काठमाडौँ । प्रधानमन्त्री केपी शर्मा ओलीले आफूहरूले परिपूर्ण डेमोक्रेसी चाहेको जनाएका छन् । बिहीबार काठमाडौँमा भएको डिजिटल अपराधसम्बन्धी अन्तर्राष्ट्रिय सम्मेलनलाई सम्बोधन गर्दै प्रधानमन्त्री ओलीले राजनीतिक परिवर्तन भए पनि त्यसले मात्र मानिस सुखी र खुसी हुन नसक्ने भएकाले परिपूर्ण डेमोक्रेसीले मात्र मानव खुसी र सुखी बन्न सक्ने जनाएका हुन् ।
उनले मानिसलाई खुसी हुन नदिने तत्त्व अपराध एक रहेको भन्दै प्रधानमन्त्री ओलीले मानव जाति अझै पनि अभाव र भोकमरीमा तड्पिरहनुपरेको जनाए । ‘मानिस अभाव र भोकमरीमा तड्पिरहेको छ भने अरू कुराले मात्र सुखी हुन सक्दैन’, प्रधानमन्त्री ओलीले भने– ‘हामी परिपूर्ण डेमोक्रेसी चाहान्छौ । सामाजिक क्षेत्रका जीवन उन्नत र सम्पन्न हुनुपर्छ । जैविक र मानवीय आवश्यकताको सहज आपूर्तिको परिपाटी हुनुपर्छ र मात्र समाजलाई समृद्ध, सन्तुष्ट र खुसी राख्न सक्छौँ ।’
साइन्स एन्ड टेक्नोलोजीले मानव जातीलाई सुख सुविधा दिने भए पनि यसको दुरुपयोगबाट अपराध समेत हुनसक्ने भएकाले त्यसतर्फ सचेत हुन जरुरी रहेको प्रधानमन्त्रीको भनाइ छ ।
उनले बेथितिबाट राम्रा काम प्राप्त गर्न नसकिने भएकाले थिति बसालेर राम्रा काम गर्न सक्नुपर्नेमा जोड दिए ।
‘समाजमा ठुलो परिवर्तन आएको छ । राजनीतिक परिवर्तन र अरू स्वतन्त्रताका हकको मात्र होइन । हामी हरेक हिसाबले अधिकार सम्पन्न हुन चाहन्छौँ’, प्रधानमन्त्रीले भने, ‘सामाजिक प्रबन्धहरू यसरी गइरहेको छ अझै पनि डिजिटलको कुरा गरिरहेका छौँ तर त्यसैबैला उल्लेखनीय प्रतिशत मानवजाति निरपेक्ष गरिबीको रेखामुखी छ ।’
प्रधानमन्त्री ओलीले सामाजिक सञ्जाल प्रयोगकर्ताको अधिकार एक सेन्टिमिटर पनि तलमाथि नहुने गरी सामाजिक सञ्जालको नियमन गर्ने तयारीमा सरकार रहेको दाबी गरे । तर उनले असामाजिक कुरा रोक्नै पर्ने प्रधानमन्त्रीको भनाइ छ । ‘यस्तो कुरा रोक्नुपर्छ भन्दा डिबेट गर्ने नै होइन, त्यो विरोधका लागि विरोध मात्र हो’, प्रधानमन्त्रीको भनाई छ ।

काठमाण्डौं । नेकपा एमालेका महासचिव शंकर पोखरेलले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’मा तीव्र निराशा र छटपटाहट देखिएको टिप्पणी गरेका छन् ।
बुधबार साँझ सामाजिक सञ्जाल फेसबूकमा लेख्दै महासचिव पोखरेलले माओवादीले जनादेश गुमाउँदै जाँदा प्रचण्डमा निराशा देखिएको टिप्पणी गरे ।
‘वास्तवमा सरकारको नेतृत्वमा रहँदा प्रचण्डले अवलम्बन गरेको अस्थिर र स्वार्थपरक नीति तथा द्वैध चरित्रका कारणले माओवादी आन्दोलनले कार्यकर्ताको विश्वास र जनताको जनादेश गुमाउन पुगेको हो । यो क्रम निरन्तर जारी छ । त्यसको हेक्का भएर नै प्रचण्डमा यतिबेला तीव्र निराशा र छटपटाहट देखिन थालेको छ,’ उनले लेखेका छन् ।
नेकपा एमाले र नेपाली कांग्रेसको सहयोगमा सत्ता समीकरणको कथित म्याजिक नम्बर पाउन सफल माओवादी अध्यक्ष प्रचण्डले ती दलहरूको सहयोग नपाउने भएपछि आफ्नो सहयोगमा ती दल ठूला भएको हास्यास्पद दावी गरेको उनको टिप्पणी छ ।
उनले लेखेका छन्, ‘साँच्चै नेपालको राजनीतिलाई विकास र समृद्धिका लागि राजनीतिक अस्थिरताको दुश्चक्रबाट मुलुकलाई बाहिर निकाल्ने हो राजनीतिक ध्रुवीकरणको बाटोमा जानु आवश्यक छ । त्यसका लागि अब आउने चुनावमा सबै राजनीतिक दलले आफ्नो नीति तथा कार्यक्रमका आधारमा जनतामा जाने आँट गर्नु पर्दछ । यस्तो भएमा कथित म्याजिक नम्बरको नाममा साना दलले ठूला दलहरूमाथि शासन गर्ने स्थित अन्त्य हुनेछ ।’
अध्यक्ष प्रचण्डले माओवादीको सहयोगमा अन्य दलहरू ठूला दलहरू बनेको दाबी गरेपछि महासचिव पोखरेलको टिप्पणी आएको हो ।

काठमाडौं । नेपाली काङ्ग्रेसका सभापति शेरबहादुर देउवा भोलि भारत जाने भएका छन्।
उत्तर प्रदेशको प्रयागराजमा आयोजित ‘कुम्भ ग्लोबल समिट अन डेभलपमेन्ट एण्ड सस्टेनेबिलिटी’ कार्यक्रममा सहभागी हुन जान लागेका जनाईएको छ ।
कार्यक्रममा उनले सम्बोधन गर्ने कार्यक्रम तय भएको हो ।