काठमाण्डौ । एनएमबि बैंकले नागरिक एप इन्टिग्रेसनका लागि नेपाल सरकारको सूचना प्रविधि विभागसँग सम्झौता गरेको छ।
यस सहकार्यसँगै अब एनएमबि बैंकका ग्राहकले नागरिक एपमार्फत अनलाइन बैंकिङ फारामहरू सहज रूपमा भर्न सक्नेछन्। यसबाट ग्राहकले आफ्ना व्यक्तिगत विवरण बारम्बार टाइप गर्नुपर्ने झन्झट हट्नुका साथै कागजी प्रक्रिया कम भई बैंकिङ सेवा थप सहज र छिटो हुने बैंकले जनाएको छ।
बैंकका अनुसार ग्राहकको गोपनीयता र व्यक्तिगत विवरणको सुरक्षामा विशेष ध्यान दिइनेछ। ग्राहकले आफ्नो नागरिक एपबाट विवरण प्रयोग गर्ने अनुमति नदिएसम्म बैंकले ती विवरण हेर्न वा प्रयोग गर्न पाउनेछैन।
नागरिक एपबाट प्राप्त जानकारी जुन प्रयोजनका लागि मागिएको हो, सोही प्रयोजनमा मात्र प्रयोग गरिने बैंकले स्पष्ट पारेको छ।

काठमाडौं । सोमबार नेपाल स्टक एक्सचेन्ज (नेप्से) परिसूचक ४१.७० अंकले बढेको छ । गत शुक्रबार नेप्से २६७७.५४ विन्दुमा थियो । सोमबार त्यो १.५५ प्रतिशतले बढेर २७१९.२४ विन्दुमा पुगेको छ ।
नयाँ सरकार गठनपछि घट्दो क्रममा रहेको सेयर बजार गत सातादेखि बढ्दो क्रममा छ । यसअघि मंगलबार ६.११, बुधबार १४ र बिहीबार ७.५० अंकले नेप्से बढेको थियो । त्यसपछि शुक्रबार ७९.७४ अंकले बढेको नेप्से सोमबार ४१.७० अंकले बढेको हो ।
नेपाल धितोपत्र बोर्डका अध्यक्ष डा. गोपाल प्रसाद भट्टको विभिन्न सार्वजनिक अभिव्यक्ति, बोर्डले ल्याएको १० वर्षे मार्गचित्र र आगामी आवको पूँजी बजार नीतिले बजार बढाउने सहयोग पुगेको देखिन्छ । यस्तै, आज प्रधानमन्त्री बालेन्द्र शाहले पुँजी बजार सम्बद्ध अधिकारीसँग भेटवार्ता गरेका छन् । त्यसले गर्दा पनि सोमबार नेप्से बढ्न सहयोग पुगेको देखिन्छ ।
सोमबार पाँच अर्ब ५१ करोड २६ लाख ८८ हजार बराबरको सेयर कारोबार भएको छ । एक करोड २२ लाख ४५ हजार ३३७ कित्ता सेयरको ६७ हजार १५५ पटक कारोबार भएको छ । आज ३४३ वटा स्क्रीप्ट कारोबारमा आएका छन् ।
सोमबार एभरेष्ट कलर लिमिटेडेको सेयर मूल्य १४.९७ प्रतिशतले बढेको छ । यो आज देखि नै कारोबारमा आएको कम्पनी हो ।
यस्तै, रिज लाइज इनर्जीको १४.६४ प्रतिशत, श्रीनगर एग्रीटेकको १०.९५ प्रतिशत, सोलु हाइड्रो पावरको ९.५६ प्रतिशत र रिलायन्स स्पीनिङ मिल्सको ९.३१ प्रतिशतले सेयर मूल्य बढेको छ ।
आज अंखु खोला जलविद्युत कम्पनीको सबै भन्दा धेरै २९ करोड १५ लाख ५२ हजार रूपियाँको सेयर कारोबार भएको छ । यसैगरी रिलयान्स स्पीनिङ मिल्सको २४ करोड ४६ लाख ५७ हजार, रिडी पावरको २० करोड ६६ लाख ४८ हजार, कर्पोरेट डेभलपमेन्टको १९ करोड आठ लाख १० हजार र नेशनल हाइड्रोपावार डेभलपमेन्टको १५ करोड ८९ लाख पाँच हजार रूपियाँको सेयर कारोबार भएको छ ।