काठमाडौं । राष्ट्र बैंकले ७ अर्ब रुपियाँ बैंक तथा वित्तीय संस्थाहरुमा लगानी गर्ने भएको छ ।
राष्ट्र बैंकको उपदान तथा पेन्सन कोषमा रहेको उक्त रकम ३६६ दिनको मुद्दती निक्षेपका रुपमा लगानी गर्न लागिएको हो ।
उक्त रकम लिन इच्छुक बैंक तथा वित्तीय संस्थाहरुलाई लिन चाहेको रकम र ब्याजदर प्रस्ताव गर्दै यही जेठ ६ गतेसम्म आवेदन दिनु पर्ने राष्ट्र बैंकले उल्लेख गरेको छ ।
राष्ट्र बैंकका अनुसार वाणिज्य बैंकहरुमा ५ अर्ब ६० करोड, विकास बैंकहरुमा १ अर्ब ५ करोड र राष्ट्रिय स्तरका वित्त कम्पनीमा ३५ करोड रुपियाँ लगानी गर्न लागिएको हो ।

काठमाडौं । सिटिजन लाइफ इन्स्योरेन्स कम्पनी लिमिटेड प्रतिष्ठित अन्तर्राष्ट्रिय पुरस्कार ‘इमर्जिङ एसिया इन्स्योरेन्स अवार्ड्स २०२५’ अन्तर्गत नेपालकै उत्कृष्ट विधा ‘बेस्ट लाइफ इन्स्योरेन्स कम्पनी अफ द इयर ( नेपाल’ बाट सम्मानित भएको छ )।
इन्डियन च्याम्बर अफ कमर्सद्वारा थाइल्यान्डको बैंककमा आयोजित भव्य समारोहका बीच यो पुरस्कार घोषणा गरिएको थियो । आयोजकका तर्फबाट प्राप्त आधिकारिक ट्रफी र प्रमाणपत्र कम्पनीको केन्द्रीय कार्यालयमा हर्षोल्लासका साथ ग्रहण गरिएको छ ।
यो गरिमामय पुरस्कारले सिटिजन लाइफ इन्स्योरेन्सको सुदृढ वित्तीय अवस्था, उत्कृष्ट ग्राहक सेवा, परिष्कृत डिजिटल प्रविधि र आम नागरिकमाझ जीवन बीमाको पहुँच पुर्‍याउन खेलेको नेतृत्वदायी भूमिकालाई अन्तर्राष्ट्रिय स्तरमा पुनः प्रमाणित गरेको छ।
यस ऐतिहासिक सफलताको अवसरमा कम्पनीका प्रमुख कार्यकारी अधिकृत पोषकराज पौडेलले भने, “आज यो ट्रफी र प्रमाणपत्र कम्पनीमा प्राप्त हुँदा हामी अत्यन्तै गौरवान्वित भएका छौँ। यो अन्तर्राष्ट्रिय सम्मान हाम्रा आदरणीय ग्राहकहरूले हामीप्रति देखाउनुभएको अटुट विश्वास, हाम्रा प्रगतिका संवाहक अभिकर्ता साथीहरू र कर्मचारी वर्गको कडा परिश्रमको प्रतिफल हो। हामी यो पुरस्कार हाम्रा सम्पूर्ण सिटिजन परिवार र शुभचिन्तकहरूमा समर्पित गर्दछौँ।”
विगतका दिनहरूमा झैँ आगामी दिनमा पनि आफ्ना सेवाहरूलाई अझ बढी सुरक्षित, भरपर्दो, आधुनिक र प्रविधिमैत्री बनाउँदै हरेक नेपालीको सुख(दुःखको सारथी बन्न सिटिजन लाइफ इन्स्योरेन्स प्रतिबद्ध रहेको छ ।

काठमाडौं । एनएमबि बैंकले आफ्ना भिसा डेबिट तथा क्रेडिट कार्डवाहक ग्राहकहरूका लागि भारतस्थित मेदान्ता अस्पतालमा विशेष स्वास्थ्य सेवा छुटको व्यवस्था गरेको छ । यस सहकार्यसँगै ग्राहकहरूले अब मेदान्ता अस्पतालमा विभिन्न स्वास्थ्य सेवामा आकर्षक छुट प्राप्त गर्न सक्नेछन् ।
ग्राहकहरूले ओपिडी परामर्श, ल्याब तथा रेडियोलोजी सेवाहरू र प्रिभेन्टिभ हेल्थ प्याकेजमा १५ प्रतिशतसम्म छुट प्राप्त गर्ने सक्नेछन् । साथै, आइपिडी सेवाअन्तर्गत रुम रेन्ट तथा विभिन्न जाँच सेवाहरूमा १० प्रतिशत छुट पनि उपलब्ध हुनेछ ।
ग्राहकहरूको स्वास्थ्य र सुविधालाई प्राथमिकतामा राख्दै एनएमबि बैंकले बैंकिङ सेवाभन्दा बाहिर पनि ग्राहकहरूलाई थपसुविधा प्रदान गर्ने उद्देश्यले यस्तो सहकार्य अघि बढाएको हो ।
बैंकले हाल देशभरी १९८ शाखाहरु, १७६ एटिएमहरु र ९ एक्सटेन्सन काउन्टरहरु मार्फत उच्चस्तरीय सेवा प्रदान गदै आइरहेको छ ।

काठमाडौं । सानिमा रिलायन्स लाइफ इन्स्योरेन्ससँग आबद्ध अभिकर्ताहरूको संगठन नेपाल राष्ट्रिय बीमा अभिकर्ता संघको केन्द्रीय भेला आइतबार काठमाडौंमा सम्पन्न भएको छ। भेलाले नमिता न्यौपानेलाई अध्यक्षमा चयन गर्दै नयाँ केन्द्रीय समिति गठन गरेको हो।
भेलाबाट श्याम गुरुङ वरिष्ठ उपाध्यक्षमा चयन भएका छन्। त्यसैगरी उपाध्यक्षहरूमा प्रदेशगत प्रतिनिधित्वका आधारमा सिता श्रेष्ठ (कोशी प्रदेश), कल्पना विष्ट (बाग्मती प्रदेश), रामजी पोखरेल (गण्डकी प्रदेश), खड्क क्षेत्री (लुम्बिनी प्रदेश), धिरेन्द्र साही (कर्णाली प्रदेश) तथा विरेन्द्र सिंह बोहरा (सुदूरपश्चिम प्रदेश) चयन भएका छन्।
संघको सचिवमा चन्द्रप्रसाद आचार्य तथा सहसचिवमा सुवास रिजाल चयन भएका छन् भने कोषाध्यक्षको जिम्मेवारी दिलमाया मोक्तानले पाएका छन्।
त्यसैगरी सदस्यहरूमा सिता भट्टराई, गोकर्ण पाण्डे, उर्मिला कँडेल, रमेश राई, लक्ष्मण गौतम, शंकर थपलिया, जयराम रिमाल, रश्मी गिरी तथा युवराज गुप्ता चयन भएका छन्। संघले बाँकी केन्द्रीय समिति भने पछि मनोनयनमार्फत पूर्ण गर्ने जनाएको छ।
भेलामा देशभरबाट सहभागी अभिकर्ताहरूले बीमा क्षेत्रको व्यावसायिक विकास, अभिकर्ताहरूको हकहित संरक्षण तथा बीमा सचेतना विस्तारका विषयमा छलफल गरेका थिए। समितिले अभिकर्ताहरूको पेशागत अधिकार, क्षमता अभिवृद्धि तथा संस्थागत सुदृढीकरणलाई प्राथमिकतामा राखेर काम गर्ने प्रतिबद्धता व्यक्त गरेको छ।