काठमाडौं । एनएमबि बैंकको नाफामा २७.४९ प्रतिशतको गिरावट आएको छ । बैंकले अघिल्लो वर्ष ३ अर्ब २२ करोड रुपैयाँ नाफा गरेकामा गत आवमा २ अर्ब ३३ करोडमात्र नाफा कमाउन सफल भएको हो ।
ब्याज आम्दानी नै करिब ३ प्रतिशतले घटेपछि बैंकको नाफामा गिरावट आएको देखिन्छ । यससँगै बढेको निष्क्रिय कर्जाका कारण नोक्सानी व्यवस्था अघिल्लो आवको भन्दा बढी गर्नु परेपछि बैंकको नाफा प्रभावित भएको छ ।
एनएमबिको वितरणयोग्य नाफा २४ करोड छ जसअनुसार बैंकको लाभांश क्षमता १.३ प्रतिशत हुन आउँछ । बैंकले २ खर्ब २४ अर्ब रुपैयाँ निक्षेप परिचालन गरी १ खर्ब ९४ अर्ब रुपैयाँ कर्जा प्रवाह गरेको छ ।
१८ अर्ब ३६ करोड रुपैयाँ चुक्तापुँजी रहेको बैंकको जगेडामा गत आवभन्दा १७ प्रतिशत बढी अर्थात् १० अर्ब ४६ करोड रुपैयाँ छ ।
बैंकको प्रतिसेयर आम्दानी १२.७२ रुपैयाँ, नेटवर्थ १५८.२७ रुपैयाँ, निष्क्रिय कर्जाको अनुपात ३.२७ प्रतिशत, पीई रेसियो १७.१४ र सीडी रेसियो ८३.९१ प्रतिशत छ ।

काठमाडौं । शेयर बजारमा आज सोमबार पनि उछाल आएको छ । बजार उच्च अंकले उचालिएर २८ सय अंक नजिक पुगेको छ भने पौने २१ अर्बको कारोबार भएको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार ४०.७६ अंकले बढेको हो । १.४७ प्रतिशतले बजार बढेसँगै नेप्से परिसूचक २७९६.३८ अंकमा उक्लिएको छ ।
समग्रमा बजारमा उछाल देखिएपछि बैंकिङ, विकास बैंक, वित्त, उत्पादनमूलक, लघुवित्त र म्युचुअव फण्ड भने राताम्मे भएका छन् ।
बैंक तथा वित्तीय संस्थाहरुको आज प्रकाशित चौथो त्रैमासको वित्तीय विवरणमा अधिकांशको नाफा घटेपछि त्यसको असरसमेत बजारमा देखिएको छ । आज होटल समूह सबैभन्दा बढी ६.६९ प्रतिशतले बढेको छ ।
आज ३२६ कम्पनीका ४ करोड ९७ लाख ७३ हजार ७ सय ३० कित्ता शेयर किनबेच हुँदा २१ अर्ब ८६ करोड ४९ लाख ९२ हजार २ सय ७७.६४ रुपियाँ बराबरको कारोबार भएको छ ।
आज विभिन्न १३ कम्पनीका लगानीकर्ताहरुले ९ प्रतिशत बढी नाफा कमाएका छन् । रुरु जलविद्युत, सीईडीबी हाइड्रो, सगरमाथा जलविद्युत, कुथेली बुखरी, भगवती हाइड्रो, माथिल्लो मैलुङ खोला, भिजन लुम्बिनी उर्जा र मुक्तिनाथ कृषि कम्पनीको शेयर मूल्य १०–१० प्रतिशतले बढेको हो ।
सिटी होटल, माउन्टेन हाइड्रो, हाथवे, रावा इनर्जी र हिमालयन रि–इन्स्योरेन्सको शेयरमूल्य क्रमशः ९.९९, ९.९७, ९.९४, ९.८७ र ९.७४ प्रतिशतले नाफा कमाएका छन् ।
त्यस्तै नेपाल फाइनान्स लिमिटेडमा आज नेगेटिभ सर्किट लागेको छ । उक्त कम्पनीको शेयरमूल्य १० प्रतिशतले घटेको हो ।
आज हिमालयन रि–इन्स्योरेन्सको उच्च कारोबार भएको छ । उक्त कम्पनीको १ अर्ब २६ करोड ४ लाख रुपियाँको शेयर किनबेच भएको नेप्सेले जानकारी दिएको छ ।

काठमाडौं । ग्लोबल आईएमई बैंक लिमिटेडको नाफा अघिल्लो आर्थिक वर्ष २०७९, ०८० को तुलनामा गत आव २०८०, ८१ मा सामान्य घटेको छ ।
गत आवको चौथौ त्रैमास अर्थात् असार मसान्तसम्म बैंकले ६ अर्ब १ करोड रुपियाँ खुद नाफा कमाएको छ । यो अघिल्लो आवको तुलनामा १०.१३ प्रतिशतले कम हो । अघिल्लो आवमा बैंकले ६ अर्ब ६९ करोड रुपियाँ खुद नाफा कमाएको थियो ।
समीक्षा अवधिमा बैंकले १६ अर्ब ६३ करोड रुपियाँ खुद ब्याज आम्दानी गरेको छ । अघिल्लो आवमा बैंकले १७ अर्ब १० करोड रुपियाँ ब्याज आम्दानी गरेको थियो ।
त्यस्तै, बैंकले यस अवधिमा २ अर्ब ६७ करोड रुपियाँ खुद फी तथा कमिशन आम्दानी गरेको छ । अघिल्लो आवको तुलनामा गत आवमा यो २९.९० प्रतिशतले बढेको छ । अघिल्लो आवमा बैंकले २ अर्ब ६ करोड रुपियाँ आम्दानी गरेको थियो ।
त्यस्तै, गत आवको असार मसान्तसम्म बैंकको कुल सञ्चालन आम्दानी २.९६ प्रतिशत बढेर २० अर्ब ४४ करोड रुपियाँ छ भने सञ्चालन मुनाफा ८.२५ प्रतिशत घट्दा ८ अर्ब ७४ करोड रुपियाँमा सीमित हुन पुगेको छ ।
समीक्षा अवधिमा बैंकको खराब कर्जा ३.१५ प्रतिशतबाट बढेर ४.३७ प्रतिशत पुगेको छ ।
नाफासँगै बैंकको प्रतिशेयर आम्दानी पनि घटेको छ । गत आवको चौथो त्रैमाससम्म बैंकको प्रतिशेयर आम्दानी २.६ पैसा घटेर १६.६५ रुपियाँ, प्रतिशेयर नेटवर्थ १६९.८१ रुपियाँ, मूल्य आम्दानी अनुपात ११.६६ गुणा र बैंकको वितरणयोग्य मुनाफा १ अर्ब १० करोड रुपियाँ रहेको छ ।
३६ अर्ब १२ करोड रुपियाँ चुक्ता पुँजी रहेको बैंकको जगेडा कोषमा २४ अर्ब ८५ करोड रुपियाँ सञ्चित छ । समीक्षा अवधिमा बैंकको निक्षेप १४.३४ प्रतिशत बढेको छ भने कर्जा ४.२३ प्रतिशत बढेको छ ।

काठमाडौं । नबिल बैंकले गएको आर्थिक वर्षमा सात अर्ब छ करोड रुपियाँ खुद नाफा कमाएको छ जुन समग्र बैंकिङ क्षेत्रमा उच्च हो ।
बैंकले सार्वजनिक गरेको गत आवको अपरिष्कृत वित्तीय विवरणअनुसार खुद नाफा अघिल्लो आर्थिक वर्षको सोही अवधिको तुलनामा सामान्य बढेको हो । बैंकले यो अघिल्लो आर्थिक वर्षको सोही अवधिको तुलनामा १०.२३ प्रतिशतले खुद नाफा बढाएको छ । अघिल्लो आर्थिक वर्षको सोही अवधिसम्ममा बैंकले छ अर्ब ४० करोड रुपियाँ खुद नाफा कमाएको थियो।
नविलको खुद ब्याज आम्दानीमा सामान्य गिरावट आएको छ । तर इम्पेरमेन्ट चार्ज घटेका कारण खुद नाफा बढ्न पुगेको हो । बैंकको खुद ब्याज आम्दानी ८.६९ प्रतिशतले घटेको हो । तर खुद फि तथा कमिशन आम्दानी १२.०४ प्रतिशतले बढेको छ ।
समीक्षा अवधिमा बैंकको कुल सञ्चालन आम्दानी ६.०२ प्रतिशत घटेको छ भने सञ्चालन मुनाफा ६.५१ प्रतिशत बढेको छ । त्यस्तै, खराब कर्जा १.१८ प्रतिशतबाट घटेर १.०७ प्रतिशतमा झरेको छ ।
यससँगै बैंकको प्रतिशेयर आम्दानी पनि बढेको छ । गएको आवमा नविलको यस्तो आम्दानी दुई रुपियाँ ४२ पैसा बढेर २६ रुपियाँ ९ पैसा पुगेको छ । गएको असार मसान्तसम्ममा बैंकको प्रतिशेयर नेटवर्थ २२० रुपियाँ १६ पैसा र मूल्य आम्दानी अनुपात २०.०८ गुणा रहेको छ। सो अवधिसम्ममा बैंकको वितरणयोग्य मुनाफा भने तीन अर्ब ८५ करोड रुपियाँ रहेको छ।
जगेडा कोषमा साढे ३२ अर्बभन्दा बढी रकम रहेको नविलको चुक्ता पुँजी २७ अर्ब पाँच करोड रुपियाँ छ । बैंकको निक्षेप गत आवमा १६.४४ प्रतिशत बढेको छ भने कर्जा १२.९४ प्रतिशत बढेको छ।

काठमाडौं । गत आर्थिक वर्ष २०८०,०८१ को चौथो त्रैमास अर्थात् असार मसान्तसम्ममा प्रभु बैंकको खुद नाफा उल्लेख्य मात्रामा बढेको छ ।
समीक्षा अवधिमा बैंकले ४ अर्ब ४८ करोड रुपियाँ खुद नाफा कमाएको छ । यो अघिल्लो आवको सोही अवधिको तुलनामा १४९९.०४ प्रतिशतले बढी हो । बैंकले अघिल्लो आवमा खुद नाफा २८ करोड कमाएको थियो ।
समीक्षा अवधिमा बैंकको खुद ब्याज आम्दानी १९.४३ प्रतिशतले बढेको छ भने खुद फी तथा कमिसन आम्दानी १९.९६ प्रतिशत र कुल सञ्चालन आम्दानी २०.६७ प्रतिशतले बढेको छ।
असार मसान्तसम्म बैंकको प्रतिशेयर आम्दानी पनि उल्लेख्य बढेको छ । यस अवधिमा बैंकको यस्तो आम्दानी १७.८४ पैसा बढेको छ भने वितरणयोग्य मुनाफा १ अर्ब २२ करोड रुपियाँ रहेको छ।
२३ अर्ब ५४ करोड रुपियाँ चुक्ता पुँजी रहेको बैंकको जगेडा कोषमा १२ अर्ब ८९ करोड रुपियाँ सञ्चित छ । समीक्षा अवधिमा बैंकको निक्षेप ५.५१ प्रतिशतले बढेको छ भने कर्जा ३.८३ प्रतिशत घटेको छ वित्तीय विवरणमा उल्लेख छ ।