काठमाडौं । सानिमा जिआईसी इन्स्योरेन्स लिमिटेडले ५.२६ प्रतिशत लाभांश घोषणा गरेको छ ।
शुक्रबार दिउँसो बसेको सञ्चालक समितिको बैठकले आव २०८१–०८२ को नाफाबाट ५ प्रतिशत बोनस शेयर र कर प्रयोजनका लागि ०.२६३२ प्रतिशत नगद लाभांश प्रस्ताव गर्ने निर्णय गरेको कम्पनी सचिव सुबोधलाल श्रेष्ठले जनाएका छन् ।
उक्त लाभांश नेपाल बीमा प्राधिकरणबाट स्वीकृति र आगामी साधारण सभाले पारित गरे पछि शेयरधनीहरुले पाउने छन् ।

काठमाडौं । शिखर पावर डेभलपमेन्ट लिमिटेडले फागुन १७ गतेदेखि २६ गतेसम्म निष्काशन खुला गरेको आईपीओ मंगलबार बिहान बाँडफाँट हुने भएको छ ।
बिक्री प्रबन्धक ग्लोबल आईएमई क्यापिटलका अनुसार मंगलबार बिहान ८ः३० बजे शेयर बाँडफाँडको तयारी गरिएको छ ।
उक्त कम्पनीको आईपीओमा २७ लाख ६६ हजार ५१० जनाको आवेदन परेको छ । अन्तिम दिन अन्तिम समयसम्म ३ अर्ब ७ करोड ३९ लाख ६० हजार रुपियाँको ३ करोड ७ लाख ३९ हजार ६ सय कित्ता शेयरको लागि आवेदन परेको छ ।
कम्पनीले यसअघि आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि छुट्याइएको आईपीओ निष्काशन गरी बाँडफाँट सम्पन्न गरिसकेको थियो । अब दोस्रो चरणअन्तर्गत सर्वसाधारणका लागि शेयर खुला गरेको हो ।
कम्पनीले आफ्नो ९८ करोड रुपियाँ जारी पुँजीको ३२.६५ प्रतिशत अर्थात् ३२ करोड रुपियाँ बराबरका ३२ लाख कित्ता शेयर निष्काशन गर्न अनुमति पाएको थियो । यसमध्ये ९ लाख ८० हजार कित्ता साधारण शेयर वातावरणीय प्रभाव मूल्याङ्कन प्रतिवेदन र विद्युत उत्पादन अनुमतिपत्रका आधारमा आयोजना प्रभावित क्षेत्रका स्थानीय बासिन्दाका लागि छुट्याइएको थियो ।
त्यस्तै, २ लाख २२ हजार कित्ता साधारण शेयर नेपाल सरकारको सम्बन्धित निकायबाट श्रम स्वीकृति प्राप्त गरी वैदेशिक रोजगारीमा रहेका नेपालीहरूका लागि तथा १ लाख ११ हजार कित्ता शेयर सामूहिक लगानी कोषहरूका लागि निष्कासन गरी बाँडफाँट गरिसकिएको छ।
कम्पनीले दोस्रो चरणमा आफ्ना कर्मचारीहरूका लागि ४४ हजार ४०० कित्ता शेयर सुरक्षित राखी बाँकी रहेको प्रतिकित्ता १०० रुपियाँ अंकित मूल्यका १८ करोड ४२ लाख ६० हजार रुपियाँ बराबरका १८ लाख ४२ हजार ६०० कित्ता साधारण शेयर सर्वसाधारण लगानीकर्ताका लागि निष्काशन गरेको थियो ।
उक्त शेयर १ लाख ८४ हजार २ सय ६० जनाले १०, १० कित्ताका दरले पाउने बिक्री प्रबन्धक ग्लोबल आइएमई क्यापिटल लिमिटेडले जनाएको छ ।

काठमाडौं । चैतका लागि वाणिज्य बैंकहरूले ब्याजदर घटाएका छन् ।
वाणिज्य बैंकहरूको व्यक्तिगत मुद्दती निक्षेपको अधिकतम औसत ब्याजदर फागुन महिनामा ४.५६ प्रतिशत रहेकोमा चैतमा घटेर ४.४९ प्रतिशतमा झरेको हो । यसरी औसत ब्याजदर ०.०७ प्रतिशत बिन्दुले घटेको हो ।
हाल सञ्चालनमा रहेका २० वाणिज्य बैंकमध्ये ६ बैंकले ब्याजदर घटाएका छन् भने १४ बैंकले फागुन महिनाकै दरलाई निरन्तरता दिएका छन् । संस्थागत मुद्दती निक्षेपको अधिकतम औसत ब्याजदर पनि चैतमा ०.०३ प्रतिशत बिन्दुले घटेको छ । चैत महिनाका लागि सबैभन्दा धेरै ब्याजदर घटाउने बैंक नेपाल बैंक लिमिटेड रहेको छ ।
यस बैंकले व्यक्तिगत मुद्दती निक्षेपको अधिकतम ब्याजदर ०.६ प्रतिशत बिन्दुले घटाएको हो । त्यस्तै कृषि विकास बैंक लिमिटेडले, स्ट्याण्डर्ड चार्टर्ड बैंक नेपाल, कुमारी बैंक लिमिटेड, प्राइम कमर्सियल बैंक लिमिटेड र ग्लोबल आइएमई बैंक लिमिटेडले पनि चैत महिनाका लागि ब्याजदर घटाएका छन् ।
चैत महिनाका लागि कृषि विकास बैंकले व्यक्तिगत मुद्दतीको ब्याजदर ४.१५ प्रतिशत कायम गरेको छ । फागुन महिनामा यस्तो मुद्दतीको ब्याजदर ४.२५ प्रतिशत रहेको थियो । त्यस्तै स्ट्याण्डर्ड चार्टर्ड बैंकले चैत महिनाका लागि ४.११ प्रतिशत ब्याजदर निर्धारण गरेको छ ।
फागुन महिनाका लागि यो बैंकको ब्याजदर ४.२५ प्रतिशत रहेको थियो । नेपाल बैंकले चैत महिनाका लागि व्यक्तिगत मुद्दतीमा ४.५ प्रतिशत कायम गरेको छ, जुन फागुन महिनामा ५.१ प्रतिशत रहेको थियो । त्यस्तै चैत महिनाका लागि कुमारी बैंकले ब्याजदर ४.१२ प्रतिशत निर्धारण गरेको छ ।
फागुन महिनामा यस्तो ब्याजदर ४.४३ प्रतिशत रहेको थियो ।
ग्लोबल आइएमई बैंकले चैत महिनाका लागि ४.२५ प्रतिशत ब्याजदर निर्धारण गरेको छ । फागुन महिनामा यो बैंकको यस्तो ब्याजदर ४.७५ प्रतिशत रहेको थियो । त्यस्तै प्राइम बैंकले चैत महिनाका लागि ४.१५ प्रतिशत ब्याजदर घोषणा गरेको छ । फागुन महिनामा यस्तो ब्याजदर ४.२५ प्रतिशत रहेको थियो ।
त्यस्तै चैत महिनाका लागि नेपाल एसबिआई बैंकले ४.२५ प्रतिशत ब्याजदर सार्वजनिक गरेको छ । फागुन महिनामा पनि यो बैंकले सोही दरमा व्यक्तिगत मुद्दतीमा ब्याज दिएको थियो । त्यस्तै एभरेष्ट बैंकको चैत महिनाका लागि ४.२५ प्रतिशत र सिद्धार्थ बैंकको ४.२५ प्रतिशत रहेको छ । यी बैंकहरूको पनि फागुन महिनामा सोही दरको ब्याजदर रहेको थियो ।
त्यस्तै चैत महिनाका लागि माछापुच्छ्रे बैंक, सिटिजन्स बैंक, लक्ष्मी सनराइज बैंक, सानीमा बैंक र नेपाल इन्भेष्टमेण्ट मेगा बैंकको ब्याजदर ४.५ प्रतिशत निर्धारण गरिएको छ ।
यी बैंकहरूले फागुन महिनामा पनि व्यक्तिगत मुद्दतीमा सोही दरको ब्याजदर तोकेका थिए । त्यसैगरी चैत महिनामा प्रभु बैंक र नबिल बैंकले ब्याजदर ४.५५ प्रतिशत तोकेका छन् । फागुन महिनामा पनि यी दुई वटा बैंकको ब्याजदर सोही दरमा थियो ।
त्यस्तै चैत महिनाका लागि हिमालय बैंक, राष्ट्रिय वाणिज्य बैंक, एनआइसी एशिया बैंक र एनएमबी बैंकले व्यक्तिगत मुद्दतीमा ५ प्रतिशत ब्याजदर तोकेका छन् । फागुन महिनामा पनि यी बैंकहरूको व्यक्तिगत मुद्दतीको ब्याजदर ५ प्रतिशत नै रहेको थियो । १ वर्ष वा सोभन्दा कम अवधिको मुद्दती निक्षेपमा वाणिज्य बैंकहरूले ब्याजदर ४ प्रतिशतभन्दा तल झारिसकेको अवस्था छ ।
माघमा नै वार्षिक बिन्दुगत उपभोक्ता मुद्रास्फीति बढ्न लागेको र पश्चिम एशियामा देखिएको द्वन्द्वले गर्दा मूल्यमा थप चाप पर्ने अवस्था देखिएको छ । साधारण बचतको ब्याजदर २.७५ प्रतिशत रहेकोमा माघमा बढेको मुद्रास्फीतिले वास्तविक ब्याजदर ऋणात्मकतर्फ गइसकेको छ ।
अहिले अधिक तरलता भन्दै लगानीका लागि उपयुक्त वातावरण रहेको भनेर आत्मविश्वासी देखिएका नीति निर्माताले पनि वास्तविक ब्याजदर ऋणात्मक हुँदै गर्दा पर्ने प्रभावको भने मूल्यांकन गरेको देखिँदैन