काठमाडौं । नेपाल इन्स्योरेन्स कम्पनी लिमिटेडको अध्यक्षमा चन्द्र सिंह साउद चयन भएका छन् ।
सञ्चालक समितिको हिजो बसेको बैठकले साउदलाई सर्वसम्मतीबाट अध्यक्षमा चयन गरेको कम्पनी सचिव सुलना श्रेष्ठले जनाएकी छिन् ।
साउद नेपाल स्टक एक्सचेञ्ज लिमिटेडका पूर्व सीईओ हुन् ।
कम्पनीको अन्य सञ्चालकहरुमा सविता श्रेष्ठ जोशी, निशान्त जोगाईं, वीरविक्रम रायमाझी, साजल मास्के र समता पन्त पन्त रहेका छन् ।

काठमाडौं । ट्रेड टावर लिमिटेडले यही जेठ १४ गते बुधबारदेखि जेठ १९ गते सोमबारसम्म सर्वसाधारणका लागि आईपीओ बिक्री खुला गर्ने भएको छ ।
कम्पनीले आफ्नो जारी पूँजी ८१ करोड ५६ लाख ९ हजार ७०० को रुपियाँको ४८.६९६ प्रतिशतले हुन आउने ३९ लाख ७१ हजार ६९३ कित्ता आईपीओ निष्काशन गर्न अनुमति पाएको थियो ।
जसमध्येबाट पहिलो चरणमा प्रतिकित्ता १०० रुपियाँका दरले ३ लाख ९७ हजार १६९.३० कित्ता शेयर वैदेशिक रोजगारीमा गएका नेपालीहरूका लागि, १ लाख ९८ हजार ५८४.६५ कित्ता सामूहिक लगानी कोषलाई र ७९ हजार ४३३.८६ कित्ता कम्पनीका कर्मचारीमा बाँडफाँट गरिसकेको छ ।
यसरी बाँकी रहेको ३२ लाख ९६ हजार ५०५.१९ कित्ता शेयर सर्वसाधारणका लागि निष्काशन गर्न लागेको बिक्री प्रबन्धक लक्ष्मी सनराइज (एलएस) क्यापिटल लिमिटेडले जनाएको छ ।
उक्त शेयर ३ लाख २९ हजार ६ सय ५० जनाले १०–१० कित्ताका दरले पाउने छन् ।

काठमाडौं । सान्भी इनर्जी लिमिटेडले जेठ ९ गते शुक्रबारदेखि सर्वसाधारणका लागि निष्काशन खुला गरेको आईपीओमा आवेदन दिने १३ गते मंगलबार अन्तिम दिन हो ।
इच्छुक लगानीकर्ताहरुले मंगलबार बैंकिङ समयभित्र आवेदन दिन पाउने छन् । उक्त कमपनीको शेयर २ लाख ४१ हजार ५ सय ३० जनाले १०–१० कित्ताका दरले पाउने छन् ।
कम्पनीले प्रतिकित्ता १०० सय अंकित दरका ३७ लाख ९० हजार कित्ता शेयर निष्कासन गर्न नेपाल धितोपत्र बोर्डबाट स्वीकृति पाएको थियो । जसमध्ये ८ लाख ८० हजार कित्ता आयोजना प्रभावितका लागि र २ लाख ९१ हजार कित्ता वैदेशिक रोजगारीमा रहेका नेपालीहरूका लागि निष्कासन गरी बाँडफाँट गरिसकेको छ ।
जसमध्ये बाँकी रहेको २६ लाख १९ हजार कित्तामध्ये १ लाख ४५ हजार ५०० कित्ता सामूहिक लगानी कोष र ५८ हजार २०० कित्ता कर्मचारीलाई छुट्याएर बाँकी २४ लाख १५ हजार ३०० कित्ता सर्वसाधारणका लागि निष्काशन गरेको बिक्री प्रबन्धकमा नेपाल एसबीआई मर्चेण्ट बैंकिङ लिमिटेडले जनाएको छ ।

काठमाण्डौं । मंगलबार अर्थमन्त्री विष्णु पौडेलले संसदमा आर्थिक सर्वेक्षण पेस गर्ने भएका छन्।
बजेटको पूर्वसन्ध्यामा पेस गरिने आर्थिक सर्वेक्षण प्रतिनिधिसभाको ११ बजे सुरु हुने बैठकमा पेस हुने भएको हो।
संसद् सचिवालयले सार्वजनिक गरेको कार्यसूचीअनुसार ऊर्जा, वन र पर्यटनमन्त्रीको प्रश्नोत्तर सकिएसँगै आर्थिक सर्वेक्षण पेस हुनेछ।
आर्थिक सर्वेक्षणले २०८१, ०८२ को आर्थिक गतिविधिको विषयमा जानकारी दिनेछ। सम्पूर्ण सरकारी कार्यालयहरुको आधिकारिक तथ्यांकसहितको आर्थिक सर्वेक्षण जारी हुनेछ। सरकारले सर्वेक्षणलाई आधार बनाई बजेट निर्माण गर्छ।
जेठ १५ गते बजेट आउनुअघि आर्थिक सर्वेक्षणसँगै सार्वजनिक संस्थानहरुको वास्तविक अवस्था पनि सार्वजनिक हुन्छ। जसमा आम्दानी, नाफा, घाटाको विषय उल्लेख हुन्छ।