काठमाडौं । नेपालको अग्रणी अनलाइन बजार प्लेटफर्म दराज नेपालले आफ्ना ग्राहकहरूलाई लक्षित गर्दै ‘च्वाइस’ नामक नयाँ सेवा सार्वजनिक गर्ने घोषणा गरेको छ । यस सुविधामार्फत उपभोक्ताहरूले उत्कृष्ट मूल्यमा उत्पादक स्रोतबाट सिधै छानिएका एक हजारभन्दा बढी टप–रेटेड उत्पादनहरू खरिद गर्न सक्नेछन्।
दराजका अनुसार ‘च्वाइस’ ले प्रयोगकर्तालाई एकै कार्ट तथा एकै वेयरहाउस प्रणालीमार्फत किनमेल गर्ने सुविधा प्रदान गर्नेछ, जसले गर्दा सामानहरू १ देखि ३ दिनभित्रमा द्रुत डेलिभरी हुनेछन्। तीन वा सोभन्दा बढी उत्पादन खरिद गर्दा फ्रि डेलिभरी तथा चार वा सोभन्दा बढी सामानमा स्टक उपलब्धताअनुसार फ्रि गिफ्टको पनि व्यवस्था गरिएको छ। साथै, १४ दिनसम्मको बिना झन्झट फिर्ता नीतिको सुविधा पनि उपलब्ध हुने दराजले जनाएको छ।
‘च्वाइस’ सेवा दराजको आगामी ‘पे डे सेल’ (अप्रिल २५–२९) सँगै सुरु गरिनेछ। यसमार्फत ग्राहकहरूले ग्रोसरी, हाउसहोल्ड, पर्सनल केयर, मदर एण्ड बेबी, हेल्थ एण्ड ब्यूटी लगायतका कोटामा युनिलिवर, डाबर, गोद्रेज, ब्रिटान्निया लगायतका ट्रस्टेड ब्रान्डका वस्तुहरू खरिद गर्न सक्नेछन्।
दराज नेपालका प्रबन्ध निर्देशक आँचल कुँवरले ग्राहकको बदलिँदो अपेक्षालाई ध्यानमा राख्दै नयाँ अप्शन सुरु गरिएको जानकारी दिँदै यसले दराजको ब्रान्ड विश्वसनीयता अझ बलियो बनाउने जनाए। दराज ग्लोबल ‘च्वाइस’ प्रमुख जिआंग हान एडेलाले च्वाइसले ग्राहक अनुभवलाई समृद्ध बनाउने विश्वास व्यक्त गरे।

काठमाडौँ । नेपाली कांग्रेसका प्रवक्ता डा प्रकाशशरण महतले नेपाल राष्ट्र बैंकको गभर्नर नियुक्तिमा ढिलाइ गर्न नहुने जनाएका छन् ।
बिपी चिन्तन प्रतिष्ठान र संसदीय अध्ययनन तथा विकास संस्थापनले आज आयोजना गरेको ‘आगामी बजेटका प्राथमिकताहरु’ विषयक विशेष अन्तरसंवाद कार्यक्रममा पूर्वअर्थमन्त्रीसमेत रहेका डा. महतले राजनीतिक पूर्वाग्रह नराखी योग्य र व्यावसायिक व्यक्तिलाई गभर्नर नियुक्त गरिनुपर्ने धारणा राखे ।
“गभर्नर नियुक्तिमा ढिलाइ हुनु दुर्भाग्यपूर्ण कुरा हो”, प्रवक्ता डा. महतले भने, “जसले निरपेक्ष भावले अर्थतन्त्रलाई केन्द्रमा राखेर काम गर्छ त्यस्तो व्यक्तिलाई गभर्नर नियुक्त गर्नुपर्छ ।”

काठमाडौं । सानिमा जिआईसी इन्स्योरेन्स लिमिटेडले बीमा दाबी भुक्तानी लिन बाँकी बिमितहरूलाई उक्त भुक्तानी लिन आग्रह गरेको छ ।
कम्पनीले लामो समयसम्म फस्र्योट हुन बाँकी दाबीका सम्बन्धित दाबीकर्तालाई कम्पनीको प्रधान कार्यालय टंगाल, काठडमौंमा सम्पर्क गरी दाबी भुक्तानी लिन आग्रह गरेको हो ।
यसका लागि ३५ दिनको समय दिइएको छ । सो समयभित्र आवश्यक कागजातसहित सम्पर्कमा नआएमा बिमितको दाबी फाइल बन्द गरिने पनि कम्पनीले चेतावनी दिएको छ ।

काठमाडौं । नेको इन्स्योरेन्सले ७.३६८४ प्रतिशत लाभांश घोषणा गरेको छ ।
सञ्चालक समितिको आज बिहान बसेको बैठकले आव २०८०–८१ को नाफाबाट ७ प्रतिशत बोनस शेयर र कर प्रयोजनका लागि ०.३६८४ प्रतिशत नगद लाभांश प्रस्ताव गर्ने निर्णय गरेको कम्पनी सचिव विष्णु धितालले जनाएका छन् ।
उक्त प्रस्ताव बीमा प्राधिकरणबाट स्वीकृति र आगामी साधारण सभाबाट पारित भएपछि शेयरधनीहरुले पाउने छन् ।