काठमाडौं । नेपाल लाइफ इन्स्योरेन्स कम्पनीले प्रोफेसनल एजुकेटर्स लिमिटेड र युनिग्लोब हायर सेकेन्डरी स्कुलमा लगानी गर्ने निर्णय गरेको छ ।
लगानी विविधिकरणको रणनीतिलाई मूर्तरुप प्रदान गर्दै कम्पनीले उक्त दुई शैक्षिक संस्थामा लगानी गर्ने निर्णय गरेको हो । दुई संस्थामा गरेर कम्पनीले एक अर्ब ३३ करोड ७२ लाख रुपियाँ लगानी गर्नेछ ।
आइतबार काठमाडौंमा एक कार्यक्रम गरेर यस सम्बन्धी सम्झौता पत्रमा हस्ताक्षर पनि गरिएको छ । त्यसमा कम्पनीको तर्फबाट प्रमुख कार्यकारी अधिकृत प्रवीण रमण पराजुली र प्रोफेसनल एडुकेटर्स लिमिटेडका कार्यकारी अध्यक्ष प्राडा खगेन्द्रप्रसाद ओझाले हस्ताक्षर गरेका छन् ।
कम्पनीले प्रोफेसनल एडुकेटर्स लिमिटेडमा ७३ करोड ७२ लाख ८९ हजार ६ सय लगानी लगानी गर्नेछ । त्यसपछि उक्त संस्थामा कम्पनीको ३५.३२ प्रतिशत शेयर स्वामित्व हुनेछ । यसैगरी युनिग्लोब हायर सेकेन्डरी स्कुलमा ६० करोड लगानी गर्ने कम्पनीले जानकारी दिएको छ । त्यसो गर्दा त्यसमा कम्पनीको शेयर स्वामित्व ७.६२ प्रतिशत हुनेछ ।
कम्पनीका सञ्चालक समितिका अध्यक्ष गोबिन्दलाल संघईले नेपाल बीमा प्राधिकरणले जारी गरेको लगानी सम्बन्धी निर्देशिकाको अधिनमा रही लगानी विविधिकरणमा ध्यान दिइरहेको जनाए । सोही क्रममा शिक्षा क्षेत्रलाई पनि प्राथमिकतामा राखेको उनको भनाइ छ ।
शिक्षा क्षेत्र राष्ट्रिय महत्वको क्षेत्र रहेको र यस क्षेत्रमा उदाहरणीय कार्य गर्न सक्दा राम्रो प्रतिफलका साथै राष्ट्र प्रति योगदान पुग्न जाने उनले जनाए । यसैगरी कम्पनीप्रति पनि आम नागरिकको थप विश्वास प्राप्त हुने आशाका साथ कम्पनीले यो सम्झौता गरेको उनको भनाइ छ ।
यस कम्पनीका सञ्चालक समितिका सदस्य एवं लगानी समितिका संयोजक कमलेश कुमार अग्रवालले विभिन्न वित्तीय सूचकहरुका आधारमा नेपाल लाइफ सवैभन्दा ठूलो तथा सर्वाधिक विश्वासिलो कम्पनी भएको जनाए । कम्पनीले बीमित ग्राहकहरुबाट संकलित रकमलाई राम्रो प्रतिफलका लागि सुरक्षित स्थानहरुमा लगानी गर्ने अभिप्रायका साथ यो लगानी गरिएको उनको भनाइ छ ।
कम्पनीका प्रमुख कार्यकारी अधिकृत प्रवीणरमण पराजुलीले जीवन बीमा बजारमा एक चौथाई भन्दा बढी हिस्सा ओगट्दै नेतृत्वदायी भूमिका निर्वाह गर्दै आएको यस कम्पनीले लगानी विविधिकरणलाई केन्द्रविन्दुमा राखेको जनाए । यसैको सुरुवात स्वरुप शिक्षा क्षेत्रको लिडरको रुपमा स्थापित संस्थामा लगानी गरिएको उनको भनाइ छ । उच्च प्रतिफल प्रदान गर्न लगानी विविधिकरणको कार्यको शुभारम्भ भएको र आगामी दिनमा यसलाई थप प्रभावकारी बनाउन कम्पनी अग्रसर रहेका उनले जनाए ।
प्रोफेसनल एडुकेटर्स लिमिटेडका कार्यकारी अध्यक्ष ओझाज्युले शिक्षा र जीवन बीमा क्षेत्रका मार्केट लिडर एकसाथ भएर काम गर्न आफू कटिबद्ध भएको जनाए । यो सम्झौता कोसेढुङ्गा सावित हुने र यसले राष्ट्र निर्माणमा अतुलनीय भूमिका निर्वाह गर्नेमा आफू विश्वस्त रहेको उनको भनाइ छ ।
कम्पनीका नायव प्रमुख कार्यकारी अधिकृत अमितकुमार कयालले जीवन बीमा र शिक्षाको उद्देश्य सुरक्षा र समृद्धि भएको जनाउँदै आगामी दिनमा सुरक्षा र समृद्धिका निम्ति एकजुट भएर प्रभावकारी ढंगले सामाजिक रूपान्तरणका लागि कार्य गर्ने जनाए ।

काठमाडौं । शेयर बजार आज झिनो अंकले मात्रै उचालिएको छ । बजार आज २५ सय अंक पार गरेर तल झरेको हो । नेप्सेमा झिनो बढोत्तरी भए पनि कारोबार रकम भने उत्साहजनकनै छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार २.१५ अंकले उचालिएको हो । ०.०८ प्रतिशतले बजार बढ्दा नेप्से परिसूचक २४८८.०९ अंकमा पुगेको छ ।
बजार झिनो अंकले मात्रै उचालिंदा बैंकिङ, विकास बैंक, होटल, लगानी, लघुवित्त र निर्जीवन बीमा कम्पनी भने घटेका छन् । आज उत्पादनमूलक समूह सबैभन्दा बढी २.१६ प्रतिशतले बढेको छ ।
आज ३०९ कम्पनीका ३ करोड ९७ लाख ५४ हजार ७ सय ११ कित्ता शेयर किनबेच हुँदा १३ अर्ब ९१ करोड ५५ लाख ३५ हजार ४ सय ४०.९८ रुपियाँ बराबरको कारोबार भएको हो ।
मुक्तिनाथ कृषि कम्पनीका लगानीकर्ताहरुले आज सबैभन्दा बढी नाफा कमाएका छन् । उक्त कम्पनीको शेयर मूल्य १० प्रतिशतले बढेको हो ।
त्यस्तै गणपति लघुवित्तका लगानीकर्ताहरुले सबैभन्दा बढी ९.९४ प्रतिशतले घाटा व्यहोरेका छन् ।
आज हिमालयन रि–इन्स्योरेन्सको उच्च कारोबार भएको छ । उक्त कम्पनीको ३६ करोड ९३ लाख ४८ हजार ७ सय ४१ रुपियाँ बराबरको कारोबार भएको नेप्सेले जानकारी दिएको छ ।
साताको पहिलो दिन हिजो आइतबार बजार ६१.६१ ऋंकले बढ्दा १५ अर्ब २३ करोड ८२ लाख ७१ हजार २ सय ९०.९८ रुपियाँ बराबरको कारोबार भएको थियो ।

काठमाडौं । नबिल बैंक लिमिटेडले एकसाथ चार अवार्ड प्राप्त गरेको छ ।
नवीन प्रयोग र ग्राहकको सुविधामा बैंकले पुर्‍याएको ध्यानले यी अवार्ड प्राप्त गरेको हो ।
बैंकले नेपाल चार्टर्ड एकाउन्टेन्ट संस्था (आइक्यान) बाट ‘नेशनल बेस्ट प्रिजेन्टेड एनुअल रिपोर्ट अवार्ड (एनबीपीए) २०२३’ प्राप्त गरेको हो । बैंकले वाणिज्य बैंकतर्फको उत्कृष्ट वित्तीय प्रतिवेदन गोल्ड अवार्ड जितेको हो ।
बैंकको वित्तीय पारदर्शिता, जवाफदेहिता र सुशासनलाई सम्मान गर्दै यो अवार्ड प्रदान गरिएको जनाईएको छ । काठमाडौंमा आयोजित एक विशेष समारोहमा अर्थमन्त्री विष्णुप्रसाद पौडेलले उक्त अवार्ड बैंकका नायव प्रमुख कार्यकारी अधिकृत मनोजकुमार ज्ञवाली र वित्त तथा योजना विभाग प्रमुख सन्दीपबाबु पौडेललाई हस्तान्तरण गरेका हुन् ।
बैंकले संयुक्त अधिराज्य (युके) को ग्लोबल ब्राण्ड्स म्यागेजिनबाट यस वर्षको ‘बेस्ट कमर्सियल बैंकिङ ब्राण्ड अवार्ड नेपाल, २०२४’ प्राप्त गरेको छ । यो सम्मानले बैंकिङ क्षेत्रमा नबिल बैंकको उत्कृष्ट सेवा र दूरदर्शी दृष्टिकोणलाई थप सुदृढ बनाएको जनाईएको छ । अवार्डका लागि बाह्य अनुसन्धान तथा मूल्यांकन टोलीले गरेको सिफारिशका आधारमा बैंकले यो अवार्ड प्राप्त गरेको हो ।
त्यस्तै बैंकले ‘युरोमनी अवार्ड फर एक्सिलेन्स २०२४’ अन्तर्गत ‘नेपालको बेस्ट बैंक फर कर्पोरेट सोसियल रेस्पोन्सिबिलिटी (सीएसआर) पनि प्राप्त गरेको छ । सामाजिक उतरदायित्त्वअन्तर्गत देशमा पुर्‍याएको योगदानको कदर स्वरूप यो अवार्ड बैंकले हासिल गरेको बैंकले जानकारी दिएको छ ।
बैंकले ‘युरोमनी अवार्ड फर एक्सिलेन्स २०२४’ अन्तर्गत नेपालको ‘बेस्ट बैंक फर एसएमइज’तर्फको अवार्ड पनि प्राप्त गरेको छ । सन् १९९२ मा स्थापना गरिएको यो अवार्ड विश्व बैंकिङ क्षेत्रमा शुरू गरिएको पहिलो अवार्ड हो, जसले बैंकको गुणस्तरीय सेवा, सृजनात्मकता र ग्राहकप्रतिको विशेषज्ञतालाई सम्मानित गर्ने जनाईएको छ ।