काठमाडौं । रुपन्देहीमा सञ्चालित चारवटा उद्योगले डेडिकेटेड तथा ट्रङ्क लाइनबाट विद्युत् उपभोग गरेको बिजुलीको महसुल तिरेका छन् । नेपाल विद्युत प्राधिकरणले दिएको जानकारीअनुसार सोमबार ती उद्योगहरूले प्रिमियममा महसुलको बक्यौता तिरेका छन् । प्राधिकरणले किस्तामा महसुल दिन पाउने व्यवस्था गरेको थियो । सोहीअनुसार ती उद्योगले पहिलो किस्ताबापतको रकम तिरेका हुन् ।
प्राधिकरणका कार्यकारी निर्देशक मनोज सिलवालका अनुसार भैरहवा क्षेत्रमा सञ्चालित पञ्चकन्या प्लाष्टिक उद्योग, पञ्चकन्या स्टिल इण्डष्ट्रिज, सिद्धार्थ पेटप्लान्ट र प्लास्टिकले बक्यौताको पहिलो किस्ताबापतको रकम तिरेका हुन् । पहिलो किस्ताको पैसा तिरेसँगै उनीहरुको उद्योगमा विच्छेद गरिएको विद्युत् लाइन जडान गरिएको छ ।
ती उद्योगले विसं २०७२ माघदेखि २०७५ वैशाखसम्ममा डेडिकेटेड तथा ट्रङ्क लाइन प्रयोगवापतको प्रिमियम महसुलको पहिलो किस्ता बुझाएका कार्यकारी निर्देशक सिलवालले बताए । प्राधिकरणका अनुसार पञ्चकन्या प्लाष्टिकको रु २४ लाख ६३ हजार, पञ्चकन्या स्टिलको रु ५२ लाख १९ हजार, सिद्धार्थ पेटप्लान्टको रु एक करोड ८३ लाख र श्याम प्लास्टिकको रु ४९ लाख १० हजार बक्यौता रहेको छ । बक्यौतालाई २८ किस्तामा विभाजन गरी उद्योगले पहिलो किस्ता तिरेका छन् ।
यसअघि प्राधिकरणको कार्यकारी निर्देशक रहेका कुलमान घिसिङले बिलविना नै महसुल उठाउन लागेको भन्दै व्यवसायीहरुले गुनासो गरेपछि अघिल्लो सरकारको पालामा महसुलको विषय रोकिएको थियो । पछि जेनजी आन्दोलनपछि बनेको नयाँ सरकारमा तिनै घिसिङ ऊर्जामन्त्री बनेर आएपछि तत्कालीन कार्यकारी निर्देशक हितेन्द्रदेव शाक्यलाई हटाएर डेडिकेटेड लाइनको महसुल उठाउनेतिर आक्रामक रूपमा लाग्दै आएका छन् । आन्दोलनले थलिएको निजी क्षेत्रलाई हौसला दिनुपर्नेमा झनै हतोत्साहित गरेको भन्दै घिसिङको विरोध पनि भइरहेको छ ।
उर्जामन्त्री कुलमान घिसिङको निर्देशनमा नेपाल विद्युत् प्राधिकरणले २५ वटा उद्योगमा लाइन काटेको निकै दिन भएसँगै लाइन जोड्न दबाब बढेपछि निकास खोज्न प्रधानमन्त्री तथा मन्त्रिपरिषद् कार्यालयले सोमबार नेपाल उद्योग वाणिज्य महासंघका अध्यक्ष चन्द्र ढकाललाई छलफलका लागि बोलाएको थियो ।

काठमाडौं । सानिमा बैंकले बैंक खातामा राष्ट्रिय परिचय पत्र र स्थायी लेखा नम्बर अद्यावधिक गर्न आग्रह गरेको छ ।
मंगलबार एक सूचना जारी गर्दै बैंकले आफ्नो पायक पर्ने शाखामा गएर मोबाइल नम्बर पनि अद्यावधिक भएको छ भने त्यसको समेत जानकारी दिन आग्रह गरेको छ ।
बैंकले नेपाल राष्ट्र बैंकले हरेक खातावालको खातालाई राष्ट्रिय परिचयपत्र र प्यानसँग अनिवार्य जोड्न दिएको निर्देशनबमोजिम व्यक्तिले समेत यी विवरण खातामा अद्यावधिक गर्न आग्रह गरेको हो ।

काठमाडौं । नेपाल सरकारद्वारा स्थापित भौतिक पूर्वाधार पुनर्निर्माण कोषमा बीमा क्षेत्रबाट थप आर्थिक सहयोग जुटाइएको छ। नेशनल लाइफ इन्स्योरेन्स कम्पनी लिमिटेडले एक करोड रुपैयाँ चेक मंगलबार अर्थ मन्त्रालयमा हस्तान्तरण गरेका छन्।
नेशनल लाइफको तर्फबाट प्रमुख कार्यकारी अधिकृत सुरेश प्रसाद खत्रीले उक्त रकम अर्थमन्त्री रामेश्वर खनाललाई हस्तान्तरण गरेका हुन्।
हालसम्म कोषमा जम्मा संकलन रकम सात करोड ५१ लाख पुगेको मन्त्रालयले जनाएको छ।
सरकारले भौतिक संरचनाको पुनर्निर्माणलाई गति दिन उक्त कोष स्थापना गरेको हो। बीमा कम्पनीहरूबाट प्राप्त भएको सहयोगले पुनर्निर्माण प्रयासमा थप योगदान पुग्ने विश्वास लिइएको छ।

काठमाडौं । शेयर बजार आज पनि घटेको छ । कारोबार रकम ५ अर्बमा समेटिएको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार २७.६४ अंकले घटेको हो । १.०५ प्रतिशतले बजार घट्दा नेप्से परिसूचक २५९५२४ अंकमा झरेको छ ।
बजार घटेसँगै आज सबै समूह राताम्मे भएका छन् । फाइनान्स समूह सबैभन्दा बढी २.२१ प्रतिशतले घटेको छ ।
आज ३२२ कम्पनीका १ करोड ३ लाख ४३ हजार ८ सय ९८ कित्ता शेयर किनबेच हुँदा ५ अर्ब १५ करोड ७ लाख ६८ हजार ९ सय ३८.९८ रुपियाँ बराबरको कारोबार भएको छ ।
माबिलुङ हाइड्रो र फर्स्ट माइक्रो माइनान्सका लगानीकर्ताहरुले सबैभन्दा बढी क्रमशः ९.९८ र ९.२० प्रतिशतले नाफा कमाएका छन् ।
त्यस्तै मुक्तिनाथ कृषि कम्पनीका लगानीकर्ताहरुले सबैभन्दा बढी १० प्रतिशतले घाटा व्यहोरेका छन् ।
आज एनआरएन इन्फ्रास्ट्रक्चरको सबैभन्दा बढी कारोबार भएको छ । उक्त कम्पनीको २७ करोड ९८ हजार ५ सय ७२.७० रुपियाँ बराबरको शेयर किनबेच भएको नेप्सेले जनाएको छ ।
साताको पहिलो दिन आइतबार ३०७५ अंकले बजार बढ्दा ९ अर्ब २० करोड ३१ लख ४६ हजार ४ सय २९.५१ रुपियाँ र हिजो सोमबार ८.२४ अंकले बजार घट्दा ६ अर्ब ५ करोड २२ लाख २६ हजार ९ सय ३.७७ रुपियाँ बराबरको कारोबार भएको थियो ।