काठमाडौं । राष्ट्रिय स्वतन्त्र पार्टी रास्वपाले केन्द्रीय समितिको बैठक आह्वान गरेको छ ।
केन्द्रीय समितिको बैठक कात्तिक २४ गते शनिबारको दिन बिहान साढे ११ बजे पार्टी केन्द्रीय कार्यालय बनस्थलीमा बस्न लागेको हो ।
बैठकमा आगामी मंसिर १६ गते हुने स्थानीय तह उपनिर्वाचन, समसामयिक राजनीतिक गतिविधि, पार्टीको सांगठनिक गतिविधि लगायतका विषयमा छलफल हुने कार्यसूची छ ।
यसैगरी आगामी राजनीतिक सहकार्यका न्यूनतम मुद्दा र संघर्षका मोडालिटी पनि बैठकको एजेण्डामा राखिएको रास्वपाका कार्यवाहक प्रवक्ता मनिष झाले जानकारी दिए ।

काठमाडौँ । नेकपा माओवादी केन्द्रले पदाधिकारी बैठक बोलाएको छ । आइतबार दिउँसो ३ बजे पेरिसडाँडामा बस्ने गरी बैठक बोलाइएको सचिव दिननाथ शर्माले जानकारी दिए ।
बैठकले केन्द्रीय समिति बैठकबारे निर्णय गर्ने जनाईएको छ । साथै बैठकमा उपनिर्वाचनको तयारी, पछिल्लो राजनीति घटनाक्रमलगायतका विषयमा छलफल हुनेछ ।
आगामी मङ्सिर १६ गते स्थानीय तह उपनिर्वाचन हुन गइरहेको छ । राजनीतिक दलका गतिविधि उपनिर्वाचन लक्षित हुन थालेका छन् ।

काठमाण्डौं । पार्टीलाई थप सक्रिय बनाउने उद्देश्यका साथ नेपाली कांग्रेसले सुरु गरेको १०० दिने अभियान फेरि सुरु हुने भएको छ ।
बाढीपहिरोको विपद्पछि असोज १३ गतेदेखि रोकिएको सय दिने अभियान छठपछि पुनः गर्न लागेको कांग्रेसले जानकारी दिएको छ । असोज १२ र १३ गते आएको बाढीपहिरोका कारण कार्यसम्पादन समितिले अभियान स्थगित गरेको थियो । बाढीपहिरोले वितण्डा मच्चाएपछि कांग्रेसले अभियान स्थगित गरेर राहत र उद्धारमा लाग्न कार्यकर्तालाई निर्देशन दिएको थियो ।
स्थगित अभियान छठ लगत्तै सुरु हुने मुख्यसचिव कृष्णप्रसाद पौडेलले जानकारी दिए । उनका अनुसार बाढीपहिरोका कारण रोकिएको अभियान चाडपर्व सकिएपछि फेरि सुरु हुनेछ ।
बाढीपहिरोका कारण उपत्यकासहित केही जिल्लामा अभियान रोकिए पनि हिमाली जिल्लामा अभियान जारी छ ।
अभियानबाट पार्टीको संगठन चलायमान हुने विश्वास कांग्रेसको छ । पार्टीले अघि सारेको नीति, एमालेसँगको सहकार्य, सहकारी प्रकरणलगायतको विषय जनतामाझ लैजान कांग्रेसले अभियान चलाएको हो ।
मंसिर १६ गते हुने स्थानीय तहको उपनिर्वाचन केन्द्रित गरेर चुनाव हुने क्षेत्रमा अभियानमा खटिएका प्रतिनिधिले काम गर्ने मुख्यसचिव पौडेलले जनाए ।

काठमाडौँ । नेकपा एमालेले सचिवालय बैठक बोलाएको छ । स्थानीय उपनिर्वाचनको तयारी र पछिल्लो राजनीतिक घटनाक्रमबारे छलफल गर्न सचिवालय बैठक बोलाइएको एमाले प्रचार विभाग प्रमुख राजेन्द्र गौतमले जानकारी दिए ।
उनका अनुसार कात्तिक २४ गते शनिवार बस्नेगरी सचिवालय बैठक बोलाइएको हो ।
‘कात्तिक २४ गते सचिवालय बैठक बोलाइएको छ । बैठकले उपनिर्वाचन तयारीको विश्लेषणसहित मातहतका पार्टी कमिटीहरूलाई आवश्यक निर्देशन दिन्छ’,गौतमले भने । एमालेले कात्तिक २२ भित्र उपनिर्वाचन हुने स्थानमा उम्मेदवार सिफारिस गरिसक्न निर्देशन दिइसकेको छ ।
मेयर, उपमेयर, अध्यक्ष उपाध्यक्ष र महानगरको वडाध्यक्षका उम्मेदवार प्रदेश र नगरपालिका र गाउँपालिकाका वडाध्यक्षका उम्मेदवार जिल्ला कमिटीलाई छनोट गर्ने अख्तियारी दिएको छ । निर्वाचन आयोगले आगामी मंसिर १६ गते हुने स्थानीय तह उपनिर्वाचनका लागि मंसिर २ गते उम्मेदवारी दर्ताको समय तोकिएको छ ।

काठमाडौं । चीन सरकारले प्रधानमन्त्री केपी शर्मा ओलीलाई भ्रमणको निम्तो पठाएको छ ।
प्रधानमन्त्री ली छ्याङले प्रधानमन्त्री ओलीलाई पत्र पठाउँदै डिसेम्बर २ देखि ६ सम्मको भ्रमण निम्तो दिएका हुन् ।
प्रधानमन्त्री चीन जाने नजाने भन्ने विषय भने टुंगो लागि सकेको छैन ।

पोखरा । राष्ट्रिय स्वतन्त्र पार्टी रास्वपा सभापति रवि लामिछानेलाई म्याद थपका लागि आज कास्की जिल्ला अदालतमा उपस्थित गराइएको छ ।
जिल्ला प्रहरी कार्यालय कास्कीको हिरासतमा रहेका लामिछानेमाथि सहकारी ठगी, संगठित अपराध र सम्पत्ति शुद्धीकरण कसुरमा अनुसन्धान भइरहेको छ ।
कात्तिक २ गते काठमाडौंस्थित रास्वपाको केन्द्रीय कार्यालयबाट पक्राउ परेका लामिछानेमाथि अनुसन्धानका लागि यसअघि दुई पटक म्याद थप भइसकेको छ । पहिलो पटक ६ दिन र दोस्रो पटक सात दिन गरी १३ दिन म्याद थपिएर अनुसन्धान जारी छ ।