काठमाडौं । सिटिजन लाइफ इन्स्योरेन्स कम्पनीले एमडीआरटी २०२६ (मिलियन डलर राउन्ड टेबल) सम्मान तथा प्रशिक्षण कार्यक्रम सफलतापूर्वक सम्पन्न गरेको छ । उक्त कार्यक्रम २०८२ साल फागुन ५ गतेदेखि ७ गतेसम्म होटल पोखरा ग्रान्ड, पोखरामा दुई रात तीन दिनसम्म भव्य रूपमा आयोजना गरिएको थियो ।
कार्यक्रममा कुल ७० जना सिटिजन लिडरहरुलाई सम्मान गरिएको थियो । जसअन्तर्गत ६७ जना एमडीआरटी (मिलियन डलर राउन्ड टेबल), २ जना सिओटी (कोर्ट अफ द टेबल) तथा १ जना टिओटी (टप अफ द टेबल) योग्यकर्ता रहेका थिए । सँगै सिनियर एजेन्सी म्यानेजर, उत्कृष्ट कार्यसम्पादन छनोट भएका शाखा प्रमुख तथा क्षेत्रीय प्रमुखहरुको समेत सहभागिता रहेको थियो ।
यस कार्यक्रमको उद्देश्य उत्कृष्ट कार्यसम्पादन गर्ने लिडरहरुलाई सम्मान गर्नुका साथै आगामी व्यवसायिक लक्ष्य तथा रणनीतिबारे छलफल र सशक्त प्रशिक्षण प्रदान गर्नु थियो । कार्यक्रम अन्तर्गत “द सेक्रेट अफ प्रोग्रेसिभ लाइफ” विषयमा प्रख्यात सेल्स कोच तथा मोटिभेशनल स्पीकर डा. रबिन कटवालले विशेष प्रशिक्षण सत्र सञ्चालन गर्नुभएको थियो, जसले सहभागीहरूलाई व्यक्तिगत तथा व्यवसायिक विकासका लागि प्रेरित गरेको कम्पनीले जनाएको छ ।
कार्यक्रममा कम्पनीका प्रशिक्षण विभाग प्रमुख कुबेर पाठक, प्रमुख वित्तीय अधिकृत गोपाल पंगेनी, प्रमुख बजार व्यवस्थापन अधिकृत भुषण रिमाल तथा प्रमुख कार्यकारी अधिकृत पोषक राज पौडेलले आ–आफ्नो प्रस्तुति तथा मार्गदर्शन प्रदान गरेका थिए ।
साथै कम्पनीका ब्राण्ड एम्बेसडरहरू मदनकृष्ण श्रेष्ठ तथा हरिवंश आचार्यको विशेष उपस्थिति रहेको थियो । उनीहरूले सहभागीहरूलाई सम्बोधन गर्दै हाँस्य व्यंग्यमार्फत उत्साह थप्नुका साथै एमडीआरटी योग्यकर्ताहरूलाई सम्मान समेत गरेका थिए ।
समापन समारोहमा प्रमुख कार्यकारी अधिकृत पोषक राज पौडेलले कम्पनीको निरन्तर प्रगति र सफलताको प्रमुख आधार सिटिजन लिडरहरुको समर्पण, प्रतिबद्धता र उत्कृष्ट कार्यसम्पादन रहेको उल्लेख गर्दै सम्पूर्ण सहभागीहरूलाई धन्यवाद ज्ञापन गरे । उनले आगामी दिनहरूमा अझै उच्च उपलब्धि हासिल गर्ने विश्वास व्यक्त गरे ।
समग्रमा, एमडीआरटी २०२६ कार्यक्रम भव्य, प्रभावकारी तथा पूर्ण रूपमा सफल भएको कम्पनीले जनाएको छ । यस्तो प्रकारका कार्यक्रमले लिडरहरुलाई थप उत्प्रेरणा प्रदान गर्नुका साथै व्यवसाय विस्तार र व्यक्तिगत क्षमताको अभिवृद्धिमा महत्वपूर्ण योगदान पुर्‍याउने विश्वास कम्पनीले लिएको छ ।

काठमाडौँ । बालबालिका र युवामा वित्तीय साक्षरता विस्तार गर्ने उद्देश्यले सञ्चालन हुँदै आएको ‘ग्लोबल मनी विक’ को चौधौँ संस्करण आगामी चैत २ देखि ८ गते (मार्च १६–२२, २०२६) सम्म नेपालसहित विश्वभर मनाइने भएको छ ।
नेपालमा रहेक वर्षजस्तै यस वर्ष पनि नेपाल राष्ट्र बैंकले राष्ट्रिय संयोजकको भूमिका निर्वाह गर्दै ‘ग्लोबल मनी विक २०२६’ आयोजना गर्ने भएको हो ।
केन्द्रीय बैंकको संयोजनमा बैंक तथा वित्तीय संस्था, लघुवित्त संस्था, बिमा कम्पनी, सहकारी संस्था, पुँजीबजारसँग सम्बन्धित निकाय तथा अन्य वित्तीय सेवा प्रदायकको सक्रिय सहभागिता रहने जनाईएको छ ।
राष्ट्र बैंकले वित्तीय साक्षरता अभिवृद्धिमा क्रियाशील सम्पूर्ण सङ्घसंस्था, शैक्षिक प्रतिष्ठान, गैरसरकारी संस्था तथा सरोकारवाला निकायलाई ‘ग्लोबल मनी विक’ मा सक्रिय सहभागिता जनाउन आह्वान गरेको छ । वित्तीय पहुँच विस्तारसँगै वित्तीय सेवाको सुरक्षित र जिम्मेवार प्रयोग सुनिश्चित गर्नु वर्तमान आवश्यकता रहेको जनाउँदै बैंकले सामूहिक प्रयासबाट मात्र दिगो वित्तीय समावेशिता सम्भव हुने उल्लेख गरेको छ ।
‘ग्लोबल मनी विक’ मूलतः किशोरकिशोरी तथा युवा÷युवतीमा वित्तीय शिक्षाको महत्त्वबारे जागरण ल्याउने उद्देश्यका साथ विश्वव्यापी रूपमा थालिएको अभियान हो । ‘अर्गनाइजेसन फर इकोनोमिक कोअपरेसन एण्ड डेभलपमेन्ट’ (ओइसिडी) को संयोजनमा सन् २०१२ देखि प्रत्येक वर्ष विश्वव्यापी रूपमा यो अभियान सञ्चालन हुँदै आएको छ ।
राष्ट्र बैंकको संयोजनमा सन् २०१३ देखि नेपालमा यो अभियान सञ्चालन भइरहेको छ । अभियानबाट हालसम्म विश्वका १७६ भन्दा बढी मुलुकका करिब सात करोड बालबालिका, किशोरकिशोरी र युवा लाभान्वित भएको ओइसिडीले जनाएको छ ।
ग्लोबल मनी विकको स्थायी नारा ‘सिक, बचाउ, कमाउ’ (लर्न, सेभ, अर्न) रहेको छ भने यस वर्षको नारा ‘स्मार्ट मनी टक्स’ रहेको छ । वित्तीय निर्णयहरूमा सचेत सहभागिता, बचत तथा लगानीको संस्कार विकास, डिजिटल वित्तीय सेवाको सुरक्षित प्रयोग तथा जिम्मेवार उपभोग प्रवर्द्धन गर्नु यस अभियानका प्रमुख उद्देश्यहरू रहेका राष्ट्र बैंकले जनाएको छ ।
अभियानअन्तर्गत विद्यालय तथा क्याम्पस केन्द्रित वित्तीय शिक्षा कार्यक्रम, अन्तरक्रियात्मक छलफल, निबन्ध तथा वक्ततृत्व प्रतियोगिता, डिजिटल वित्तीय साक्षरतासम्बन्धी तालिम, वित्तीय उपभोक्ता अधिकारबारे सचेतनामूलक कार्यक्रमलगायत विविध गतिविधि सञ्चालन हुँदै आएका छन् ।

काठमाडौं । रिलायबल नेपाल लाइफ इन्स्योरेन्स लिमिटेडको अत्तरिया शाखा कार्यालयमा बीमा गराएका बीमित अमर बहादुर एडी क्षेत्रीको मृत्यु भएपछि शाखा कार्यालयले बीमितको परिवारलाई घरमै गएर दाबी भुक्तानी रकम हस्तान्तरण गरेको छ।
मृतक क्षेत्रीले कम्पनीको अत्तरियास्थित शाखा कार्यालयबाट ३ लाख ५० हजार रुपैयाँ बीमाङ्कको ‘सुलभ जीवन बीमा’ योजना खरीद गरेका थिए। उनले दुई किस्ता रकम मात्र जम्मा गरेको अवस्थामा घरमै अचानक बेहोस भई अस्पताल लैजाँदै गर्दा बाटोमै निधन भएको थियो। बीमितको निधनपछि कम्पनीले मृत्यु सुविधा, बीमाङ्क रकम र बोनस समेत गरी कुल ३ लाख ७१ हजार १७५ रुपैयाँ बीमितको आश्रित परिवारलाई हस्तान्तरण गरेको छ। उक्त रकम मृतककी श्रीमती धना देवी एडी क्षेत्रीलाई घरमै आयोजित एक कार्यक्रमका बीच चेक मार्फत हस्तान्तरण गरिएको हो।
दाबी रकम हस्तान्तरण कार्यक्रम आलिताल गाउँपालिका–६ सेरीस्थित मृतकको घरमा आयोजना गरिएको थियो। कार्यक्रममा वडा नम्बर ६ का वडाध्यक्ष कुम्भर बुढाको प्रमुख आतिथ्य, शाखा प्रमुख मोहन बहादुर बोहराको अध्यक्षता तथा एजेन्सी प्रमुख धर्म सिंह ऐर र तीनपटक ‘एमडीआरटी’ उपाधि प्राप्त अभिकर्ता प्रेम साउदको उपस्थिति रहेको थियो। कार्यक्रममा स्थानीय बुद्धिजीवी, समाजसेवी तथा गाउँबासीहरूको उल्लेखनीय सहभागिता थियो।
शाखा प्रमुख मोहन बहादुर बोहराले सम्पूर्ण आवश्यक कागजात पेश भएको एक हप्ताभित्रै दाबी रकम भुक्तानी गरिएको जानकारी दिए। उनका अनुसार अत्तरिया शाखाबाट परेका सबै दाबीहरू नियमित र समयमै फछ्र्योट गरिएको छ। वडाध्यक्ष कुम्भर बुढाले बीमा प्रत्येक व्यक्तिका लागि आवश्यक रहेको जनाउँदै आफ्नो वडाबाट बीमा सम्बन्धी सचेतना र सहजीकरणमा सक्दो सहयोग गर्ने प्रतिबद्धता व्यक्त गरे। उनले सानो रकमबाटै भए पनि सबैले बीमा गर्नुपर्ने धारणा राखे।
कार्यक्रममा बोल्दै शाखा प्रमुख बोहराले बीमा सुखमा मात्र नभई दुःखमा पनि साथ दिने भरोसायोग्य माध्यम भएको उल्लेख गरे। उनले बीमाले बचत गर्ने बानी विकास गराउने र भविष्य सुरक्षित बनाउन सहयोग गर्ने जनाए। साथै बीमित र अभिकर्ताको हकहितका लागि निरन्तर क्रियाशील रहने प्रतिबद्धता जनाए।
एजेन्सी प्रमुख धर्म सिंह ऐरले मृतकलाई आफूले प्रेरित गरी बीमा गराएको उल्लेख गर्दै कठिन समयमा परिवारलाई आर्थिक सहयोग गर्न पाउँदा आफूलाई सन्तोष लागेको जनाए। उनले बीमा करले होइन इच्छाले गर्नुपर्ने विषय भएको भन्दै सबैलाई सचेत हुन आग्रह गरे। त्यस्तै तीनपटक ‘एमडीआरटी’ उपाधि प्राप्त प्रेम साउदले बीमाले टुटेको परिवारलाई आर्थिक सुरक्षा दिन सक्ने जनाउँदै आगामी दिनमा अझ बढी नागरिकलाई बीमाको दायरामा ल्याउने प्रतिबद्धता जनाए।

काठमाडौं । यूनाइटेड अजोड इन्स्योरेन्स लिमिटेडले कम्पनीमा बीमा दाबीका लागि निवेदन दिएर लामो सयमदेखि सम्पर्कमा नआएका दाबीकर्तालाई सम्पर्कमा आउन आग्रह गरेको छ।
कम्पनीमा विभिन्न समयमा प्राप्त भएको दाबी निवेदनहरूमध्ये कतिपयमा आवश्यक कागजात अपुग रहेकोले दाबी फर्छ्यौटका लागि कम्पनीको नजिको उपशाखा कार्यालय, शाखा कार्यालय, प्रादेशिक कार्यालय लगायत कम्पनीको प्रधान कार्यालय सुन्धारा, काठमाडौंस्थित दाबी विभागमा सम्पर्क गर्न आग्रह गरेको हो।
कम्पनीले सम्पत्ति बीमा, इन्जिनियरिङ्ग बीमा, मोटर बीमा, मरिन बीमा तथा विविधि बीमा अन्तर्गतका दाबीको दाबी भुक्तानी लिन अबको ३५ दिनभित्र सम्पर्कमा आउन आह्वान गरेको छ। उक्त समयसम्म पनि सम्पर्कमा नआउने बीमितको दाबी फाइल बन्द गरिने कम्पनीले सूचनामा उल्लेख गरेको छ।