काठमाडौं । महालक्ष्मी विकास बैंकको प्रमुख कार्यकारी अधिकृतमा दिपेश लम्साल नियुक्त भएका छन् । माघ २३ गते बसेको सञ्चालक समितिको निर्णय अनुसार बैंकले लम्साललाई प्रमुख कार्यकारी अधिकृतको रुपमा नियुक्त गरेको हो ।
बैंकको वरिष्ठ नायव प्रमुख कार्यकारी अधिकृत पदमा रहेका लम्साल तत्कालीन प्रमुख कार्यकारी अधिकृतको राजीनामा पश्चात संचालक समितिको निर्णय बमोजिम निमित्त प्रमुख कार्यकारी अधिकृतको भुमिकामा रहेका थिए ।
बैंकको तर्फबाट केन्द्रीय कार्यालय, दरबारमार्गमा स्वागत कार्यक्रम सम्पन्न गरिएको छ । उक्त कार्यक्रममा नवनियुक्त प्रमुख कार्यकारी अधिकृत लम्सालले बैंक प्रतिको जनविश्वास, निष्ठा कायम राख्दै गुण्स्तरीय सेवा प्रदान गर्न सदा तत्पर रहने प्रतिबद्धता ब्यक्त गरे ।
उनले बैंकको लक्ष्य र उद्देश्य प्राप्तिका लागि सम्पूर्ण कर्मचारीलाई प्रयत्नशिल रहन समेत अनुरोध गरेका छन् ।
विगत १५ वर्ष देखि महालक्ष्मी विकास बैंकमा कार्यरत लम्सालसँग विभिन्न वाणिज्य बैंक तथा विकास बैंकमा गरी करिब २८ वर्षको बैकिङ्ग अनुभव रहेको छ ।

काठमाडौं । एनएलजी इन्स्योरेन्स कम्पनी लिमिटेडको शेयर मूल्य समायोजन भएको छ ।
उक्त कम्पनीले शेयरधनीहरुलाई ५.५० प्रतिशत बोनस शेयर दिने भएपछि प्रतिशेयर मूल्य रु. ७८१.९९ कायम गरिएको नेप्सेले जानकारी दिस्एको छ । यसअघि रु. ८२५ थियो ।
समायोजन गरिएको मूल्यबाट भोलि बिहीबारदेखि उक्त कम्पनीको शेयर कारोबार हुनेछ ।

काठमाडौं । शेयर बजार बिस्तारै बिस्तारै माथि चढिरहेको छ । आज लगातार तेस्रो दिन बजार उचालिएको हो ।
नेपाल स्टक एक्सचेञ्ज लिमिटेड (नेप्से) का अनुसार आज बजार ४.९२ अंकले बढेको हो । ०.२३ प्रतिशतले बजार बढ्दा नेप्से परिसूचक २०९०.६४ अंकमा उक्लिएको छ ।
आज ३१३ कम्पनीका ७७ लाख ३२ हजार २ सय ३४ कित्ता शेयर किनबेच हुँदा २ अर्ब ८४ करोड २५ लाख ५० हजार २ सय ३७.४७ रुपियाँ बराबरको कारोबार भएको छ ।
बजार उचालिएको दिन विभिन्न ५ कम्पनीमा पोजेटिभ सर्किट लाग्यो । गुराँस लघुवित्त, समाज लघुवित्त, बुद्धभूमि हाइड्रो, इस्टर्न हाइड्रोको शेयर मूल्य १०–१० प्रतिशत र एशियन हाइड्रोको शेयर मूल्य ९.९९ प्रतिशतले बढेको हो ।
त्यस्तै आज एनसीसी डिबेञ्चर २०८६ का लगानीकर्ताहरुले सबैभन्दा बढी ५.२५ प्रतिशतले घाटा व्यहोरेका छन् ।
आज पनि हिमालयन रि कै उच्च कारोबार भएको छ । उक्त कम्पनीको २४ करोड ८२ लाख ६८ हजार ३८.९० रुपियाँ बराबरको शेयर किनबेच भएको नेप्सेले जानकारी दिएको छ ।
साताको पहिलो दिन आइतबार ५.३१ अंकले बजार घट्दा ३ अर्ब २१ करोड ६७ लाख २७ हजार २ सय २१.७९ रुपियाँ, सोमबार १४.५७ अंकले बजार बढ्दा २ अर्ब ४३ करोड ८० लाख ५८ हजार २ सय ५४.५६ रुपियाँ र हिजो मंगलबार ७.६३ अंकले बजार बढ्दा २ अर्ब ५९ करोड १५ लाख ३४ हजार ९ सय ७.७६ रुपियाँ बराबरको कारोबार भएको थियो ।

काठमाडौं । नेपाल लाइफ इन्स्योरेन्सको खुद नाफा १३ प्रतिशतले बढेको छ । चालू आर्थिक वर्ष २०८०, ८१को दोस्रो त्रैमासमा कम्पनीको खुद नाफा १३ प्रतिशत बढेर ४२ करोड ७७ लाख रुपियाँ पुगेको छ । गत वर्षको सोही अवधिमा कम्पनीले ३७ करोड ८८ लाख रुपियाँ खुद नाफा गरेको थियो ।
त्यस्तै, समीक्षा अवधिमा कम्पनीको खुद बीमाशुल्क आर्जन ७.१३ प्रतिशत बढेर १९ अर्ब ७१ करोड २३ लाख रुपियाँ पुगेको छ । गत आवको सोही अवधिमा खुद बीमाशुल्क आर्जन १८ अर्ब ४० करोड रुपियाँ थियो ।
कम्पनीको खुद दाबी भुक्तानी पनि बढेको छ । चालू आवको पुस मसान्तसम्ममा यस्तो भुक्तानी १०.८८ प्रतिशतले बढेर २४ अर्ब ९५ करोड ९० लाख रुपियाँ कायम भएको छ । गत आवको सोही अवधिमा कम्पनीले २२ अर्ब ५१ करोड ५ लाख रुपियाँ दाबी भुक्तानी गरेको थियो ।
दोस्रो त्रैमाससम्मा कम्पनीको कुल आम्दानी १०.७१ प्रतिशत बढेर २९ अर्ब ५४ करोड ८२ लाख रुपियाँ पुगेको छ । गत आवमा भने कम्पनीले २६ अर्ब ६८ करोड ९१ लाख रुपियाँ कुल आम्दानी गरेको थियो ।
कम्पनीको कुल खर्च बढेर २७ अर्ब २९ करोड ५९ लाख रुपियाँ पुगेको छ । गत आवको सोही अवधिमा कम्पनीले २४ करोड ८८ लाख रुपियाँ कुल खर्च गरेको थियो ।
समीक्षा अवधिमा कम्पनीको चुक्ता पुँजी ८ अर्ब २० करोड रुपियाँ, शेयर प्रिमियम ४ करोड ३८ लाख रुपियाँ, महाविपत्ति कोष १ अर्ब ४ करोड रुपियाँ, र जीवन बीमा कोष १ खर्ब ८३ अर्ब ६५ करोड रुपियाँ पुगेको छ ।
पुस मसान्तसम्ममा कम्पनीको प्रतिशेयर आम्दानी १०.४२ रुपियाँ, प्रतिशेयर नेटवर्थ १२८.०१ रुपियाँ र मूल्य आम्दानी अनुपात ६२.८६ गुणा छ ।