काठमाण्डौं । आगामी फागुन १ गतेबाट प्रदर्शन हुन लागेको फिल्म ‘बिगुल’लाई नेपाल जेसीजले साथ दिने भएको छ । बिहीबार काठमाडौंमा आयोजित एक कार्यक्रममा फिल्मका निर्माता दिनेश कोइराला र नेपाल जेसीजका राष्ट्रिय अध्यक्ष जीवन कार्कीले प्रदर्शनसम्बन्धी सम्झौता पत्रमा हस्ताक्षर गरे । अब जेसीजले देशभरका शाखालाई फिल्म हेर्न आह्वान गर्ने जनाइएको छ ।
केही साताअघि पूर्वदेखि पश्चिमसम्म भएको फिल्मको प्रचार अभियानमा पनि नेपाल जेसीजले सघाएको थियो । फिल्मका निर्माता कोइरालाले जेसीजसँगको सहकार्यले आफूहरूलाई अझ उर्जा मिलेको जनाए । जेसीजका पूर्वअध्यक्ष समेत रहेका उनले आफूले देश र जनताको पक्षमा सन्देशका साथमा मनोरञ्जनात्मक फिल्म निर्माण गरेको दाबी गरे ।
फिल्मका निर्देशक रमेश कोइरालाले ‘बिगुल’मा समसामयिक राजनीतिक घटनाक्रमसँगै भुइँमान्छेको कथा पनि उठाइएको जनाए । उनले भने, ‘वर्तमान राजनीतिक र सामाजिक परिदृश्यसँग मिल्दो भएकाले हरेक नेपालीले एकपटक यो फिल्म हेर्नुपर्छ । फिल्ममा भरपुर मनोरञ्जनका साथै आम नेपालीलाई देश र माटोप्रति अझ बढी प्रेम जगाउने सन्देश पनि छ ।’
अभिनेता नीर शाहले ‘बिगुल’ जस्तो वास्तविक कथामा विरलै फिल्म बन्ने गरेको उल्लेख गर्दै आफू यस फिल्मको हिस्सा बन्न पाएकोमा खुसी व्यक्त गरे । फिल्ममा न्यायाधीशको भूमिकामा अभिनय गरेका उनले कार्यक्रममा भने, ‘नेपालीमाझ भन्नैपर्ने कथामा ‘बिगुल’ बनेको छ । यसप्रकारका फिल्म निर्माणमा अझै जोड दिनुपर्छ ।’
अभिनेत्री बेनिशा हमालले फिल्ममा आफू चुनौतीपूर्ण भूमिकामा रहेको जनाईन । देशप्रतिको माया र जिम्मेवारीको सन्देश बोकेको ‘बिगुल’ एकपटक हरेक नेपालीले हेर्नैपर्ने उनको धारणा छ । अभिनेता नरेन खड्काले फिल्ममा आफू युवा शक्तिको रूपमा प्रस्तुत भएको प्रस्ट पार्दै देशप्रति सचेत र जागरूक सबै नेपालीले फिल्म मन पराउने विश्वास व्यक्त गरे ।
कल्पना पौडेल प्रस्तुतकर्ता रहेको यस फिल्ममा नीर शाह, बेनिशा हमाल, नरेन खड्का, सरोज खनाल, हेमन्त बुढाथोकी, शिशिर वाङ्देल, मीरा पण्डित लगायतका कलाकारहरूको अभिनय रहेको छ । फिल्ममा प्रदीप भारद्वाज र मौनता श्रेष्ठको पटकथा तथा संवाद, शिव ढकालको छायांकन तथा तारा थापा ९किम्भे०को सम्पादन रहेको छ ।

काठमाण्डौं । अघिल्लो साता प्रदर्शनमा आएको फिल्म ‘आ बाट आमा’ हिट भएको निर्माताले दाबी गरेका छन् । शुक्रबार फिल्मको एक साताको कमाइ सार्वजनिक गर्दै निर्माण पक्षले फिल्मलाई हिट घोषणा गरेको हो । फिल्मका निर्माता तथा निर्देशक चन्द्र पन्तले फेसबुकमा सेअर गरेको एक पोस्टरमा फिल्मको एक साताको कमाइ ३ करोड १८ लाख रुपैयाँ ग्रस उल्लेख छ ।
पोस्टरमा ‘आ बाट आमा’लाई पहिलो साता उच्च कमाइ गर्ने पल शाहको पहिलो फिल्म समेत भनिएको छ । यदि निर्माताले सार्वजनिक गरेको आँकडा चलचित्र विकास बोर्डको बक्स अफिस तथ्यांककै आधारमा भए पनि यो पलको पहिलो साता सर्वाधिक कमाइ गर्ने पहिलो फिल्ममा भने पर्दैन । यसअघि उनी अभिनीत फिल्म ‘शत्रु गते’ले एक सातामा करिब ४ करोड कमाएको थियो ।
‘आ बाट आमा’लाई हिट घोषणा गर्न पनि निर्माताले हतार गरेको देखिन्छ । निकट स्रोतका अनुसार फिल्मको बजेट प्रचारसहित २ करोड हो । यसले हिटको ट्याग पाउन लगानी सुरक्षित गरेर कम्तीमा पनि २५–३० प्रतिशत नाफा कमाउनुपर्छ । यो भनेको साढे ६ करोड ग्रस कमाइ हो । यसअर्थ फिल्मलाई हिट हुन अझै ३ करोड रुपैयाँ ग्रस कमाउनुपर्छ ।
यद्यपि, फिल्मको पहिलो हप्ताको रफ्तार हेर्दा व्यावसायिक सफलताको सम्भावना उच्च देखिएको छ । फिल्मले प्रदर्शनको पहिलो दिनदेखि नै देशभर दर्शकको राम्रो साथ पाइरहेको छ । ‘रुवाउने फिल्म’ भन्दै व्यापक प्रचार भइरहेकाले त्यसले हरेक उमेर समूहका दर्शकलाई हलसम्म तानेको छ । यसले गर्दा बक्स अफिसमा फिल्म लामो रेसको घोडा बन्न सक्ने देखिन्छ ।
आमा र छोराको भावनात्मक सम्बन्धको कथामा आधारित यस फिल्ममा विपना थापा, प्रदीप रावत (गजनी भिलेन), पल शाह, साइग्रेस पोखरेल, उषा उप्रेती, सिम्रन पन्त, रचना गौतम लगायतको अभिनय रहेको छ । फिल्ममा कृष्ण प्रसाद सुवेदी, ओमकार पन्त, प्रकाशजंग कुँवर,ध्रुव प्रसाद न्यौपाने र क्षितिज ढुंगाना निर्माताको रूपमा छन् ।

काठमाण्डौं । नेपाली प्रेम कथानक फिल्म ुकुमारीु आज (शुक्रवार) बाट देशभरका सिनेमा हलहरूमा एकसाथ प्रदर्शनमा आएको छ। विनिश इन्टरटेन्मेन्टको ब्यानरमा निर्माण भएको यो फिल्मले रिलिजसँगै देशभरका हलहरूबाट निकै उत्साहजनक शो प्राप्त गरेको छ।
करिब २ सय शोसहित हल प्रवेश गरेको ‘कुमारी’ले बक्स अफिसमा ठुलो ओपनिङ गर्ने अपेक्षा अनुरूप नै बिहानी शोहरूमा दर्शकको उपस्थिति देखिएको छ। काठमाडौं उपत्यकाका मल्टिप्लेक्स तथा मोफसलका हलहरूमा दर्शकको उत्साहजनक साथ मिलेको वितरकले जनाएका छन्। उल्लेखनीय कुरा के छ भने यस फिल्मले बिहानी शो हेरेका दर्शकबाट एकदमै सकारात्मक प्रतिक्रिया प्राप्त गरेको छ। पहिलो शो हेरेर निस्किएका दर्शकहरूले नयाँ कलाकारहरूको काम र निर्देशकको प्रस्तुतिको प्रशंसा गरेका छन्। दर्शकले नेपाली प्रेमकथामा बनेका फिल्महरूमा कुमारीु उत्कृष्ट मध्ये एक रहेको प्रतिक्रिया दिएका छन्। फिल्म युनिट कलाकारहरूसहित बिहानै देखि हलमा दर्शक भेटी प्रतिक्रिया लिइरहेका छन्। प्रतिक्रियाबाट टिम उत्साहित देखिएको छ।
प्रेम कथानक फिल्म निर्देशनमा माहिर मानिने निर्देशक दिनेश राउतले यस फिल्मको निर्देशन गरेका हुन्। फिल्ममा प्रेम, मानवीय सङ्घर्ष र पारिवारिक अन्तर्द्वन्द्वको कथालाई कलात्मक ढङ्गले चित्रण गरिएको छ। यसै फिल्ममार्फत अविषेक खड्का र आकृति राजभण्डारीले मुख्य भूमिकामा डेब्यु गरेका छन्। उनीहरूसँगै पर्दामा घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने र मनषा शर्मा लगायतका कलाकारहरूको अभिनय देख्न सकिन्छ।
महेन्द्र अधिकारीले निर्माण गरेको यस फिल्मका कार्यकारी निर्माता केदार भुसाल हुन्। फिल्मको प्राविधिक पक्ष पनि बलियो रहेको दाबी गरिएको छ। विकास सुवेदीको लेखन रहेको ुकुमारीु मा सुसन प्रजापतिको छायाङ्कन र सुप्रिम पराजुलीको सम्पादन रहेको छ। रोयल भीमसेनले पोस्टर तथा पब्लिसिटी डिजाइन गरेको यो फिल्मले मौलिक कथा वाचनमार्फत दर्शकको मन जित्ने निर्माण पक्षको विश्वास छ।

काठमाण्डौं । भोलिदेखि ‘भ्यालेन्टाइन सप्ताह’ सुरू हुँदैछ । यो सप्ताहलाई प्रेमिल जोडीहरूले एकअर्कालाई गुलाब, चकलेट वा विभिन्न उपहार दिएर प्रेम व्यक्त गर्ने अवसरका रूपमा मनाउने गरेका छन् । पछिल्ला वर्षहरूमा गीतसंगीत र फिल्ममार्फत पनि प्रेम अभिव्यक्त गर्ने चलन बढ्दै गएको छ ।
यही सन्दर्भमा यस वर्षको ‘भ्यालेन्टाइन डे’ प्रेमिल जोडीका लागि अझ विशेष बन्ने देखिएको छ । कारण, शुक्रबारबाट लभ र ब्रेकअपको कथामा आधारित फिल्म हलमा लागेका छन् । ती फिल्म हुन्, ‘कुमारी’ र ‘रमिताको पिरती’ । यी दुवै फिल्म जेनजी पुस्तालाई लक्षित गरेर निर्माण गरिएका भए पनि विषयवस्तुका हिसाबले विल्कुलै फरक छन् ।
‘कुमारी’ विशुद्ध प्रेमकथामा आधारित फिल्म हो । अझ भनौं, जेनजी लभस्टोरी । किनकि, फिल्मका मुख्य नायक, नायिका नै जेनजी पुस्ताका छन् । अबिषेक खड्का र आकृति राजभण्डारीको मुख्य भूमिकामा रहेको यस फिल्मले सामाजिक मूल्य, मान्यता र पारिवारिक अवरोधले प्रेममा आउने उतारचढावको कथामा पेश गरेको छ ।
‘डोको बुन्ने निगालो चोयाले’ गीतका कारण चर्चामा रहेको यो फिल्मलाई दिनेश राउतले निर्देशन गरेका हुन् । उनी ‘नोभेम्बर रेन’ र ‘क्लासिक’ जस्ता लभस्टोरी फिल्मका लागि परिचित छन् । महेन्द्र अधिकारी निर्माता रहेको फिल्ममा विकास सुवेदीको लेखन छ । देशव्यापी १५० भन्दा बढी शो पाएको यो फिल्मले बक्स अफिसमा सुखद व्यापार गर्ने अपेक्षा गरिएको छ ।
सुदिप्ताको निर्देशन बनेको ‘रमिताको पिरती’ भने ब्रेकअपको कथा हो । आदर्श प्रेम खोजिरहेकी युवतीले लगातारको ब्रेकअपपछि भोग्ने मानसिक तनाव, चिन्ता र पीडालाई फिल्ममा देखाइएको छ । आना शर्मा, विनय श्रेष्ठ, धीरज मगर, समीर श्रेष्ठ, गौमाया गुरुङ, रेनु योगी लगायतको अभिनय रहेको यस फिल्मका निर्माता सागर लम्साल हुन् ।