काठमाडौं । सोलु हाइड्रोपावर लिमिटेडले पुस २९ गते मंगलबारदेखि माघ ४ गतेसम्म सर्वसाधारणका लागि आईपीओ निष्काशन खुला गर्ने भएको छ ।
कम्पनीले आयोजना प्रभावित क्षेत्रका बासिन्दा तथा वैदेशिक रोजगारीमा रहेका नेपालीहरूलाई आईपीओ बाँडफाँड गरिसकेपछि सर्वसाधारण लगानीकर्ताका लागि आईपीओ निष्काशन गर्न लागेको हो ।
कम्पनीले प्रतिकित्ता १०० रुपियाँ अंकित मूल्यमा कुल २ करोड कित्ता आईपीओ निष्काशन गर्ने अनुमति पाएको थियो । सोअनुसार पहिलो चरणमा आयोजना प्रभावितलाई १ करोड कित्ता र वैदेशिक रोजगारीमा रहेका नेपालीहरूका लागि १० लाख कित्ता शेयर निष्काशन गरी बाँडफाँट सम्पन्न भइसकेको छ ।
बिक्री प्रबन्धक नबिल इन्भेष्टमेन्ट बैंकिङ लिमिटेड र हिमालयन क्यापिटलका अनुसार अब बाँकी रहेको ९० लाख कित्तामध्ये ५ लाख कित्ता सामूहिक लगानी कोषका लागि र ३ लाख कित्ता कम्पनीका कर्मचारीहरूका लागि सुरक्षित राखी बाँकी ८२ लाख कित्ता शेयर सर्वसाधारण लगानीकर्ताका लागि खुला गर्न लागिएको हो ।
उक्त कम्पनीको शेयर ८ लाख २० हजार जनालाई १०–१० कित्ताका दरले पर्नेछ ।

काठमाडौं । लुम्बिनी विकास बैंक लिमिटेडले संस्थापक शेयरधनी कान्छा गुरुङको १ लाख कित्ता र प्रकाश मान श्रेष्ठको २० हजार ९० कित्ता गरी कुल १ लाख २० हजार ९० कित्ता शेयर बिक्रीमा राखेको छ।
बैंकले यसअघि मंसिर २१ गते शेयर बिक्री खुला गरी बैंकका विद्यमान संस्थापक शेयरधनीहरूलाई खरीद आह्वान गरेकोमा कुनै पनि शेयरधनीबाट निवेदन प्राप्त नभएपछि सर्वसाधारणका लागि बिक्री खुला गरेको हो।
अतः सो शेयर किन्न इच्छुक सर्वसाधारणले आगामी १५ दिनभित्र आवश्यक कागजात सहित काठमाडौंको डिल्लीबजारस्थित बैंकको मुख्य कार्यालयमा निवेदन पेश गर्नु पर्नेछ।

काठमाडौं । नबिल बैंक लिमिटेडको सञ्चालक समितिको अध्यक्षमा निर्वाण कुमार चौधरी चयन भएका छन्। बैंकको ४१ औं वार्षिक साधारणसभाले अध्यक्ष पदमा निर्वाण कुमार चौधरीलाई चयन गरेको हो ।
वर्तमान अध्यक्ष उपेन्द्र प्रसाद पौडेलको कार्यकाल समाप्त भएसँगै आज बसेको सञ्चालक समितिको बैठकले चौधरीलाई सर्वसम्मत रूपमा नयाँ अध्यक्ष चयन गरेको छ । बैंकको ४१ औं वार्षिक साधारणसभा आज काठमाडौँको भद्रकालीस्थित त्रिभुवन आर्मी अफिसर्स क्लबमा भव्यताका साथ सम्पन्न भएको छ। सोही सभाले आर्थिक वर्षका लागि सञ्चालक समितिले प्रस्ताव गरेको १२.५० प्रतिशत लाभांश (बोनस सेयर र नगद लाभांश समेत) लगायतका सम्पूर्ण प्रस्तावहरू सर्वसम्मतिले पारित गरेको छ।
यस्तै साधारणसभाले नयाँ कार्यसमिति चयन गर्ने क्रममा बैंकका पूर्व प्रमुख कार्यकारी अधिकृत अनिल केशरी शाहलाई संस्थापक समूहको तर्फबाट सञ्चालक समिति सदस्यमा निर्वाचित गरेको छ। बैंकिङ क्षेत्रमा लामो अनुभव संगाल्नुभएका शाहको आगमनले बैंकको रणनीतिक नेतृत्वलाई थप मजबुत बनाउने अपेक्षा गरिएको छ।

काठमाडौं । सानिमा बैंक लिमिटेड र नेपाल क्लियरिङ्ग हाउस लिमिटेडबीच एनपीएस नेशनल कार्ड स्वीच अन्तर्गत डोमेस्टिक कार्ड स्कीम–नेपालपे कार्डको प्रमुख सदस्यताको लागि सम्झौता भएको छ ।
उक्त सम्झौता पत्रानुसार एनपीएस नेशनल कार्ड स्वीचलाई डोमेस्टिक कार्ड प्रयोग भई गरिने कारोबारहरुको राउटिङ र सेटलमेन्टमा अन्तरसञ्चालन सुनिश्चितताका लागि केन्द्रीय भुक्तानी पूर्वाधारको रूपमा स्थापना गरिएको हो ।
सम्झौता पत्रमा बैंकको तर्फबाट प्रमुख निक्षेप अधिकृत हेमराज सन्ज्याल र नेपाल क्लियरिङ्ग हाउस लिमिटेडको तर्फबाट प्रमुख कार्यकारी अधिकृत नीलेश मान सिंह प्रधानले हस्ताक्षर गरेका छन् ।
बैंकको देशको सातै प्रदेशमा १३४ वटा कार्यालयहरु तथा १२७ वटा ए।टि।एम।हरु संचालनमा छन् ।