काठमाडौं । उद्योग, वाणिज्य तथा आपूर्ति मन्त्री गौरीकुमारी यादवले नेपाल आयल निगममा अतिरिक्त काम (ओभरटाइम) का नाममा दिइँदै आएको भत्ता कटौती गर्ने तयारी अघि बढाएकी छन्।
निगममा ओभरटाइम भत्ताका नाममा भइरहेको करोडौँ रुपैयाँको खर्च तथा त्यससँग जोडिएका अनियमितता नियन्त्रण गर्ने उद्देश्यले मन्त्री यादवले यस्तो पहल थालेकी हुन्। यसका लागि नेपाल आयल निगमको कर्मचारी प्रशासन नियमावली, २०६३ अन्तर्गत ‘सेवा सुविधा’ शीर्षकमा रहेको अतिरिक्त कार्यभत्तासम्बन्धी व्यवस्थालाई पुनर्संरचना गर्ने गृहकार्य अघि बढाइएको मन्त्रालय स्रोतले जनाएको छ।
हाल निगममा ओभरटाइम भत्ताका रूपमा मात्रै वार्षिक करिब १३ करोड रुपैयाँ खर्च हुने गरेको तथ्यांक छ। मन्त्री यादवले यस्तो खर्चले संस्थामाथि अनावश्यक आर्थिक भार परेको र वित्तीय अनुशासन कमजोर बनाएको निष्कर्ष निकाल्दै त्यसलाई नियन्त्रण गर्ने निर्णय लिएकी हुन्।
तयारी भइरहेको नयाँ व्यवस्थाअनुसार कर्मचारीलाई अतिरिक्त कार्यभत्ता उपलब्ध गराउनुको सट्टा कार्य प्रकृति र सेवाको आवश्यकताका आधारमा सिफ्ट प्रणाली लागू गरिनेछ। यसबाट नियमित समयमै सेवा सञ्चालन हुने, अतिरिक्त भत्तामा हुने खर्च घट्ने तथा जनशक्ति व्यवस्थापन थप प्रभावकारी बन्ने अपेक्षा गरिएको छ।
मन्त्रालयका अनुसार सिफ्ट प्रणाली लागू भएपछि निगमको प्रशासनिक खर्चमा उल्लेखनीय बचत हुने विश्वास गरिएको छ। साथै संस्थाभित्र पारदर्शिता, वित्तीय अनुशासन र खर्च नियन्त्रणलाई थप मजबुत बनाउने उद्देश्यका साथ आवश्यक कानुनी तथा प्रशासनिक प्रक्रिया अघि बढाइएको छ।

काठमाडौं । सानिमा बैंकले देशका सातै प्रदेशमा गर्भवती तथा सुत्केरी महिलाहरुका लागि स्वास्थ्य शिविर र पौष्टिक खाना वितरण गर्ने कार्य सम्पन्न गरेको छ ।
गर्भावस्था तथा सुत्केरी अवस्थामा देखिन सक्ने पोषणको अभाव, रक्तअल्पता र अन्य स्वास्थ्य जटिलताहरुबाट आमा तथा नवजात शिशुहरुलाई जोगाउन र यसको न्यूनीकरण गर्ने दीर्घकालीन लक्ष्यका साथ बैंकले यो कार्यक्रम आयोजना गरेको हो ।
यस अभियान अन्तर्गत बैंकले सातै प्रदेशका विभिन्न नगरपालिका, गाँउपालिका तथा वडा कार्यलयसंग समन्वय गरी करीब १०५० गर्भवती तथा सुत्केरी महिलाहरुलाई प्रत्यक्ष सेवा प्रदान गरेको छ ।
शिविरमा सहभागी गर्भवती तथा सुत्केरी महीलाहरुको स्वास्थकर्मीहरुद्धारा आवश्यक स्वास्थ्य जाँच गरिनुका साथै उनिहरुलाई ३ महिनाका लागि पुग्ने स्वास्थ्यप्रवद्र्धक पौष्टिक खाध सामाग्रीहरु वितरण गरिएको थियो ।
बैंकले भविष्यमा पनि समाजका लक्षित वर्गमा सकारात्मक प्रभाव पर्ने किसिमका क्रार्यक्रमहरुलाई निरन्तरता दिने जनाएको छ ।
सानिमा बंैकको सातै प्रदेशमा हाल १३४ वटा कार्यालयहरु र १२७ वटा ए.टि.एम. संचालनमा रहेका छन् ।

काठमाडौं । युनाइटेड अजोड इन्स्योरेन्स लिमिटेडले अवितरित संस्थापक समूहतर्फको ६३ हजार ८४७ कित्ता हकप्रद शेयर सबैले किन्न पाउने गरी लिलामीमा राखेको छ।
कम्पनीले १००ः१० को अनुपातमा हकप्रद शेयर निष्काशन गरी बाँडफाँड गर्दा बाँकी बसेको उक्त शेयर जेठ २९ गतेदेखि असार ८ गतेसम्म लिलामीमा राख्दा साविकका संस्थापक शेयरधनीबाट बोलपत्र नपरेपछि सबैले किन्न पाउने गरी पुनः लिलामीमा राखेको हो।
यसमा असार २५ गते बिहीबारदेखि साउन १ गते शुक्रबारसम्म बोलपत्र पेश गर्नु पर्नेछ। शेयरको न्यूनतम मूल्य प्रतिकित्ता १०० रुपैयाँ तोकिएको छ भने बोलपत्र पेश गर्दा न्यूनतम १ हजार कित्ता र सोभन्दा बढीमा १० ले भाग जाने संख्यामा वा सम्पूर्ण कित्ता माग गर्न सक्नेछन्।
बोलपत्र फाराम कमलपोखरीस्थित एलएस क्यापिटल (बिक्री प्रबन्धक) का साथै लक्ष्मी सनराइज बैंकका विराटनगर–हनुमानदास सडक, वीरगञ्ज–आदर्शनगर, जनकपुर–भानुचोक, हेटौंडा–पारिजात पथ, नारायणघाट–बालकुमारी चोक, पोखरा–न्यूरोड, बुटवल–मिलनचोक, नेपालगञ्ज–न्यूरोड, वीरेन्द्रनगर–वीरेन्द्रचोक र धनगढी–शहीदगेट स्थित शाखा कार्यालयमा प्राप्त गर्न र बुझाउन सकिनेछ।