काठमाडौं । चारवटा संसदीय समितिको बैठक आज बस्दै छ । कानुन, न्याय तथा संसदीय मामिला समितिको बैठक बिहान ८ बजेका लागि तय गरिएको छ । बैठकमा केही नेपाल ऐनलाई संशोधन गर्न बनेको विधेयकको सम्बन्धमा सरोकारवाला, संघ, संस्थालगायतसँग छलफल हुनेछ ।
बिहान ११ बजे कृषि, सहकारी तथा प्राकृतिक स्रोत समितिको बैठक बस्दै छ । बैठकमा खाद्य स्वच्छता तथा गुणस्तर विधेयकमा संशोधन राख्ने संशोधनकर्ता सदस्यहरुसँग छलफल गर्ने कार्यसूची छ ।
शिक्षा, स्वास्थ्य तथा सूचना प्रविधि समितिको बैठकमा बिहान ११ बजे बस्नेछ । नेपाल ऐनलाई संशोधन गर्न बनेको विधेयकको सम्बन्धमा सरोकारवाला संघसंस्थासँग छलफल हुने जनाईएको छ ।
दिउँसो साढे १ बजे राष्ट्रिय सरोकार तथा समन्वय समितिको बैठक बस्नेछ । बैठकमा नेपालमा जनसंख्याको हालको अवस्थाअनुसार जनसंख्या नीतिमा गर्नुपर्ने पुनरावलोकन र सरकारको तयारी सम्बन्धमा छलफल हुने संसद् सचिवालयले जानकारी दिएको छ ।

तनहुँ । तनहुँमा मिनी ट्रकसँग ठक्कर खाँदा मोटरसाइकल चालकको मृत्यु भएको छ । मृत्यु हुनेमा आबुखैरेनी गाउँपालिका वडा नं. ३ बस्ने २६ वर्षीय सफल राना मगर रहेका छन् ।
जिल्ला प्रहरी कार्यालय तनहुँका प्रहरी नायव उपरीक्षक मोहन बहादुर खाँणका अनुसार आइतबार राति पृथ्वीराजमार्ग सडक खण्डमा आँबुखैरेनीबाट डुम्रे तर्फ आउँदै गरेको ग १ क ५०१२ नं.को मिनी ट्रक र सोही दिशा तर्फ आउँदै गरेको प्र.३ ०२ ००९ प ८५३० नं. को मोटरसाइकल ठक्कर खाई दुर्घटना भएको थियो ।
दुर्घटनामा घाइते भएका मगरलाई उपचारको लागी आबुखैरेनी अस्पताल आँबुखैरेनी तनहुँ पठाएकोमा थप उपचारको लागी पुरानो मेडिकल कलेज भरतपुर चितवन लगेकोमा चिकित्सकले मृत घोषणा गरेका थिए ।
मिनी ट्रक र त्यसका चालक ईलाका प्रहरी कार्यालय आबुखैरेनी तनहुँको नियन्त्रणमा रहेको खाँणले जानकारी दिए । उक्त घटना सम्बन्धमा थप अनुसन्धान कार्य भइरहेको पनि उनको भनाई छ ।

काठमाडौं । निर्वाचन आयोगले राष्ट्रिय सभा सदस्य निर्वाचनको परिणामसहितको प्रतिवेदन राष्ट्रपति रामचन्द्र पौडेल समक्ष बुझाएको छ।
राष्ट्रपति कार्यालयका प्रवक्ता शैलजा रेग्मी भट्टराईका अनुसार प्रमुख निर्वाचन आयुक्त दिनेशकुमार थपलियाले आइतबार राष्ट्रपति कार्यालयमा पुगेर प्रतिवेदन बुझाए।
निर्वाचन ऐन, २०७५ को दफा ६० बमोजिम प्रमुख आयुक्त थपलियाले राष्ट्रिय सभा सदस्य निर्वाचन, २०८० को निर्वाचन परिणाम सहितको प्रतिवेदन बुझाएका हुन्।
रिक्त १९ सिटका लागि राष्ट्रिय सभाको निर्वाचन माघ ११ गते सम्पन्न भएको थियो।

काठमाडौं । प्रधानमन्त्री पुष्पकमल दाहाल प्रचण्डले यसअघि छुट भएका थप तीन हजार सहिदको नाम क्याबिनेटबाट निर्णय भइसकेको र अब राजपत्रमा प्रकाशित हुने उदघोष गरेका छन्।
शनिबार सहिद प्रतिष्ठान नेपालको १४ औं वार्षिक साधारण सभामा सम्बोधन गर्दै उनले भने, ‘छुट भएका झन्डै तीन हजार सहिद घोषणा क्याबिनेटबाट निर्णय भइसकेको छ। गृह मन्त्रालयबाट प्रमाणित भइसकेको छ। अब त्यो राजपत्रमा प्रकाशित गर्नका लागि अगाडि बढिसकेको छ।’
प्रधानमन्त्री प्रचण्डले अझै केही छुट भएको छ भने बाँकीको पनि सूचीकृत गरिने जानकारी दिए। उनले यो निर्णय आफैंमा सामान्य निर्णय नभएको पनि दाबी गरे। ‘यसले हाम्रो क्रान्तिलाई सम्मानित गरेको छ। युद्धलाई सम्मानित गरेको छ। र सहिदहरूलाई राष्ट्रिय सहिदको रुपमा सम्मानित गरेको छ। हामी बाँचेकाहरूको एउटा ठूलो जिम्मेवारी यो निर्णयले पूरा गराएको छ’, उनले भने।
१५, १६ वर्षअघि घोषणा गरिएका सहिदहरू औपचारिक रुपमा राष्ट्रिय दर्जा प्राप्त गर्न नसकेको उनको भनाइ थियो। ‘किनभने त्यसलाई औपचारिक ढंगले दर्ता नगरिएको हुनाले, त्यसलाई राजपत्रमा प्रकाशित नगरिएको हुनाले, राष्ट्रिय सहिदको मान्यता प्राप्त गर्न हाम्रा हजारौं सहिदहरू बञ्चित भए’, उनले भने। यसपटक आफूले त्यही अधुरो कामलाई पूरा गर्नैपर्छ भन्ने संकल्प लिएकाले जनयुद्ध र जनआन्दोलनका सहिदहरूलाई राष्ट्रिय सहिदको रुपमा सम्मान गर्ने काम पूरा भएको जनाए।
उनले जनयुद्धको विषयलाई, सहिदहरूको विषयलाई, बेपत्ता योद्धाहरूको विषयलाई टुंगो लगाउन आफूले नेतृत्व गर्नैपर्छ भन्ने संकल्प लिएर अगाडि बढेको जनाए। त्यही संकल्पकै कारण जनयुद्ध दिवस घोषणा गरिएको उनको भनाइ छ। त्यसको विरोध भएको भए पनि त्यसो गर्नु आफ्नो र आफूहरूको आन्दोलनको जिम्मेवारी भएको उनको भनाइ छ।