काठमाडौं । नेकपा (एमाले) का महासचिव शंकर पोखरेलले जंगली जनावरका कारण कृषिबालीमा भइरहेको क्षतिबाट किसानलाई जोगाउन ठोस राष्ट्रिय नीति आवश्यक रहेको जनाएका छन् । सामाजिक सञ्जाल फेसबुकमा लेख्दै पोखरेलले यस्तो जनाएका हुन् ।
‘यतिबेला किसानहरु जंगली जनावरले पुर्याएको कृषिबालीको क्षति देखाएर रोइरहेको आक्रोश पोखिरहेको दृष्यले सबैलाई उद्देलित बनाइरहेको छ । तर राज्यका निकायहरु अभिसन्धी र कानूनका कारणले ती दृष्यबाट विमुख भइरहेका छन् । तर यस्तो लाचारी कहिलेसम्म ?’ पोखरेलले भने, ‘अन्तरार्ष्ट्रिय अभिसन्धि र कानुनको बहाना देखाएर किसानलाई आफ्नै थातथलो र खेतीपातीबाट बेदखल गर्ने काम न्यायोचित होइन ।’
महासचिव पोखरेलले बाँदर, बँदेल र दुम्सी लगायतका जंगली जनावरको आतंकका कारण कृषिकर्ममा आश्रित किसान विस्थापित हुने अवस्था सिर्जना भएको जनाए । किसानहरू बाली नष्ट भएको पीडा पोखिरहे पनि राज्यका निकायहरू अन्तर्राष्ट्रिय अभिसन्धि र कानुनी व्यवस्थाको बहाना बनाएर समस्या समाधानतर्फ उदासीन रहेको उनको भनाई छ ।
पोखरेलले संरक्षणका नाममा किसानलाई आफ्नै थातथलो र खेतीपातीबाट बेदखल गर्न नहुने जनाउँदै प्रकृति र मानवबीच सन्तुलन आवश्यक भए पनि त्यसले मानिसकै उठिबास लाग्ने अवस्था सिर्जना गर्न नहुने जनाए।
उनले जंगली जनावरबाट बढ्दो क्षति रोक्न सर्वदलीय बैठक बोलाई साझा राष्ट्रिय दृष्टिकोण तयार गर्न आग्रह गरेका छन् । संरक्षण क्षेत्रभित्रका पशुपन्छीको संरक्षणमा विशेष जोड दिनुपर्ने तर कृषिक्षेत्रका लागि छुट्टै नीति, कानुन र संरक्षणका उपाय अवलम्बन गर्नुपर्ने पोखरेलको भनाई छ ।
किसान र कृषि उत्पादन दुवैलाई संरक्षण गर्नेगरी नीति निर्माण गर्न ढिलाइ भइसकेको उल्लेख गर्दै महासचिव पोखरेलले अब तत्काल पहल गर्नुपर्ने आवश्यकता औंल्याएका छन् ।
