काठमाडौं। एनएमबि बैंक, लुम्बिनी विकास बैंक र साना किसान लघुवित्त वित्तीय संस्थाले वार्षिक साधारण सभा डाकेका छन्।
लुम्बिनी विकास बैंकले पुस २६ गते सभा डाकेको छ। सभाले ४.५० प्रतिशत नगद लाभांश र ४ प्रतिशत बोनस सेयरको प्रस्ताव पारित गर्ने छ। त्यसपछि पुँजी ३ अर्ब ५१ करोड रुपैयाँ नाघ्ने छ। सभाले मर्जर तथा प्राप्तिको एजेण्डालाई त्यागेको छ।
साना किसानले १५ प्रतिशत लाभांश पारित गर्दैछ। संस्थाले पुस २९ गते वार्षिक साधारण सभा डाकेको छ। यसमध्ये १४.२५ प्रतिशत बोनस सेयर हो।
सभाले संस्थापक सेयरधनीबाट चार जना र साधारण सेयरधनीबाट २ जना सञ्चालक चयन गर्ने छ।
यसैगरी एनएमबि बैंकले पुस २६ गते वार्षिक साधारण सभा डाकेको छ। यसपालि सञ्चालक चयन र नियमित एजेण्डा छन्। लाभांश एजेण्डा छैन।
सभाले २ जना संस्थापक सेयरधनीबाट सञ्चालक चयन गर्ने छ। तीन जना साधारण सेयरधनीबाट सञ्चालक चयन गर्ने छ।

काठमाडौं । नविल बैंक र उपाय बिजनेस सोलुसन्सबीच बैंकका ग्राहकको आवश्यकता अनुसार उपाय प्लेटफर्ममा उपलब्ध विभिन्न सेवाहरु प्रदान गरेर बैंकका ग्राहकलाई सहयोग गर्ने सम्झौता भएको छ ।
यस साझेदारी अन्तर्गत, बैंकका ग्राहकले कर्जाका लागि आवश्यक प्रारम्भिक कागजात तयार गर्न तथा व्यवसायका लागी वित्तीय व्यवस्थापन, कानूनी र कर व्यवस्थापन गर्नका लागी उपाय विजनेश सोलुसन्सको सेवा लिन सक्ने बैंकले जानकारी दिएको छ । उपायले व्यवसायिक सेवाको बारेमा सजिलो र पारदर्शी समाधान प्रदान गर्नुको साथै बैंकका ग्राहकलाई आवश्यक बमोजिम क्षेत्रगत विशेषज्ञको सेवा उपलब्ध गराउने जनाएको छ ।
नविल बैंकका एसएमई,एमएम र एसबी प्रमुख अमित श्रेष्ठ तथा उपाय बिजनेश सोलुसन्सकी प्रमुख कार्यकारी अधिकृत शोभा श्रेष्ठले सम्झौतापत्रमा हस्ताक्षर गरेका छन् ।
साझेदारीको बारेमा बोल्दै नबिलका एसएमई प्रमुख श्रेष्ठले भने, ‘नविल बैंक, साना तथा मझौला उद्यमीहरुलाई वित्तीय पहुँचमा वृद्धि तथा समग्र अर्थतन्त्रको विकास गर्नका लागि आकर्षक ब्याजदरमा यथाशिघ्र ऋण उपलब्ध गराउनुका साथै विभिन्न सुविधाहरू र सेवाहरू उपलब्ध गराउन सधैं अग्रसर रहेकोछ। हामीलाई आशा छ कि यो साझेदारीले साना तथा मझौला उद्यमीहरुको वित्तीय व्यवस्थापन पूर्णता प्रधान गर्नेछ।’
उपाय बिजनेश सोलुसन्सकी प्रमुख कार्यकारी अधिकृत श्रेष्ठले भनिन्, ‘नविल बैंकसँगको सहकार्यले उद्यमीहरूलाई निकै फलदायी हुनेछ ।’

काठमाडौँ । नेपालको पहिलो डिजिटल वालेट आइएमई पे ‘भिजा पार्टनरसिप’ अवार्डबाट सम्मानित भएको छ ।
काठमाण्डौंमा आयोजित भिजा लिडरसिप कन्क्लेभ २०२३ मा भिजाले उत्कृष्ट फिनटेक कम्पनीको रूपमा आइएमई पे लाई ‘एक्सिलेन्स इन फिनटेक पार्टनरसिप’ अवार्डबाट सम्मानित गरेको हो ।
यो अवार्डले फिनटेक उद्योगमा प्राविधिक उत्कृष्टता मार्फत वित्तिय पहुँचको विस्तार गर्नुका साथै नवप्रवर्तनका लागि आइएमई पे र भिजा बिचको बलियो साझेदारीलाई प्रतिबिम्बित गर्दछ ।
आइएमई पे ले हाल भिजासंगको सहकार्यमा भर्चुअल तथा फिजिकल कार्ड प्रयोगमा ल्याएर नेपालको फिनटेक क्षेत्रमै नयाँ बेन्च मार्क सेट गरेको छ । आगामी दिनमा पनि भिजासंगको सहकार्यमा बिभिन्न नवप्रवर्तनात्मक सेवाहरु लिएर आउने जानकारी आइएमई पे का प्रमुख कार्यकारी अधिकृत प्रवीण रेग्मीले जानकारी गराए ।