काठमाडौं । ६२ वर्षिया दिग्गज हलिउड अभिनेत्री डेमी मूर सन् २०२५ मा संसारकै सबैभन्दा सुन्दर महिला घोषित भएकी छन् । प्रतिष्ठित पिपल म्यागजिनले उनलाई सुन्दर महिला घोषित गर्दै आवरण पृष्ठमा समावेश गरेको छ ।
म्यागजिनसँगको विशेष अन्तर्वार्तामा उनले बुढ्यौली, आत्मसम्मान र हलिउडमा पुनरागमनबारे कुरा गरेकी छन् । एन्जेलिना जोली, बियोन्से, जेन्डाया, कार्दसियन्स, टेलर स्विफ्ट र हदिद दिदीबहिनीको वर्चस्व रहँदै आएको सूचीमा यसपटक मूरले स्थान लिएकी हुन् ।
मूरले अस्करदेखि गोल्डेन ग्लोब अवार्ड पनि जितेकी छन् । यस सिजनमा सबैले अपेक्षा गरेजस्तो मूरले ओस्कार जित्न सकिनन्, तर उनी लोकप्रिय रोजाइ थिइन् । यद्यपि उनले विश्वको सबैभन्दा सुन्दर महिलाको रूपमा उपाधि भने जितिन् ।
यो सम्मान प्राप्त गर्ने उनी सबैभन्दा जेठी मध्ये एक हुन् र पत्रिकाको डिजिटल कभरमा एक अन्तर्वार्ताको साथ देखा परेकी छन्, जसमा उनी यो उमेरमा पनि कसरी शारिरीक निपुणता कायम राख्दै बुढ्यौलीका चुनौतीहरूको सामना गर्छिन् भन्ने बारेमा केन्द्रित छिन् ।
म्यागजिनले मे ५ यो विशेषांक ल्याउँदैछ । जसको कभरमा मूरले आफ्नो शैलीलाई दर्शाउने रोयल ब्लु पोशाक लगाएर आवरणमा सजिएकी छन् । यसबाहेक अभिनेत्री मूर समाजसेवामा पनि सक्रिय छिन् ।
उनी सन् १९९० को दशकका चर्चित हलिउड फिल्महरु घोस्ट, डिस्क्लोजर, अफ फिउ गुड मेनजस्ता फिल्मका लागि परिचित छन् । उनी सन् २०१४ को अप्रिलमा नेपाल आएकी थिइन् ।
भारतमा बेचिएका चार जना नेपाली चेलीलाई उद्धारपछि भैरहवा ल्याइएका थियो र त्यहाँ पुगेर डेमीले उनीहरुलाई भेटिन् । उनले बुद्ध जन्मथलो लुम्बिनी समेत घुमिन् । माइती नेपालमा केही घण्टा बिताएर उनले चेलीबेटी बेचबिखनको अवस्थाबारे बुझेकी थिइन् ।

काठमाडौँ । नेपाली फिचर फिल्म ‘एक्लो’को अभिनेत्री दिया पुनको क्यारेक्टर लुक्स सार्वजनिक गरिएको छ ।
आइतबार निर्माण युनिटले मातातीर्थ औँसी (आमाको मुख हेर्ने दिन) को अवसर पारेर दियाको लुक्सको एक पोस्टर सार्वजनिक गरेको हो । चलचित्र प्रदीप शाहीले निर्देशन गरेका हुन् ।
दियाको चलचित्रमा एउटा समर्पित र मायालु आमाको भूमिका रहेकोले आमाको मुख हेर्ने विशेष दिन पारेर पोस्टर सार्वजनिक गरिएको निर्देशक शाहीले जनाए । शाहीको निर्देशन रहेको यो तेस्रो चलचित्र हो ।
साइन्स फिक्सनमा आधारित रहेर निर्माण गरिएको चलचित्रको पोस्टरमा दीया पुनको नाम एस्ट्रोनट पुन छ । हाल चलचित्रको लण्डनमा पोस्ट प्रोडक्सनको कार्य भइरहेको छ । निर्देशक प्रदीप शाही केही दिन अघि कान्स प्रोड्यूसर्स नेटवर्कका लागि चयन भएका छन् । कान्समा शाही चयन भएसँगै उनको चलचित्र ‘एक्लो’को चर्चा बढेको छ ।
चलचित्रमा प्रदीप खड्का, विजय लामा, सुनील थापा, दिया पुन, बेनिशा हमाल, दिनेश डीसी, कविता नेपाली, सुरज सिङ ठकुरी, त्रिचु राई, कृष्णभक्त महर्जन, विकास अधिकरी, दिग्गज खत्री , विनोद सुवेदी ‘क्षितिज’, श्रीशेष श्रेष्ठ र बाल कलाकार जेमिन श्रेष्ठ र स्योन सविक सिंह लगायत बेलायती अभिनेता जेमी बेकनको अभिनय छ । चलचित्र ‘एक्लो’का निर्माता राजुकुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन हुन् भने कार्यकारी निर्माता विनोद सुवेदी ‘क्षितिज’ रहेका छन् । बाबु श्रेष्ठको छायाङ्कन, राजु तामाङको द्वन्द्व निर्देशन चलचित्रमा छ ।

काठमाडौं । आमाको मुख हेर्ने विशेष दिन मातातीर्थ औँसीको अवसर पारेर गायिका स्मिता दाहालको नयाँ भावनात्मक गीत ‘आमा’ सार्वजनिक गरिएको छ । गीतले आमाको माया, संघर्ष र समर्पणलाई प्रस्तुत गरेको छ ।
शब्द र संगीत चेतन सापकोटा, संगीत संयोजन गोपाल रसाइलीको रहेको गीतमा स्टुडियो डोरेमीमा रेकर्ड भएको हो । गीतको भिडियोमा गायिका स्मिता दाहाल स्वयं र अभिनेता आकाश श्रेष्ठले मुख्य भुमिका छ । बाल कलाकार दीप्शिका श्रेष्ठको समेत सशक्त उपस्थिति भिडियोमा देख्न सकिन्छ ।
छायाङ्कन नवराज उप्रेती र सम्पादन विकास ज्ञवालीको रहेको भिडियोको निर्देशन सुनिल क्षेत्रीले गरेका हुन् ।

काठमाडौं । गणतन्त्र दिवसको विशेष अवसरमा जेठ १५ गते सार्वजनिक प्रदर्शनमा आउन लागेको नेपाली चलचित्र ‘महाभोज’को निर्माण पक्षले आमाहरूलाई समर्पण गर्दै एउटा भावनात्मक भिडियो सार्वजनिक गरेको छ ।
सार्वजनिक भिडियोमा अभिनेता दयाहाङ राई र वरिष्ठ अभिनेत्री वसुन्धरा भुसालको सशक्त अभिनय देख्न सकिन्छ । भिडियोमा भुसालले दिवङ्गत छोराको सम्झना गर्दै भावुक अभिव्यक्ति दिन्छिन् भने, दयाहाङले भुसाललाई आफ्नै आमाजस्तै माया गर्ने भाव प्रस्तुत गरेका छन् । दृश्यमा वसुन्धराले दयालाई केही रकम दिन्छिन्, जसलाई दयाहाङले हल्काफुल्का शैलीमा गर्दै ‘खाइदिन्छु’ भन्छन् । त्यसपछि वसुन्धराले उनलाई इमानदार भएको भन्दै विश्वास प्रकट गर्छिन् । भिडियो अनुसार, रकम सहकारी संस्थामा जम्मा गर्न दिइएको बुझिन्छ ।
चलचित्र ‘महाभोज’को टिजरमा पनि दयाहाङ सहकारीका अध्यक्षको भूमिकामा देखिएका थिए, जहाँ उनले बचतकर्ताहरूको आक्रोशको सामना गरिरहेका छन् । अभिनेता खगेन्द्र लामिछानेले बचतकर्ताको भूमिकामा दयाहाङ प्रति रोष पोख्दै भनिरहेका छन्, ‘मान्छे मार्ने मात्र होइन, मर्न बाध्य बनाउने मान्छे पनि हत्यारा हो ।’ टिजर र पछिल्लो सार्वजनिक भिडियोले चलचित्रको कथा अझ रोचक र जिज्ञासापूर्ण बनाएको अनुभूति दिलाएको छ ।
भिडियोमा लेखिएको सन्देशमा भनिएको छ, ‘सम्पूर्ण आमाहरूको सम्मानमा, चलचित्र ‘महाभोज’ परिवारको तर्फबाट आमाको मुख हेर्ने विशेष अवसर (मातातीर्थ औँसी) को हार्दिक मङ्गलमय शुभकामना। अटल माया, अविच्छिन्न समर्पण र अनन्त प्रेरणाका प्रतीक सम्पूर्ण आमाहरूलाई हाम्रो श्रद्धा र नमन ।’
नेपाली समाजमा विद्यमान वर्ग सङ्घर्ष र पैसाले सिर्जना गर्ने पारिवारिक, सामाजिक तथा नैतिक दबाबको यथार्थ चित्रण गर्ने ‘महाभोज’लाई दिनेश राउतले निर्देशन गरेका हुन् । निर्देशकका अनुसार, चलचित्र पात्रहरूको आफ्नै अस्तित्व र आत्मसम्मानको लडाइँमा केन्द्रित छ ।
क्लक वर्क क्रियशन र पिक्चर फ्रेमको संयुक्त ब्यानरमा निर्माण भएको चलचित्रका निर्माता हिमाल कडरिया हुन् भने कथा तथा पटकथा सुवेदीले तयार पारेका हुन् । चलचित्रमा आर्यन सिग्देल, दयाहाङ राई, खगेन्द्र लामिछाने, अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, र वीरेन्द्र सिंह कुशवाहलगायत कलाकारहरूको अभिनय देख्न पाइनेछ ।
‘महाभोज’ नेपालसँगै नेपालीहरूको बसोबास रहेका अधिकांश देशमा एकैसाथ प्रदर्शन गरिने निर्माण पक्षले जानकारी दिएको छ ।