काठमाडौं । नेपाली बजारमा सुनको मूल्य बढेको छ ।
नेपाल सुनचाँदी व्यवसायी महासंघका अनुसार आइतबार छापावाल सुनको मूल्य तोलामा २८ सयले बढेको हो ।
यससँगै उपभोक्ताले एक तोला सुन किन्न दुई लाख ७० हजार ६०० रुपैयाँ खर्चिनुपर्नेछ ।
यसअघि शुक्रबार (पुस २५) छापावाल सुन तोलामा दुई लाख ६७ हजार ८०० कायम थियो ।
यस्तै, चाँदीको मूल्य भने तोलामा २१० रुपैयाँले बढेको छ । यससँगै एक तोला चाँदीको मूल्य चार हजार ९९० रुपैयाँ पुगेको छ ।
यसअघि शुक्रबार चाँदीको मूल्य तोलाको चार हजार ७८० रुपैयाँ कायम थियो ।

काठमाडौं । महालक्ष्मी विकास बैंक लिमिटेडको पुस २१ गते सोमबार काठमाडौंको भद्राकालीस्थित त्रिभुवन आर्मी अफिसर्स क्लबमा बसेको चौबीसौं वार्षिक साधारण सभाले पारित गरेको नगद लाभांश सम्बन्धित शेयरधनीको बैंक खातामा जम्मा भएको छ।
सभाले बैंकको गत आर्थिक वर्ष २०८१, ८२ को वितरणयोग्य मुनाफा रकमबाट हाल कायम चुक्ता पूँजीको ५.३७ प्रतिशतका दरले नगद लाभांश (कर सहित) शेयरधनीलाई वितरण गर्ने प्रस्ताव पारित गरेको थियो। लाभांश पारित भएसँगै पुस २१ गतेदेखि नै सम्बन्धित शेयरधनीको बैंक खातामा नगद लाभांश बापत रकम पठाउन थालिएको शेयर रजिष्ट्रार सिद्धार्थ क्यापिटल लिमिटेडले जानकारी दिएको छ।
साधारण सभाले नगद लाभांशका साथै ५ प्रतिशत बोनस शेयर वितरण गर्ने प्रस्ताव पनि पारित गरेको थियो। बोनस शेयर भने नेपाल स्टक एक्सेचन्ज (नेप्से) र सीडीएस एण्ड क्लियरिङ्ग लिमिटेडमा सूचीकृत भएपछि मात्रै सम्बन्धित शेयरधनीको डिम्याट खातामा जम्मा हुनेछ। लाभांश वितरण प्रयोजनका लागि बैंकले पुस ७ गते एक दिनका लागि शेयरधनी दर्ता किताब बन्द (बूक क्लोज) गरेको थियो। तसर्थ नेप्सेमा पुस ६ गतेसम्म कायम शेयरधनीले मात्रै लाभांश प्राप्त गर्नेछन्।
डिम्याट खातामा बैंक खाता नम्बर अद्यावधिक नगराएका तथा हालसम्म पनि आफ्नो शेयर अभौतिकीकरण नगराएका शेयरधनीले यथाशीघ्र शेयर अभौतिकीकरण गरी सोसँगै हितग्राही खातामा आफ्नो बैंक खाता नम्बर पनि अद्यावधिक गर्न आग्रह गरेको छ। साथै शेयर धितो राखेर ऋण लिएका शेयरधनीले ऋण लिएको बैंक, वित्तीय संस्थाबाट स्वीकृति पत्र पेश गरेपछि मात्रै नगद लाभांश पठाइने बैंकले जनाएको छ।

काठमाडौं । पछिल्लो समय विवाह, व्रतबन्ध, विवाह, पास्नी, जन्मदिन, वार्षिकोत्सव जस्ता चाडपर्वहरूमा फजूल खर्च र महंगो क्षणिक रमाईलोको उपहार दिनुको सट्टा बीमा पोलिसी उपहार दिने प्रचलन दिन प्रतिदिन बढ्दै गइरहेको छ।
यसैको पछिल्लो उदाहरण स्वरूप कञ्चनपुर जिल्लाको पुनर्बास नगरपालिका–०५ की सीता कुमारी जोशीले आफ्नो श्रीमानको जन्मदिनमा महंगो उपहार दिनुको सट्टा बीमा पोलिसी उपहार दिएकी छन्।
उनले रिलायबल नेपाल लाइफ इन्स्योरेन्स कम्पनीको शाखा कार्यालय आईबीआरडीबाट ५ लाख रुपैयाँ बीमांकको सुरक्षित प्लस जीवन बीमा पोलिसी आफ्नो श्रीमानलाई जन्मदिनको उपहार स्वरूप दिएकी हुन्।
श्रीमानको जन्मदिनलाई थप विशेष र स्मरणीय बनाउने उद्देश्यले श्रीमानको भविष्यको जोखिम समेत रक्षावरण गर्ने हेतुले बीमा पोलिसी उपहार दिएको जनाएकी छन्। उक्त बीमालेख शाखा प्रमुख शंकर जैशी र एजेन्सी म्यानेजर राम बहादुर रोकयाले संयुक्त रूपमा हस्तान्तरण गरेका थिए।

काठमाडौं । नेपाल टेलिकमले प्रिपेड मोबाइल सेवाका प्रयोगकर्तालाई लक्षित गर्दै सिम कार्डको स्वामित्व आफ्नै नाममा दर्ता गर्न मिल्ने अनलाइन केवाईसी अद्यावधिक सुविधा सञ्चालनमा ल्याएको छ । लामो समयदेखि अरूको नाममा दर्ता भएका सिम प्रयोग गर्दै आएका वा आफ्नो व्यक्तिगत विवरण अद्यावधिक नगरेका ग्राहकहरूलाई सहजता प्रदान गर्ने उद्देश्यले यो सेवा सुरु गरिएको टेलिकमले जनाएको छ ।
यस सेवासँगै अब सिम कार्डको स्वामित्व परिवर्तन गर्न वा विवरण सच्याउन टेलिकमको कार्यालय पुग्नुपर्ने झन्झट हटेको छ । कम्पनीले तयार पारेको अनलाइन फारममार्फत ग्राहकहरूले घरमै बसेर आवश्यक प्रक्रिया पूरा गर्न सक्नेछन् ।
अनलाइन केवाईसी अद्यावधिक वा सिमको स्वामित्व दाबी गर्न प्रयोगकर्ताले केही कागजात तथा विवरण उपलब्ध गराउनुपर्ने हुन्छ । त्यसअन्तर्गत नेपाली नागरिकताको प्रमाणपत्रको प्रतिलिपि, आफूले प्रयोग गरिरहेको सिमबाट हालसालै सम्पर्कमा आएका पाँचवटा मोबाइल नम्बरको विवरण र हालै खिचिएको एक प्रति डिजिटल फोटो आवश्यक पर्ने टेलिकमले जानकारी दिएको छ ।

काठमाडौं । शुक्रबार सुनको मूल्य बढ्दा चाँदीको मूल्य भने घटेको छ । आज सुनको मूल्य तोलाको २१ सय बढेको हो भने चाँदीको मूल्य प्रतितोला ५५ रुपियाँ घटेको छ ।
नेपाल सुनचाँदी व्यवसायी महासंघका अनुसार आज सुन प्रतितोला २ लाख ६७ हजार ८ सय रुपियाँमा कारोबार भइरहेको छ ।
यसअघि पुस १३ गते सुन हालसम्मकै उच्च २ लाख ७० हजार ६ सय रुपियाँमा कारोबार भएको थियो ।
त्यस्तै आज चाँदी प्रतितोला ४ हजार ७ सय ८० रुपियाँमा कारोबार भइरहेको छ । यसअघि पुस २३ गते चाँही हालसम्मकै उच्च ४ हजार ९ सय ३५ रुपियाँमा कारोबार भएको महासंघले जनाएको छ ।