काठमाडौं । प्रभु बैंकले आफ्ना कर्मचारी तथा ग्राहकवर्गहरुलाई विशेष छुट प्रदान गर्न मुस्ताङमा रहेका विभिन्न होटलहरुसँग सम्झौता गरेको छ । बैंकले विभिन्न १० भन्दा धेरै होटेलका संचालकहरुसँग छुट्टाछुट्टै समारोहमा सम्झौता गरेको हो।
प्रभु बैंकका तर्फबाट जोमसोम क्लष्टर शाखा प्रमुख नरेन्द्र थकालीसहित विभिन्न शाखाका प्रमुखहरुले सम्झौतापत्रमा हस्ताक्षर गरेका छन् । उक्त सम्झौता अनुसार प्रभु बैंकका कर्मचारी तथा ग्राहकहरुले बैंकसँगको आबद्धता प्रमाणका आधारमा ती होटलहरुमा आवास, खाना, खाजा तथा होटलमा उपलब्ध सम्पूर्ण सेवा सुविधाहरुमा विशेष छुट प्राप्त गर्नसक्ने छन् ।
सम्झौता अनुसार बैंकका ग्राहक तथा कर्मचारीहरुका लागि आवास तथा खानामा ती होटलले १० प्रतिशतसम्म छुट दिने सहमति भएको छ ।
प्रभु बैंकले सम्झौता गरेका होटल तथा रेस्टुरेन्टहरुमा होटल डे पुराङ, युरिका इन मुक्तिनाथ, होटल ग्रान्ड साम्बाला, मुक्तिनाथ होटल सनराइज, जोमसोम एयरपोर्ट, होटल मन्डला लोमान्थाङ, होटल त्रिवाटिका, इको हिल रिसोर्ट, होलिडे क्याम्प, होटल ताङसारा, लुम्बिनी एन्ड रेस्टुरेन्ट, सी यु लज एन्ड रेस्टुरेन्ट र मार्फा अर्कार्ड होटल रहेका छन् ।

काठमाडौं । दुई दिन लगातार झिनो सुधार देखिएको शेयर बजारमा आज दोहोरो अंकको गिरावट आएको छ ।
नेपाल स्टक एक्सचेञ्ज लिमिटेड (नेप्से) का अनुसार आज बजार ११.६० अंकले तल झरेको हो । ०.५६ प्रतिशतले बजार घट्दा नेप्से परिसूचक २०६०.१६ अंकमा झरेको छ ।
समग्रमा बजार घटे पनि वित्त, म्युचुअल फण्ड र ट्रेडिङ समूह क्रमशः ०.४५, ०.१४ र ०.२२ प्रतिशतले बढेका छन् । अरु राताम्मे भएका छन्, सबैभन्दा बढी विकास बैंक समूह १.०३ अंकले घटेको छ ।
आज ३०५ कम्पनीका ८७ लाख २७ हजार १ सय ६४ कित्ता शेयर किनबेच हुँदा ४ अर्ब ५ करोड ८० लाख ४७ हजार ७ सय ३४.२२ रुपियाँ बराबरको कारोबार भएको हो ।
सबैभन्दा बढी नेपाल फाइनान्स लिमिटेडका लगानीकर्ताहरुले ९.५५ प्रतिशतले नाफा कमाएका छन् भने साधना लघुवित्तका लगानीकर्ताहरुले सबैभन्दा बढी ६.३८ प्रतिशतले घाटा व्यहोरेका छन् ।
त्यस्तै नेपाल फाइनान्सको आज उच्च कारोबार भएको छ । उक्त कम्पनीको १६ करोड ४६ लाख १८ हजार ८ सय ३०.३० रुपियाँ बराबरको कारोबार भएको नेप्सेले जानकारी दिएको छ ।
साताको पहिलो दिन आइतबार शेयर बजार ५.३७ प्रतिशतले घट्दा ४ अर्ब ३७ करोड, ४५ लाख ९७ हजार ४ सय ५८.६५ रुपियाँ, सोमबार बजार ३.२१ अंकले बढ्दा ५ अर्ब ७ करोड ७२ लाख ५५ हजार १ सय १६.१५ रुपियाँ र हिजो मंगलबार बजार ५.६० अंकले बढ्दा ४ अर्ब १८ करोड ७७ लाख ९६ हजार ८ सय ३३.८९ रुपियाँ बराबरको कारोबार भएको थियो ।