काठमाडौँ । शाखारहित बैंकिङ्ग प्रणाली स्थानान्तरण कार्यका कारण सिद्धार्थ बैंकको शाखारहित बैंकिङ्ग सेवा २०८१ साल फागुन २३ गते शुक्रबार राति ८ बजेदेखि २०८१ साल फागुन २४ गते शनिबार बिहान ८ बजेसम्म अस्थायी रूपमा अवरुद्ध हुने भएको छ।
बैंकले एक सूचना जारी गर्दै सेवा स्थगनबारे पूर्व जानकारी गराउँदै सम्बन्धित ग्राहकहरूलाई आवश्यक पूर्व तयारी गर्न अनुरोध गरेको छ। साथै, सेवा अवरुद्ध हुने अवधिमा पर्न सक्ने असुविधाप्रति क्षमायाचना गर्दै प्रविधिगत कार्य सम्पन्न भएपछि सेवा पूर्ववत सञ्चालनमा आउने बैंकले जनाएको छ।

काठमाडौँ । ग्लोबल आइएमई बैंक लिमिटेडले साना तथा मझौला उद्यमी, विशेष गरी महिला उद्यमीलाई लक्षित गर्दै ‘ग्लोबल म उद्यमी कर्जा’ योजना सार्वजनिक गरेको छ। रोजगार प्रवर्द्धन, सामाजिक विकास तथा स्थानीय समुदायको आर्थिक सशक्तीकरणलाई समर्थन गर्ने उद्देश्यसहित बैंकले आकर्षक सुविधासहित यो कर्जा योजना ल्याएको हो।
महिलाहरूलाई उद्यमशील बनाउने उद्देश्यले ल्याइएको यस योजनाअन्तर्गत कृषि, उत्पादन, प्रशोधन तथा बजारीकरणमा संलग्न घरेलु, साना तथा मझौला उद्योगलाई विशेष प्राथमिकता दिइनेछ। बैंकले न्यूनतम ब्याजदरमा अधिकतम १० करोड रुपैयाँसम्मको कर्जा प्रदान गर्नेछ। महिलाहरूको कम्तीमा ५० प्रतिशत स्वामित्वमा रहेका व्यवसायहरूले मात्र यो कर्जा सुविधा लिन सक्नेछन्। कर्जा लिने उद्यमीहरूलाई बैंकले डिजिटल उपहार समेत प्रदान गर्ने जनाएको छ।
ग्लोबल आइएमई बैंकले हालै ‘ग्लोबल फाइनान्सको बेस्ट बैंक अवार्ड २०२४’ तथा ‘युरो मनी अवार्ड फर एक्सलेन्स २०२४’ प्राप्त गर्दै नेपालको सर्वश्रेष्ठ बैंकको रूपमा मान्यता पाएको छ। विभिन्न राष्ट्रिय तथा अन्तर्राष्ट्रिय संस्थाहरूबाट समेत सम्मानित बैंकका रूपमा स्थापित यस वित्तीय संस्थाले देशभर ७७ वटै जिल्लामा आफ्नो शाखा सञ्जाल विस्तार गरिसकेको छ। बैंकका ३५५ शाखा कार्यालय, ३८५ एटीएम, २३७ शाखारहित बैंकिङ सेवा, ६७ एक्सटेन्सन तथा राजस्व संकलन काउन्टर र ३ विदेशस्थित प्रतिनिधि कार्यालयहरूमार्फत सेवा प्रदान गरिरहेको छ।
बैंकले देशभरका ग्राहकहरूलाई बैंकिङ सेवा उपलब्ध गराउनुका साथै संयुक्त राज्य अमेरिका, बेलायत, क्यानडा, अष्ट्रेलिया, मलेसिया, दक्षिण कोरिया, जापान, साउदी अरब, कतार, यूएई, बहराइन, कुवेत, भारत, जोर्डनलगायतका मुलुकहरूबाट रेमिट्यान्स सेवा पनि प्रदान गर्दै आएको छ।

काठमाडौँ । नेशनल लाईफ इन्स्यारेन्स कम्पनी लिमिटेडले सप्ताहव्यापी रुपमा विभिन्न कार्यक्रम गरेर आफ्नो ३८औं वार्षिकोत्सव मनाएको छ ।
कम्पनीले ३८ औं वर्षगाँठका अवसरमा कम्पनीमा आवद्ध बीमित, अभिकर्ता एवं कर्मचारीवर्ग र शुभेच्छुकहरुप्रति आभार व्यक्त गर्नुका साथै सामाजिक उत्तरदायित्व अन्तर्गत मातृ नेपाल बालगुह तारकेश्वरलाई आर्थिक सहयोग गर्‍यो भने त्यहाँ रहेका बाल बालिकाहरुलाई खाना खवाउनुका साथै रक्तदान कार्यक्रम गरेको थियो ।
प्रमुख कार्यकारी अधिकृत सुरेश प्रसाद खत्रीका अनुसार वार्षिकोत्सवको अवसरमा कम्पनीको देशैभर रहेका प्रदेश तथा शाखा कार्यालयले समेत वृद्धाश्रम, बाल कल्याण संस्था एवं मानव सेवा आश्रम जस्ता संस्थामा यस प्रकारका कार्यक्रम गरेका छन् ।