काठमाडौं । नागरिक लगानी कोष सञ्चालक समितिको अध्यक्षमा तुलसीप्रसाद घिमिरे नियुक्त भएका छन् ।
उनलाई आइतबार उपप्रधानमन्त्री तथा अर्थमन्त्रीस्तरको निर्णय अनुसार अध्यक्षमा नियुक्त गरिएको हो ।
त्रिभुवन विश्वविद्यालयबाट अर्थसास्त्रमा एमफिल, अर्थसास्त्रमै एम.ए र एम.पी.ए गरेका घिमिरे नेपाल राष्ट्र बैंकको कार्यकारी निर्देशकबाट अवकाश भएका हुन् ।
उनले केन्द्रीय बैंकमा सेवा गर्दा सूचना प्रविधि, मानव संसाधन, विदेशी विनिमय, बैंकिङ एवं अनुसन्धानलगायत अन्य विभागमा कार्य गरेका थिए ।

काठमाडौं । नेशनल लाइफ इन्स्योरेन्स कम्पनी लिमिटेडले आर्थिक वर्ष २०८१, ८२ को चौथो त्रैमाससम्ममा ४१ करोड २८ लाख रुपैयाँ खुद नाफा कमाएको छ । अघिल्लो आर्थिक वर्षको सोही अवधिमा कम्पनीले ९४ करोड २८ लाख रुपैयाँ खुद नाफा कमाएको थियो ।
नाफा घटेको देखिए पनि कम्पनीको बीमा व्यवसायमा भने उल्लेख्य मात्रामा वृद्धि देखिएको छ । अघिल्लो आवको अन्त्यसम्म २० अर्ब ६ करोड रुपैयाँ खुद बीमाशुल्क संकलन गरेको कम्पनीले गत आवको अन्त्यसम्म ७ प्रतिशतले वृद्धि गर्दै २१ अर्ब ४७ करोड रुपैयाँ खुद बीमाशुल्क संकलन गरेको छ ।
त्यस्तै, कम्पनीको जीवन बीमाकोष अघिल्लो वर्ष ७९ अर्ब १ करोड रुपैयाँ रहेकोमा चालु आवको अन्त्यसम्ममा १३।८० प्रतिशतले बढेर ८९ अर्ब ९१ करोड रुपैयाँ पुगेको छ ।
बीमितप्रति उत्तरदायी रहने प्रतिबद्धता स्वरूप कम्पनीले दाबी भुक्तानीमा समेत उल्लेख्य वृद्धि गरेको छ । अघिल्लो वर्ष ८ अर्ब ३२ करोड रुपैयाँ दाबी भुक्तानी गरेको कम्पनीले गत आवमा ३२.९४ प्रतिशतले बढाएर ११ अर्ब ७ करोड रुपैयाँ दाबी भुक्तानी गरेको छ । साथै, कम्पनीको कुल आम्दानी पनि वृद्धि भएको देखिन्छ । अघिल्लो वर्ष २७ अर्ब १ करोड रुपैयाँ आम्दानी गरेको कम्पनीले गत आवमा ६ प्रतिशतले वृद्धि गर्दै २८ अर्ब ६४ करोड रुपैयाँ आम्दानी गरेको छ । तर आम्दानीसँगै खर्च पनि ९.१० प्रतिशतले बढेर २७ अर्ब ४२ करोड रुपैयाँ पुगेको छ, जुन अघिल्लो वर्ष २५ अर्ब १४ करोड रुपैयाँ थियो ।
कम्पनीले अभिकर्तालाई प्रोत्साहनस्वरूप दिने कमिशनमा पनि वृद्धि गरेको छ । अघिल्लो वर्ष १ करोड ६८ लाख रुपैयाँ कमिशन दिएकोमा यसपालि २९.४० प्रतिशतले बढाएर २ करोड १८ लाख रुपैयाँ कमिशन वितरण गरिएको छ ।
वित्तीय विवरण अनुसार, कम्पनीको प्रतिशेयर आम्दानी अघिल्लो वर्षको १८.८१ रुपैयाँबाट घटेर ७.९२ रुपैयाँमा झरेको छ भने प्रतिशेयर नेटवर्थ १२९.७२ रुपैयाँ कायम रहेको छ । कम्पनीको चुक्ता पूँजी ५ अर्ब १ करोड रुपैयाँबाट ९.२० प्रतिशतले बढेर ५ अर्ब ४७ करोड रुपैयाँ पुगेको छ । महाविपत्ति कोषमा कम्पनीसँग ६६ करोड ७२ लाख रुपैयाँ, शेयर प्रिमियम २७ करोड ८४ लाख रुपैयाँ र जगेडा कोषमा ५१ करोड रुपैयाँ रहेको उल्लेख छ ।

काठमाडौं । काठमाडौंको न्युरोडस्थित जोय स्टोरमा सामान किन्दा प्रभु बैंकका ग्राहक र कर्मचारीले छुट पाउने भएका छन्।
बैंकका अनुसार कर्मचारी र ग्राहकले जोय स्टोरमा आईफोन र म्याकबुक किन्दा ५ प्रतिशत र आईफोन र म्याकबुकको अन्य सामग्रीहरू किन्दा २० प्रतिशत छुट पाउनेछन्। साथै क्रेडिटकार्ड होल्डरहरूले इन्स्ट्रापे स्कीमबाट किस्ताबन्धी सुविधा पनि पाउनेछन्।
यस छुट सम्झौतामा बैंकका तर्फबाट चिफ मार्केटिंग अफिसर रमेश कुमार श्रेष्ठ र जोय स्टोरका तर्फबाट कार्यकारी निर्देशक गुरु दत्त शर्माले संयुक्त हस्ताक्षर गरेका छन्।
‘बैंक अफ द इयर २०२३’ को उमाधिबाट सम्मानित प्रभु बैंकले देशभर ३१२ शाखा कार्यालय, २८६ एटीएम ६८ एक्सटेन्सन काउन्टर मार्पmत करीब ३१ लाखभन्दा बढी ग्राहकहरूलाई बैंकिंग सेवा दिंदै आइरहेको छ।

काठमाडौं । ग्लोबल आइएमई बैंक लिमिडेट ‘युरो मनी अवार्ड फर एक्सलेन्स २०२५’को बेस्ट बैंक अवार्डबाट सम्मानित भएको छ । सन् १९९२ मा युरो मनी म्यागजिनद्वारा स्थापित यो अवार्ड बैंकिङ क्षेत्रको एक प्रतिष्ठित अवार्ड हो ।
ग्लोबल आइएमई बैंकले ग्राहकहरूलाई प्रदान गर्दै आएको सेवा, वित्तीय अवस्था, संस्थागत सामाजिक उत्तरदायित्व, बैंकिङ क्षेत्रमा भित्र्याएको नयाँनयाँ प्रविधि, वातावरणीय, सामाजिक तथा सुशासनका क्षेत्रहरुमा बैंकले गरेको लगानी तथा बैंकको उच्चस्तरीय कार्यसम्पादनका लागि यो अवार्ड प्रदान गरिएको हो । युरो मनी म्यागजिन बैंकिङ क्षेत्रको गहिरो विश्लेषण र समालोचनाका लागि प्रख्यात छ । युरो मनी समूहमा बैंक तथा वित्तीय क्षेत्रका ख्यातिप्राप्त तथा अनुभवी व्यक्तिहरू छन् ।
यो वर्षको अवार्डसँगै ग्लोबल आइएमई बैंक तेस्रोपटक बेष्ट बैंक अवार्डबाट सम्मानित भएको हो । यसअघि पनि ग्लोबल आइएमई बैंकले युरो मनी अवार्ड फर एक्सलेन्स २०२२ र २०२४ मा बेस्ट बैंक अवार्ड प्राप्त गरेको थियो ।
यसअघि ग्लोबल आइएमई बैंक ग्लोबल फाइनान्सको बेष्ट बैंक अवार्ड २०२४ र २०२५ तथा युरो मनी अवार्ड फर एक्सलेन्स २०२४ अन्तर्गत दुई विधामा नेपालको सर्वश्रेष्ठ बैंक, युरो मनी अवार्ड फर एक्सलेन्स २०२२ र २०२४ मा बेष्ट बैंकको रुपमा सम्मानित भएको थियो ।
ग्लोबल आइएमई बैंक मुलुकको सतहत्तरै जिल्लामा शाखा सञ्जाल रहेको निजी क्षेत्रको पहिलो वाणिज्य बैंक हो । बैंकको ३५२ शाखा कार्यालय, ३८४ एटिएम, १५५ शाखा रहित बैंकिङ सेवा, ६८ एक्सटेन्सन तथा राजश्व संकलन काउन्टर तथा ३ वटा बैदेशिक प्रतिनिधि कार्यालय समेत गरी १,००० भन्दा बढी सेवा केन्द्रबाट आफ्ना ग्राहकलाई उत्कृष्ट सेवा प्रदान गर्दै आइरहेको छ ।
बैंकले नेपाली नागरिकहरूलाई बैंकिङ सेवाहरू प्रदान गर्नुका अतिरिक्त विश्वका विभिन्न देशहरूबाट रेमिट्यान्स सेवा पनि दिँदै आएको छ । बैंकले संयुक्त राज्य अमेरिका, संयुक्त अधिराज्य, क्यानडा, अष्ट्रेलिया, मलेशिया, दक्षिण कोरिया, जापान, साउदी अरब, कतार, यूएई, बहराइन, कुवेत, भारत, जोर्डन लगायत अन्य देशहरूबाट रेमिट्यान्स भित्र्याउने काम गर्दै आएको छ ।