काठमाडौं । राष्ट्रिय सभाको बैठक आज बस्दैछ । बैठकले फागुन २९ गते हुने राष्ट्रिय सभा अध्यक्षको निर्वाचनको दिन र समय निर्धारण गर्ने छ । बैठक दिउँसो १ बजे संघीय संसद् भवन नयाँबानेश्वरमा बोलाइएको जानकारी दिईएको छ ।
आइतबारको बैठकमा बैठकको अध्यक्षता गर्ने सदस्यहरूको नाम मनोनयन गर्ने पहिलो कार्यसूची छ ।
यस्तै, बैठकमा राष्ट्रिय सभाको अध्यक्षको निर्वाचनका लागि मिति र समय पनि तोकिने संघीय संसद सचिवालयले जानकारी दिएको छ ।
अध्यक्षले विषयगत समितिमा रहेका सदस्यहरुको नाम हेरफेर तथा मनोनयनका लागि प्रस्ताव गर्ने कार्यसूचीमा उल्लेख छ । तर, सभाका अध्यक्षको पद रिक्त रहेकाले कार्य उपाध्यक्ष उर्मिला अर्यालले गर्नेछिन ।
यसअघि माघ २१ गते बसेको कार्यव्यवस्था परामर्श समितिको बैठक फागुन २९ गते अध्यक्षको चुनाव गर्ने र त्यसका लागि फागुन २७ गते राष्ट्रिय सभा अध्यक्षको निर्वाचनको दिन र समय तोक्ने कार्यसूची बनाएको थियो ।
राष्ट्रिय सभाका अध्यक्ष गणेशप्रसाद तिमिल्सिनाको कार्यकाल २० फागुनमा सकिएको छ । राष्ट्रिय सभाका रिक्त २० सिटमध्ये १९ सिटका लागि माघ ११ गते निर्वाचन भई नयाँ सदस्य चयन भएर आइसकेका छन् ।
अध्यक्ष पदका लागि नेकपा (माओवादी) र उपाध्यक्ष नेकपा (एमाले) ले लिने गरी राजनीतिक सहमति भैसकेको छ ।
माओवादीले अध्यक्षको नाम आजै टुंग्याउने तयारी गरेको छ ।
आजको बैठकमा आगामी आर्थिक वर्ष २०८१–०८२ का लागि विनियोजन विधेयकका सिद्धान्त र प्राथमिकतामाथि पनि छलफल गर्ने कार्यसूचीमा उल्लेख छ ।

काठमाडौं । पूर्वप्रधानमन्त्री एवम् नेकपा एकीकृत समाजवादीका सम्मानित नेता झलनाथ खनालले नयाँ गबन्धन सरकारलाई जनताको अवस्था परिवर्तन गर्ने गरी काम गर्न सुझाव दिएका छन् ।
पूर्वप्रधानमन्त्री खनालले नयाँ गठबन्धन सरकारलाई शुभकामना दिंदै ‘व्यवस्था परिवर्तन भयो तर जनताको अवस्था परिवर्तन भएन’ भन्ने गुनासो सम्बोधन गर्न सुझाव दिएका हुन् ।
जनताको गुनासो सम्बोधनका लागि सरकारले श्रमजीवी, भूमिहीन, गरीब र सुकुमबासी जनताका समस्याहरू समाधान गर्न भूमिसुधार गर्नुपर्ने, कृषि उत्पादनलाई व्यापक बनाउने, कृषि क्रान्तिलाई अघि बढाउनुपर्ने, मुलुकलाई राष्ट्रिय औद्योगिकरणको दिशामा अघि बढाउनुपर्ने जनाएका छन् ।
शिक्षा र स्वास्थ्यमा आमूल परिवर्तन गर्नुपर्ने, मंहगी र मूल्य वृद्धिलाई नियन्त्रण गर्नुपर्ने, भ्रष्टाचारीलाई निर्ममतापूर्वक नियन्त्रण गर्नुपर्ने, हर क्षेत्रमा रोजगारी सिर्जना गर्नुपर्ने, राष्ट्रिय अर्थतन्त्रको हित अनुरूप भन्सार नीति बनाउनुपर्ने उनको भनाइ छ ।
उनले वित्तीय र मौदिकि नीतिमा सुधार गर्नुपर्ने, राष्ट्रिय उद्यमहरूको संरक्षण गर्नुपर्ने, देशको निजामती र जङ्गी प्रशासनलाई लोकतान्त्रिकरण गर्नुपर्ने, सर्बत्र सुशासन कायम गर्नुपर्ने, राज्यले दिने सेवालाई प्रभावकारी बनाउनुपर्ने, हाम्रा दुवै छिमेकीहरूबाट निर्वाध पारबहन सुविधा प्राप्त गर्न पहल गर्न सुझाव दिएका छन् ।
पग्लिरहेको हिमालको संरक्षण गर्नुपर्ने, फैलँदो प्रदूषणबाट वातावरणको संरक्षण गर्नुपर्ने, मुलुकलाई गरिबी उन्मुलनको दिशामा अघि बढाउनुपर्ने र , मुलुकको विकास निर्माणको कामलाई तीव्रता प्रदान गर्नुपर्ने, मुलुकको भूभाग र सीमानाको दृढतापूर्वक रक्षा गर्नुपर्ने चुनौतीपूर्ण कामहरुलाई नयाँ सरकारले कार्यभारका रुपमा लिनुपर्ने उनले जानकारी दिएका छन् ।

काठमाडौँ । नेकपा माओवादी केन्द्रको संसदीय दलको बैठक आज बस्ने भएको छ । बैठक दिउँसो ३ बजे सिंहदरबार स्थित माओवादी संसदीय दलको कार्यालयमा बस्ने छ ।
माओवादीका प्रमुख सचेतक हितराज पाण्डेले बैठकमा पछिल्लो पटक विकसित राजनीतिक घटनाक्रमबारे छलफल हुने जानकारी दिएका छन । उनका अनुसार प्रधानमन्त्री दाहालले सांसदबाट विश्वासको मत लिने विषयमा पनि बैठकमा छलफल हुनेछ ।
२१ गते प्रधानमन्त्री दाहालले कांग्रेससँगको तत्कालीन सत्ता गठबन्धन तोडेर नयाँ सत्ता समीकरण बनाएपछि प्रतिपक्षमा पुगेको नेपाली कांग्रेसले पनि अर्को समीकरण निर्माणको कसरत गरिरहेको छ ।
प्रधानमन्त्री प्रचण्ड जतिसक्दो छिटो प्रतिनिधिसभाबाट विश्वासको मत लिने तयारीमा छन् । यसबारे माओवादीले आजको दलको बैठकमा छलफल गर्ने जनाईएको छ।

काठमाडौँ । नेकपा एमालेका अध्यक्ष केपी शर्मा ओलीले आफ्नो पार्टीबाट मन्त्री भएकाहरूलाई राम्रो काम गर्न निर्देशन दिएका छन् । अध्यक्ष ओलीले बिहीबार साँझ मन्त्री दम्पतीलाई बालकोट बोलाएर राम्रो काम गर्न निर्देशन दिएका हुन् ।
‘राम्रोसँग काम गर्नु । राम्रो डेलिभरी दिनुपर्छ । राम्रो कुरा सुन्न पाउँ,’। फागुन २१ मा नयाँ सत्ता समीकरण बनेपछि माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारमा एमालेबाट सचिव रघुवीर महासेठको नेतृत्वमा आठ जना मन्त्री सरकारमा सहभागी छन् ।
सचिव महासेठ उपप्रधान तथा भौतिक ,पदम गिरी कानुन, ज्वालाकुमारी साह कृषि, बलराम अधिकारी भूमि व्यवस्था, दामोदर भण्डारी उद्योग, भगवती चौधरी महिला, राजेन्द्रकुमार राई खानेपानी र हरिप्रसाद उप्रेती रक्षा मन्त्री छन् ।
ओलीले आफ्नो निवासमा बोलाएर मन्त्री दम्पतीलाई ‘हाइ टी’ पनि दिएका थिए । मन्त्री भएपछि लोभ पलाउने भन्दै विभिन्न कुराहरूबाट जोगिएर काम गर्न मन्त्री दम्पतीलाई ओलीको निर्देशन थियो । ‘मन्त्री भएपछि मन्त्री मात्र होइन मन्त्रीको परिवार पनि गाँसिएको हुन्छ । कता के हुन्छ ? लोभ पलाउँछ । कुन्नी के हुन्छ ? त्यस्तो कुराहरूबाट जोगिएर मेरो ठुलो जिम्मेवारी छ भन्ने कुरा बुझेर काम गर्नुहोला ,’ मन्त्री दम्पतीलाई ओलीको निर्देशन थियो ।
एमालेका आठ जना मन्त्रीमध्ये कृषि मन्त्री साह मात्र एक्लै बालकोट पुगेकी थिइन् भने बाँकी सात जना मन्त्री दम्पतीसहित पुगेका थिए ।

काठमाडौँ । महाशिवरात्रि पर्वका अवसरमा राष्ट्रपति रामचन्द्र पौडेलले पशुपतिनाथ मन्दिरको दर्शन गरेका छन् ।
शुक्रबार आराध्यदेव भगवान् पशुपतिनाथको दर्शनका लागि राष्ट्रपति पौडेलले पशुपतिनाथ मन्दिर पुगेका हुन् । उनले पशुपतिनाथ मन्दिरमा पूजा–अर्चना गरेका छन् । महाशिवरात्रि पर्वमा राष्ट्र प्रमुखले पशुपतिनाथ मन्दिरमा पूजा गर्ने प्रचलन रहेको छ ।
शुक्रबार महाशिवरात्रि पर्व देशभरका शिवालयमा विधिपूर्वक पूजा, आराधना गरी मनाइँदै छ ।