काठमाडौं । गृहमन्त्री रमेश लेखकले विपद् सङ्कटग्रस्त क्षेत्र घोषित तराई–मधेशका स्थानीय तहका प्रमुख, अध्यक्ष र प्रमुख जिल्ला अधिकारीहरूसँग छलफल गरेका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणद्वारा आज ‘भर्चुअल’ रूपमा आयोजित समन्वयात्मक बैठकमा उनले नागरिकको पीडामा सरकार गम्भीर भन्दै गृह मन्त्रालयको प्रस्तावमा मधेश प्रदेशलाई विपद् सङ्कटग्रस्त क्षेत्र घोषणा गरिएको जानकारी दिए ।
मन्त्री लेखकले खानेपानी र सिँचाइको समस्याग्रस्त स्थानका साथै प्राथमिकताका आधारमा डिप ट्युववेल र डिप बोरिङ जडान गर्ने स्थानको पहिचान गर्ने कार्यका लागि समन्वय र सहजीकरणका लागि प्रमुख जिल्ला अधिकारीलाई निर्देशन दिए । उनले पानीको स्रोत नभएका वा स्रोत सुकेका स्थानमा ट्याङ्करबाट पानी वितरणलाई निरन्तरता दिनुपर्ने भन्दै यसका लागि सुरक्षा निकायसहित निजी क्षेत्रका ट्याङ्करको समेत उपयोग गर्न निर्देशन दिए ।
गृहमन्त्री लेखकले भने, “सरकारी कार्यालय, विद्यालय, अस्पताल, गैरसरकारी संस्थाका कार्यालयमा पानीको स्रोत रहेको छभने पानी खानका लागि तिनको पनि उपयोग गरियोस् । सङ्कटको अवस्थाको फाइदा उठाएर कसैले ‘कार्टेलिङ’ र कालोबजारी गर्नसक्ने भएकाले सख्त अनुगमन गर्न पनि आवश्यक छ । यसमा ध्यान दिनुहोला ।”
बैठकका अध्यक्ष एवं प्राधिकरणका कार्यकारी प्रमुख दिनेशप्रसाद भट्टले प्राधिकरणले राष्ट्रसङ्घीय निकाय, राष्ट्रिय तथा अन्तरराष्ट्रिय गैरसरकारी संस्था र रेडक्रसलाई आफ्ना कार्यक्रम हालेको आवश्यकताअनुसार परिमार्जन गरी मधेशमा केन्द्रित गर्न अनुरोध गरिसकेको जानकारी दिए ।
बैठकमा मधेश प्रदेशलगायत सुक्खाग्रस्त जिल्लाका स्थानीय तहका प्रमुख एवं अध्यक्ष र प्रमुख जिल्ला अधिकारीहरूले आफ्ना स्थानीय तह एवं जिल्लाको अवस्थासहित समस्या समाधान गर्न भइरहेका पहलबारे जानकारी गराए ।
नेपाल सरकार मन्त्रिपरिषद्ले यही साउन ८ गते मधेशलाई तीन महिनाका लागि विपद् सङ्कटग्रस्त क्षेत्र घोषणा गरेको छ । यसअघि, पानीको स्रोत तथा मुहान सुकी खानेपानी तथा सिँचाइ कार्यमा समस्या उत्पन्न भएपश्चात् असार २६ गते मधेश प्रदेश सरकारले प्रदेशलाई सुक्खाग्रस्त क्षेत्र घोषणा गरेको थियो ।

बुटवल । उपप्रधानमन्त्री तथा अर्थमन्त्री विष्णुप्रसाद पौडेलले सामाजिक विकास र भौतिक विकासका कार्यहरु गर्दा दलीय र राजनैतिक चिन्तनभन्दा माथि उठेर काम गर्न अनुरोध गरेका छन् ।
बुटवल–१२ तामनगरमा करिब पाँच करोडको लागतमा निर्माण भएको राजपुर खानेपानी आयोजनाको स्वामित्व उपभोक्ता समितिलाई हस्तान्तरण गर्दै अर्थमन्त्री पौडेलले कुरा गरेर मात्रै विकास नहुने बताएका हुन् । अर्थमन्त्री पौडेलले भने, “सबै मिलेर काम गर्ने हो भने देश बन्छ, गफ गरेर मात्र बन्दैन ।”
फोस्रा गफ र हल्ला गरेर मात्रै विकास हुन्छ भन्ने कुरामा आफूले कहिल्यै विश्वास नगरेको उल्लेख गर्दै मन्त्री पौडेलले जनताका असीमित चाहना र भावना पूरा गर्न वर्तमान सरकार भरमग्दुर प्रयासरत रहेको जनाए । पछिल्लो समय विकास निर्माणका कामले गति लिएको चर्चा गर्दै उनले भौतिक विकास सँगसँगै सामाजिक विकासका कामहरु अघि बढाउन उत्तिकै आवश्यक रहेको कुरामा जोड दिए ।
उनले भने, “भौतिक पूर्वाधार विकास र सामाजिक विकासलाई सँगै लिएर अघि बढेमा मात्र समृद्धिको यात्रा तय हुन्छ ।” सरकारका विषयमा उठेका विभिन्न टिका टिप्पणीप्रति लक्षित गर्दै अर्थमन्त्री पौडेलले वर्तमान सरकार कसैले हल्लाएर हल्लिने र ढालेर ढल्ने प्रकृतिको नभएको जिकिर गर्दै सरकार आगामी आम निर्वाचनसम्म यही साझेदारीमा चल्ने बताए । उनले आगामी आम निर्वाचनसम्म समग्र मुलुकमा विकासको नमुना प्रस्तुत गर्दै समृद्धिको यात्रा तय गर्ने अठोटका साथ सरकार अघि बढेको जानकारी गराए । उनले भने, “सरकार ढल्ने कुरा निराधार हल्ला मात्रै हो । झिंगाको श्रापले डिंगा मर्दैन ।”
यस अवसरमा लुम्बिनी प्रदेश सभा सदस्य भोजप्रसाद श्रेष्ठ, बुटवल उपमहानगरपालिकाका प्रमुख खेलराज पाण्डे, खानेपानी तथा सरसफाई डिभिजन कार्यालयका प्रमुख राजकुमार चौधरी, प्राविधिक इश्वरी आचार्य, उपभोक्ता समितिका अध्यक्ष जितबहादुर राहाडी लगायतले जनतालाई स्वच्छ खानेपानी उपलब्ध गराउने सरकारको दायित्व रहेको उल्लेख गर्दै यसको उचित व्यवस्थापनका लागि स्थानीय समुदायको भूमिका महत्वपूर्ण हुने जनाएका थिए ।
खानेपानी तथा सरसफाई डिभिजन कार्यालय रुपन्देहीले करिब पाँच करोड रुपैयाँ लागतमा निर्माण सम्पन्न आयोजना सरकारको सशर्त अनुदानअन्तर्गत लुम्बिनी प्रदेश सरकारद्वारा निर्माण गरिएको जनाएको छ ।
प्राविधिक इश्वरी आचार्यले आर्थिक वर्ष २०७३, ७४ मा सुरु भएको आयोजना गत आर्थिक २०८१, ८२ मा सम्पन्न भएको जानकारी गराए । कुल एक लाख लिटर क्षमताको १०० घनमिटर ठूलो ट्याङ्कीसहित वितरण प्रणाली लगायत निर्माण सम्पन्न भई करिब ६०० घरमा पानी उपलब्ध गराइएको आचार्यको भनाई छ ।

काठमाण्डौं । नेकपा (एमाले) को केन्द्रीय कमिटिले गरेको निर्णयबारे पूर्वराष्ट्रपति विद्यादेवी भण्डारीले शुक्रबार दिउँसो पत्रकार सम्मेलन गर्दैछिन् ।
उनले शुक्रबार दिउँसो ३ बजे कार्की बैंन्क्वेटमा पत्रकार सम्मेलन राखेकी छन् ।
पार्टी केन्द्रीय कमिटी बैठकले पूर्वराष्ट्रपति भण्डारीलाई पार्टी राजनीतिमा आउन नदिने निर्णय गरेपछि आफ्नो धारणा सार्वजनिक गर्न उनले पत्रकार सम्मेलन आयोजना गरेकी स्रोतले जनाएको छ ।
गत मंगलबार एमालेको केन्द्रीय कमिटी बैठकले भण्डारीलाई पार्टीको सक्रिय राजनीतिमा फर्किन रोक लगाउने निर्णय गरेको थियो।

काठमाडौँ । राष्ट्रपति रामचन्द्र पौडेलसँग सभामुख देवराज घिमिरेले भेट गरेका छन् । राष्ट्रपति निवास शीतल निवासमा उनीहरुबिच भेटवार्ता भएको हो ।
भेटमा सभामुख घिमिरेले सभामुखहरूको जेनेभामा जुलाई २९ देखि ३१ सम्म हुने विश्व सम्मेलन नेपालको सहभागिता बारेमा राष्ट्रपति पौडेललाई जानकारी गराएको राष्ट्रपतिको सचिवालयले जनाएको छ ।
सभामुख घिमिरे सभामुखहरूको विश्व सम्मेलनमा सहभागी हुनका लागि २७ जुलाईमा जेनेभा जाने कार्यक्रम रहेको छ ।

काठमाण्डौं । प्रतिनिधिसभाको बैठक आज पनि बस्दै छ । दिउँसो १ बजे सङ्घीय संसद् भवन नयाँ बानेश्वरमा बस्ने बैठकमा दुई विधेयक प्रस्तुत गर्ने कार्यसूची छ ।
बैठकमा महिला, बालबालिका तथा ज्येष्ठ नागरिकमन्त्री नवलकिशोर साह सुडीले ‘मानव बेचविखन तथा ओसारपसार (नियन्त्रण) (पहिलो संशोधन) विधेयक, २०८१ माथि विचार गरियोस्’ भन्ने प्रस्ताव प्रस्तुत गर्ने छन् ।
यस्तै, शिक्षा, विज्ञान तथा प्रविधिमन्त्री रघुजी पन्तले ‘राष्ट्रिय सभामा उत्पत्ति भएको तिलगङ्गा नेत्र विश्वविद्यालय विधेयक, २०८१ माथि विचार गरियोस्’ भने प्रस्ताव प्रस्तुत गर्ने कार्यसूची रहेको छ ।
आजै तीन वटा संसदीय समितिका बैठकसमेत बस्दैछन् । प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समिति एवं राष्ट्रियसभाको सार्वजनिक नीति तथा प्रत्यायोजित विधायन समिति र विधायन व्यवस्थापनको बैठक बस्दैछ ।
अन्तर्राष्ट्रिय सम्बन्ध समितिमा नेपाल हवाई सेवा प्राधिकरण विधेयक, २०८१ माथि संशोधनकर्ता सांसदसँग छलफल हुनेछ । यस्तै, विधायन व्यवस्थापन समितिमा ‘जलस्रोत विधेयक, २०८१ माथि दफावार’ छलफल गर्ने कार्यसूची छ ।
प्रत्यायोजित विधायन समितिमा राष्ट्रिय निकुञ्जसँग सम्बन्धित प्रतिवेदनमाथि छलफल र पारित गर्ने कार्यसूची रहेको छ ।