काठमाडौँ । ग्लोबल आइएमई बैंकको स्वतन्त्र÷महिला सञ्चालकमा भागिरथी भट्टराई ज्ञवाली र प्रमुख कार्यकारी अधिकृतमा सुरेन्द्रराज रेग्मी नियुक्त भएका छन्। बिहीबार बसेको बैंकको सञ्चालक समितिको बैठकले ज्ञवालीलाई सञ्चालक र रेग्मीलाई प्रमुख कार्यकारी अधिकृतमा नियुक्त गर्ने निर्णय गरेको हो।
त्रिभुवन विश्वविद्यालयबाट जनप्रशासन र अर्थशास्त्रमा स्नातकोत्तर गरेकी ज्ञवाली लामो समयदेखि अध्यापन र बिभिन्न संघ संस्थामा संलग्न छिन्।
त्यसैगरी समितिले बैंकका वरिष्ठ नायव प्रमुख कार्यकारी अधिकृत रेग्मीलाई २०८१ भदौ १ गतेदेखि लागु हुनेगरी बैंकको प्रमुख कार्यकारी अधिकृतमा नियुक्त गरेको छ।
तीन दशकभन्दा लामो समय बैंकिङ्ग क्षेत्रमा रहेका रेग्मीले २०६५ मा नायव प्रबन्धक तहबाट ग्लोबल आइएमई बैंकमा प्रवेश गर्नुभएको थियो।
रेग्मीले त्रिभुवन विश्व विद्यालयबाट एमए (अर्थशास्त्र) तथा वेलायतको युनिभर्सिटि अफ वेल्सबाट एमबीए गरेका छन्।
ग्लोबल आइएमई बैंकमा कर्जा व्यवस्थापन, जोखिम तथा नियन्त्रण, बैंकिङ्ग अपरेसन, जोखिम व्यवस्थापन, अनुपालन, शाखा सञ्चालन, सामान्य प्रशासन, मर्जर व्यवस्थापन लगायत समग्र बैंकिङ्गको सुपरिवेक्षण तहमा काम गरिसकेका रेग्मी एक अब्बल बैंकरका रुपमा परिचित छन्।

काठमाडौं । लगातार ६ दिन बढेर हिजो करेक्शन भएको शेयर बजार आज पुनः उकालोतर्फ अघि बढेको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार ३२ अंकले उचालिएको हो । १.२६ प्रतिशतले बजार बढ्दा नेप्से परिसूचक २५६८.११ अंकमा उक्लिएको छ ।
समग्रमा बजार बढे पनि विकास बैंक, हाइड्रो, लगानी र अन्य समूह क्रमशः ०.३५, ०.१०, ०.७३ र ०.३३ प्रतिशतले घटेका छन् । बाँकी समूहमा हरियाली छाएको छ । लघुवित्त समूह सबैभन्दा बढी ६.८३ प्रतिशतले बढेको हो ।
आज ३२० कम्पनीका ३ करोड ५५ लाख ९४ हजार ८ सय ६८ कित्ता शेयर किनबेच हुँदा १४ अर्ब १३ करोड ७८ लाख ९९ हजार ४९.२८ रुपियाँ बराबरको कारोबार भएको छ ।
विभिन्न १४ कम्पनीका लगानीकर्ताहरुले ९ प्रतिशत बढी नाफा कमाएका छन् । सबैभन्दा बढी उपकार लघुवित्त, जीवन विकास लघुवित्त र एशियन हाइड्रोका लगानीकर्ताहरुले क्रमशः १०, ९.९९ र ९.९९ प्रतिशतले नाफा कमाएका हुन् ।
त्यस्तै मितेरी डेभलपमेन्ट बैंकका लगानीकर्ताहरुले सबैभन्दा बढी ७.६५ प्रतिशतले घाटा व्यहोरेका छन् ।
आज सानिमा जीआईसी इन्स्योरेन्सको उच्च कारोबार भएको छ । उक्त कम्पनीको ३४ करोड १७ लाख ७९ हजार ९ सय ७२.७० रुपियाँ बराबरको कारोबार भएको नेप्सेले जानकारी दिएको छ ।
साताको पहिलो दिन आइतबार बजार ६१.६१ अंकले बढ्दा १५ अर्ब २३ करोड ८२ लाख ७१ हजार २ सय ९०.९८ रुपियाँ, सोमबार २.१५ अंकले बजार बढ्दा १३ अर्ब ९१ करोड ५५ लाख ३५ हजार ४ सय ४०.९८ रुपियाँ, मंगलबार ७५.३३ अंकले बजार बढ्दा १४ अर्ब ११ करोड ६३ लाख ३० हजार ९ सय ९५.७६ रुपियाँ र हिजो बुधबार २७.३२ अंकले बजार घट्दा १६ अर्ब २० करोड ८५ लाख ७७ हजार ३ सय १४.५३ रुपियाँ बराबरको कारोबार भएको थियो ।