काठमाण्डौं । स्व. निर्देशक शिव रेग्मीकी भान्जी एकता पौडेलको डेब्यु निर्देशकीय फिल्म ‘हर्ष’ भोलि शुक्रबारबाट प्रदर्शनमा आउने तयारीमा छ । वंश (उत्तराधिकारी) को विषयलाई मुख्य कथावस्तु बनाइएको यो फिल्मको बुधबार साँझ ललितपुरको लबिम हलमा प्रिमियर आयोजना गरिएको थियो, जहाँ उपस्थित सबैले कथावस्तुदेखि कलाकारहरूको अभिनयसम्मको प्रशंसा गरे ।
लामो समयपछि प्रिमियरमा उपस्थित भएकी अभिनेत्री निरुता सिंहले एकताले पहिलो फिल्मबाट नै निर्देशनमा राम्रो सम्भावना देखाएको जनाईन । फिल्मको सुरुमा नै शिव रेग्मीको तस्वीर देख्दा आफू भावुक भएको जनाउँदै उनले भनिन्, ‘फिल्म सन्देशमुलक बनेको छ । यसमा उठाइएको विषय एकदमै सान्दर्भिक छ । त्यसैले एकपटक यो फिल्म सबैले गर्नुपर्छ ।’
निर्देशक रेग्मी पत्नी ज्ञानु रेग्मीले पनि ‘हर्ष’ राम्रो बनेको भन्दै भान्जी एकतालाई सफलताको शुभकामना दिइन् । उनले भनिन्, ‘१२ वर्षपछि खोला पनि फर्किन्छ भनेजस्तै हाम्रो परिवारमा पनि आज त्यस्तै भएको छ । १२ वर्षपछि भान्जीले फिल्म निर्देशन गर्ने आँट गरेकी छन् । एकदमै खुशी लागेको छ । मलाई फिल्म धेरै नै मनपर्‍यो ।’
अभिनेता समेत रहेका व्यावसायी संजोग कोइरालाले ‘हर्ष’ एउटा फरक अनुभव दिने पारिवारिक फिल्म बनेको प्रतिक्रिया दिए । उनले भने, ‘फिल्ममा सम्बन्धको कथा एकदमै गहिरोसँग भनिएको छ । शिव रेग्मीको ‘इसेन्स’ उहाँ (निर्देशक) ले पनि छाड्नु भएको छैन । भावनात्मक रुपमा एकदमै ‘कनेक्ट’ हुने फिल्म बनेको छ ।’ उनले परिवारसहित फिल्म हेर्न दर्शकलाई आग्रह गरे ।
अभिनेता जयकिशन बस्नेतले कलाकारहरूको अभिनयको प्रशंसा गर्दै फिल्मको कथावस्तु मनछुने रहेको धारणा व्यक्त गरे । पारिवारिक फिल्म मन पराउने दर्शकले ‘हर्ष’ छुटाउनै नहुने उनले बताए । निर्माता द्वय सुनिल कुमार थापा, रोहित अधिकारी, नृत्य निर्देशक सुनिल क्षेत्री, वितरक करण श्रेष्ठ लगायतले पनि फिल्म एकदमै राम्रो बनेको प्रतिक्रिया दिए ।
प्रिमियरमा मिलेको प्रतिक्रियाले प्रफुलित देखिएकी निर्देशक पौडेलले बच्चादेखि फिल्म निर्देशन गर्ने सपना साकार हुँदा खुसी लागेको जनाईन । ‘प्रिमियरमा फिल्म हेर्नु भएका सबैले मामाको झल्को दिन सफल भएकी छौ भन्नुभएको छ । त्यसले पनि आगामी दिनमा अझै राम्रा फिल्म निर्माण गर्नुपर्ने चुनौती थपिएको महसुस गरेकी छु,’ उनले भनिन् ।
यस फिल्ममा खगेन्द्र लामिछाने, वर्षा राउत, नीर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, लुनिभा तुलाधर, अंशु महर्जन, सुवर्ण थापा, सिर्जना नापित, रेनु प्रधान, बाल कलाकार साइमन वादी लगायतको अभिनय रहेको छ । फिल्ममा सबै कलाकारमाथि साइमन हावी देखिएका छन् । उनको अभिनयले फिल्ममा भावनात्मक प्रभाव थपेको छ ।

काठमाण्डौं । अभिनेत्री साम्राज्ञी आरएल शाहले विशाल खरेलसँग इन्गेजमेन्ट गरेपछि यतिबेला उनको व्यापक आलोचना भइरहेको छ । विशाल पहिल्यै विवाहित र एक बच्चाको बाबु समेत रहेको थाहा हुँदाहुँदै सम्बन्ध अघि बढाएको, अरुको परिवार तोड्ने काम गरेको जस्ता आरोप उनीमाथि लागेका छन् । यसबारे उनले बुधबार इन्स्टाग्राममा एक पोस्टमार्फत स्पष्टीकरण दिइसकेकी छन् ।
उनले विशालसँग विवाह गर्ने निर्णयको बचाउ गर्दै इन्गेजमेन्ट गरेकोमा पछुतो नभएको जनाएकी छिन् । कसैको परिवार तोड्ने काम आफूबाट नहुने जनाउँदै उनले विशाल पहिले नै धेरै अगाडि बढिसकेकाले आफूहरूले इन्गेजमेन्ट गरेको स्पष्ट पारेकी छन् । उनले कानुनी रूपमा आफूहरू मंगेतरको रूपमा दर्ता भइसकेकाले प्रेमको रक्षा गर्ने वाचा गरेकी छन् ।
साम्राज्ञीले बिहीबार पनि एक पोस्ट लेख्दै विशालको पहिला विवाह नै नभएको दाबी गरेकी छन् । उनले लेखेकी छन्, ‘उसले मलाई स्पष्ट रुपमा भनिसकेको थियो कि उसको पूर्वप्रेमिकाबाट एक छोरा छ । उनीहरू कहिल्यै विवाहित थिएनन्, अनि कसरी सम्बन्ध विच्छेद भयो ? मान्छेहरू सधैं भावनात्मक रूपमा हेरफेर गरिएका कुरा र प्रमाण बिनाका गलत कुराहरूमा बढी विश्वास गर्छन् ।’
उनले विशालकी पूर्वपत्नी सरिता सुब्बा (मुनु) प्रति लक्षित गर्दै आफूलाई धेरैपटक ब्ल्याकमेल गरेको समेत आरोप लगाएकी छन् । उनी अगाडि लेख्छिन्, ‘झूटमाथि झूट । म उनीसँग कहिल्यै संलग्न हुने थिइनँ । यद्यपि, उनले मलाई धेरैपटक ब्ल्याकमेल गरिन् । उनी अझै पनि उसलाई बढी पैसाको लागि ब्ल्याकमेल गर्छिन्, यो दुर्व्यवहार हो ।’
विशालकी पूर्वपत्नी सुब्बाले पनि बुधबार एक भिडियो सन्देशमार्फत आफूहरू विवाहित रहेको र बच्चा पनि छ भन्ने थाहा हुँदाहुँदै साम्राज्ञीले आफ्नो पूर्वश्रीमानसँग सम्बन्ध राखेको दाबी गरेकी थिइन् । थाइल्यान्डमा गीतको छायांकनको क्रममा साम्राज्ञीसँग ‘बेड सेयर’ गरेको पुष्टि श्रीमानले नै गरेपछि आफूले अलगिने निर्णय गरेको उनले भिडियोमा भनेकी छन् ।

काठमाण्डौं । सर्वकालीन ब्लकबस्टर फिल्म ‘पूर्णबहादुरको सारङ्गी’का निर्देशक सरोज पौडेलले नयाँ फिल्मको घोषणा गरेका छन् । उनको निर्देशनमा बन्न लागेको फिल्मको नाम ‘सिन्दुरे जात्रा’ राखिएको छ । बिहीबार युट्युबमार्फत टाइटल टिजर सार्वजनिक गर्दै उक्त फिल्मको निर्माण घोषणा गरिएको हो । शीर्षकले पौराणिक कथावस्तुमा फिल्म आधारित रहने संकेत गर्छ ।
सिन्दुरे जात्रा नुवाकोटमा मनाइने चर्चित जात्रा हो । यसलाई देवी जात्रा पनि भन्ने गरिन्छ । हरेक चैत्रशुक्ल पूर्णिमाका दिन यो जात्रा मनाइन्छ । सोही जात्राको नाममा निर्माण हुन लागेको फिल्मले कस्तो कथा पस्किनेछ भन्नेबारे प्रष्ट पारिएको छैन । यद्यपि, फिल्मले जात्राको सांस्कृतिक र धार्मिक महत्वलाई कथामा समेट्ने अनुमान गर्न सकिन्छ ।
सारंगी फिल्म्सको प्रस्तुतिमा बन्ने फिल्मको निर्मातामा प्रभाकार श्रेष्ठ छन् । निर्देशक पौडेल स्वयंको कथा लेखन रहेको फिल्ममा कलाकारहरू तय भएका छैनन् । आरआर फिल्म्सले वितरण गर्ने फिल्मको डिजिटल पार्टनरमा ओएसआर डिजिटल रहेको छ । फिल्मको छायांकन मिति र प्रदर्शन मितिबारे केही दिनमा जानकारी गराइने निर्माता श्रेष्ठले जनाए ।
गत भदौमा निर्देशक पौडेलको नयाँ फिल्म ‘कोशेढुङ्गा’ प्रदर्शनमा आएको थियो । तर, दोस्रो सातामै जेनजी पुस्ताको आन्दोलनका कारण फिल्मको प्रदर्शन नै प्रभावित भयो । यद्यपि, यो फिल्मले दर्शकबाट सकारात्मक प्रतिक्रिया पाएको थियो । पाँचौं फिल्मको रुपमा ‘सिन्दुरे जात्रा’ बनाउन लागेका पौडेललाई ‘पूर्णबहादुरको सारङ्गी’ले कायम गरेको उच्च मानकको ठूलो दबाब छ ।