काठमाण्डौं । प्रणय दिवसको दिन पारेर आगामी फागुन २ गतेबाट प्रदर्शनमा आउने तयारीमा रहेको चलचित्र ‘दुःखी आत्मा’को टिजर र ‘ब्रेकअप कविता’ले चर्चा पाइरहँदा पहिलो गीतको रुपमा मंगलबार ‘जुनीजुनी भरिलाई’ सार्वजनिक गरिएको छ । रोमान्टिक भावको गीतमा केतन क्षेत्री र मुना ठटालको पार्श्व गायन छ भने इश्वर कार्कीको शब्द रचना तथा संगीत छ । उदयराज पौडेलले एरेञ्ज गरेका हुन् ।
सार्वजनिक गीतको भिडियोमा फिल्मका मुख्य अभिनेता दयाहाङ राई र अभिनेत्री आँचल शर्मा चित्रित छन् । गीतले उनीहरुको प्रेमभाव बोल्छ । तीन फरक फरक ठाउँमा खिचिएको गीतलाई झकिझकाउ देखाउन सुन्तला, फूल, छाता, ढकी जस्ता प्रप्सहरु ठूलो संख्यामा प्रयोग गरिएको छ भने कोरस पनि उल्लेख्य छन् । भिडियोका कोरियोग्राफर रामजी लामिछाने हुन् ।
चलचित्रको लेखन तथा निर्देशन दीपेन्द्र लामाले गरेका हुन् । यो उनको छैठौँ निर्देशित चलचित्र हो । यसअघि उनले ‘घामपानी’, ‘गोपी’, ‘दुई नम्बरी’, ‘छ माया छपक्कै’ र ‘नाङ्गो गाउँ’ निर्देशन गरिसकेका छन् । रोचक कुरा के छ भने ‘गोपी’ र ‘छ माया छपक्कै’बाहेक उनका अन्य चलचित्रमा दयाहाङ छुटेका छैनन् । दयाहाङसँग उनको सहकार्य फापेको पनि छ ।
‘दुःखी आत्मा’लाई हिमाल कडरियाले निर्माण गरेका हुन् । यसमा दयाहाङ र आँचलसहित अनुप विक्रम शाही, वुद्दि तामाङ, रेयर राई, पुष्कर गुरुङ, कविता आले, अशान्त शर्मा, लोकेन्द्र लेखक, आरती आचार्य लगायतको अभिनय छ । सुदीप बराल कार्यकारी निर्माता रहेको चलचित्रमा आलोक शुक्लाको छायांकन छ भने निमेष श्रेष्ठको सम्पादन छ । चलचित्रलाई ‘एडल्ट ड्रामा’ भनिएको छ ।
