काठमाडौँ । प्रतिनिधि सभा बैठक बस्दैछ । दिउँसो १ बजे बस्ने बैठकमा प्रधानमन्त्री केपी शर्मा ओलीले ‘राष्ट्रिय सुरक्षा परिषदको छैटौँ वार्षिक प्रतिवेदन (आ.व. २०७९, २०८०) र सातौँ वार्षिक प्रतिवेदन (आ.व २०८०, २०८१)’ पेस गर्ने कार्यसूची रहेको छ ।
त्यस्तै सभामुख देवराज घिमिरेले नेपाल नागरिकता ऐन (दोस्रो संशोधन) विधेयक, २०८१ माथि सामान्य छलफल गरियोस् भन्ने प्रस्तावलाई निर्णयार्थ प्रस्तुत गर्ने कार्यसूची छ ।
आइतबार गणपूरक नपुगेपछि उक्त प्रस्ताव निर्णयार्थ प्रस्तुत नगरी संसद् बैठक स्थगित भएको थियो । आजकै बैठकमा गृहमन्त्री रमेश लेखकले ‘नेपाल प्रहरी विधेयक,२०८१’ माथि सामान्य छलफल गरियोस्’ भन्ने प्रस्ताव प्रस्तुत गर्नेछन् ।
चौथो कार्यसूचीमा ‘राज्य व्यवस्था तथा सुशासन समितिको प्रतिवेदन सहितको राष्ट्रिय सभामा उत्पत्ति भएको भ्रष्टाचार निवारण (पहिलो संशोधन) विधेयक, २०७७ माथि छलफल गरियोस्’ भनी प्रधानमन्त्री केपी शर्मा ओलीले प्रस्ताव प्रस्तुत गर्ने कार्यसूची छ ।
त्यस्तै प्रधानमन्त्री ओलीले नै ‘भ्रष्टाचार निवारण (पहिलो संशोधन) विधेयक, २०८१ लाई पारित गरियोस्’ भनी प्रस्ताव प्रस्तुत गर्नेछन् ।
त्यसैगरी श्रम, रोजगार तथा सामाजिक सुरक्षामन्त्री शरतसिंह भण्डारीले ‘अन्तर्राष्ट्रिय श्रम संगठनको अन्तर्राष्ट्रिय श्रम सम्मेलनले स्वीकृत गरेका नयाँ अन्तर्राष्ट्रिय श्रम मापदण्डहरूको संयन्त्रहरू (महासन्धी, प्रोटोकल र सिफारिस) सम्बन्धी प्रतिवेदन’ पेस गर्ने कार्यसूची रहेको संसद सचिवालयले जानकारी दिएको छ ।

काठमाडौं । गणपुरक संख्या (कोरम) नपुगेपछि प्रतिनिधि सभाको बैठक स्थगित भएको छ ।
तीन मिनेट घण्टी बजाएर सांसद संख्या गन्दा ६८ जना सांसद मात्रै उपस्थित थिए ।
२७५ सदस्यीय प्रतिनिधि सभामा कोरमका लागि कम्तीमा ६९ सांसद आवश्यक हुन्छ । एक जना सांसदले कोरम नपुग्दा संसद् बैठक स्थगित भएको हो ।
अर्को बैठक सोमबार दिउासो १ बजेका लागि बोलाइएको छ ।
प्रतिनिधि सभाको बैठकमा राष्ट्रिय स्वतन्त्र पार्टी (रास्वपा) की सांसद निशा डाँगीले गणपुरक संख्या यकिन गर्न माग गरेकी थिइन् ।
नागरिक ऐन संशोधन विधेयकमाथि छलफल गरेपछि संसदमा सभामुख देवराज घिमिरेले विधेयकमाथि छलफल गरियोस् भन्ने प्रस्ताव निर्णयार्थ प्रस्तुत गर्न खोज्दा सांसद डाँगीले गणपुरक संख्या माग गरेकी हुन् ।
नेपालको संविधानको धारा ९४ मा संसद्मा कुनै पनि विधेयक वा प्रतिवेदन वा कुनै प्रस्ताव प्रस्तुत गर्न एक चौथाइ सदस्य उपस्थित रहेको हुनुपर्ने व्यवस्था छ । यही व्यवस्था अनुसार सांसद संख्या यकिन गर्न सांसद डाँगीले माग गरेकी थिइन् ।
कोरमको प्रश्न उठेपछि सभामुख घिमिरेले यकिन गर्न निर्देशन दिए । संसद सचिवालयले गणना गर्दा सभामा ६८ जना मात्रै सांसद रहेको थाहा लाग्यो । त्यसपछि प्रतिनिधि सभाको बैठक अगाडि बढ्न सकेन ।