुपमा बैंकिङ्ग सेवा सुविधा प्रदान गर्दै आएको नेपाल राष्ट्र बैंकबाट “क” वर्गको इजाजत पत्र प्राप्त, एक अग्रणी वित्तीय संस्था हो । एनएमबि बैंक द फाइनान्सियल टाइम्स लन्डनको ‘द ब्यान्कर’ पत्रिकाबाट एसियाकै सर्वोत्कृष्ट बैंकको उपाधी ‘बैंक अफ द ईयर एसिया २०२१’ अवार्डबाट सम्मानित भएको बैंक हो । एनएमबि बैंकले सन् २०१७, २०१८, २०२० र २०२१ मा पनि नेपालकैे उत्कृष्ट बैंकको सम्मान ‘बैंक अफ द इयर नेपाल’ प्राप्त गरिसकेको छ ।
एनएमबि बैंकले हाल देशभरी २०१ शाखाहरु, १८६ एटीएमहरू, ११ एक्सटेन्सन काउन्टरहरू मार्फत उच्चस्तरीय बैंकिङ्ग सेवा प्रदान गर्दै आइरहेको छ ।