काठमाडौं । मध्यपूर्वमा अमेरिका र इरानबीचको तनाव चरम बिन्दुमा पुगेको छ । दुई देशबीचको युद्धविराम र शान्ति सम्झौता पूर्ण रूपमा समाप्त भएको छ ।
हालै इरानी सेनाले मुख्यतया कतार र साउदी अरबका तेल ट्यांकर लगायत तीनवटा पानी जहाजलाई निसाना बनाएपछि राष्ट्रपति डोनाल्ड ट्रम्पको आदेशमा अमेरिकी सेनाले इरानमाथि ठूलो हवाई आक्रमण गरिरहेको छ । सुरक्षा चुनौती र तनावबारे बोल्दै अमेरिकी राष्ट्रपति ट्रम्पले आफ्नो ज्यान सधैं जोखिममा रहेको जनाएका छन् ।
नेटो शिखर सम्मेलनपछि एयर फोर्स वनमा पत्रकारहरूसँग कुरा गर्दै ट्रम्पले इरानीहरूको ‘हिट लिस्ट’ (मार्नुपर्ने व्यक्तिको सूची) मा आफ्नो नाम शीर्ष स्थानमा रहेको दाबी गरेका हुन् ।
ट्रम्पले भने, ‘उनीहरूको हिट लिस्ट सूचीमा म सबैभन्दा माथि छु । अहिलेसम्म मेरो भाग्यले साथ दिएको छ, तर यो अवस्था धेरै लामो समयसम्म नटिक्न सक्छ ।’
ट्रम्पले अमेरिका र इरानबीचको युद्धविराम समझदारी पत्रबारे भने, ‘रातारात इरानमाथि गरिएको नयाँ अमेरिकी आक्रमणपछि उक्त समझदारी पत्र अब समाप्त भएको छ ।’

काठमाडौं । मध्यपूर्वमा फेरि तनाव बढेको छ । बुधबार बिहान सबेरै अमेरिकाले इरानविरुद्ध शृङ्खलाबद्ध आक्रमण सुरु गरेको हो ।
होर्मुज भएर गइरहेको तीनवटा व्यावसायिक जहाजमा इरानले आक्रमण गरेको दाबी गर्दै अमेरिकाले हवाई आक्रमण गरेको हो ।
इरानको सरकारी सञ्चारमाध्यमका अनुसार देशको दक्षिणी भागमा धेरै विस्फोटहरू भएको छ । दक्षिणी सहर सिरिकमा सात वटा विस्फोटको आवाज सुनिएको छ । साथै, सिरिकको ताहरुई क्षेत्रमा छ वटा विस्फोटक गोलाहरू खसालेको छ ।
इरानको प्रेस टिभीले विस्फोटबाट भएको क्षति वा हताहतीबारे तत्काल कुनै जानकारी प्राप्त नभएको जनाएको छ । दक्षिणी इरानको केश्म टापु र बन्दर अब्बास क्षेत्रमा पनि विस्फोटको आवाज सुनिएको छ ।
यसैबीच, अमेरिकी सेन्ट्रल कमान्डले सामाजिक सञ्जालमार्फत आफ्ना सेनाले इरानमाथि आक्रमण गरेको पुष्टि गरेको छ । उसका अनुसार, होर्मुज हुँदै गइरहेका तीनवटा पानीजहाजमाथि इरानले गरेको आक्रमणको जवाफमा उक्त कारबाही गरिएको हो । साथै, अमेरिकाले इरानको आक्रमणलाई युद्धविरामको उल्लंघन भनेको छ ।
यस्तै, उक्त आक्रमणपछि इरानको विदेश मन्त्रालयले अमेरिकाले युद्धविराम उल्लंघन गरेको जनाएको छ । सामाजिक सञ्जाल ट्वीटरमा लेख्दै मन्त्रालयले इरानले आफ्नो राष्ट्रिय हित र सुरक्षाको रक्षाका लागि आवश्यक जुनसुकै कदम चाल्ने चेतावनी दिएको छ ।

काठमाडौं । इरानका दिवङ्गत पूर्व सर्वोच्च नेता आयातोल्लाह अली खामेनीका तीन छोराहरू मसुद, मेसम र मुस्तफा आइतबार उनको शव यात्रामा सहभागी भएका छन् ।
तर खामेनीका छोरा तथा उत्तराधिकारी मोज्तबा खामेनी भने अझै उक्त समारोहमा उपस्थित भएका छैनन् ।
इरानी सरकारी सञ्चारमाध्यमका अनुसार, इजरायलबाट आफ्नो ज्यानमा खतरा रहेको कारण मोज्तबा अन्त्येष्टिमा सार्वजनिक रूपमा सहभागी भएनन् ।
इरान इन्टरनेशनलको एक रिपोर्ट अनुसार, अन्त्येष्टि यात्राका क्रममा सर्वसाधारणहरूले ‘किल ट्रम्प’ र ‘किल बिबी’ (इजरायली प्रधानमन्त्री) लाई मारजस्ता नारा लगाएका थिए । उनीहरूले नेता खामेनीको हत्याको बदला लिनुपर्ने माग गरेका हुन् ।
खामेनीको अन्त्येष्टि यात्रा आज (सोमबार) तेहरानका सडकहरूमा आयोजना हुनेछ । यसमा लाखौं मानिसहरुको सहभागिता हुने इरानी सञ्चारमाध्यमहरुले जनाएका छन् ।
खामेनीको शव बाकसलाई सहरका मुख्य सडकहरू हुँदै लगिनेछ । शव यात्रामा धार्मिक नेताहरू, सरकारी अधिकारीहरू र उच्च सैन्य कमान्डरहरूको उपस्थिति रहनेछ ।