काठमाण्डौं । पूर्वउपरराष्ट्रपति नन्दबहादुर पुनलाई नेकपा माओवादी केन्द्रले आर्थिक उत्पादन संयन्त्रको इन्चार्जको जिम्मेवारी दिएको छ ।
गत माघ २१ गते बसेको पार्टीका पदाधिकारीको बैठकले पार्टी पदाधिकारीदेखि केन्द्रीय सदस्यसम्मको नयाँ कार्यविभाजन गर्दै अन्तरपार्टी निर्देशन (अपानि) जारी गरिएको छ ।
आईतबार महासचिव देव गुरुङले जारी गरेको अपानिअनुसार अध्यक्ष पुष्पकमल दाहाल ‘प्रचण्ड’लाई पार्टीको वैचारिक राजनीतिक क्षेत्रको संयोजक र स्कूल विभाग प्रमुखको जिम्मेवारी तोकिएको छ ।
वरिष्ठ उपाध्यक्ष नारायणकाजी श्रेष्ठ अन्तर्राष्ट्रिय विभाग प्रमुख र उपाध्यक्ष पम्फा भुसाल र सचिव सुरेन्द्र कार्कीलाई उपप्रमुखको जिम्मेवारी दिइएको छ ।
उपमहासचिव जनार्दन शर्मालाई संगठन विभाग प्रमुख, उपमहासचिव वर्षमान पुनलाई अर्थ तथा योजना विभाग प्रमुखको जिम्मेवारी तोकिएको छ ।
उपमहासचिव शक्तिबहादुर बस्नेतलाई प्राकृतिक स्रोत, व्यवस्थापन क्षेत्र संयोजक, सचिव लीलामणि पोखरेललाई ऊर्जा, जलस्रोत सिँचाइ विभाग प्रमुख र केन्द्रीय सदस्य युवराज दुलाललाई उपप्रमुखको जिम्मेवारी दिइएको छ ।
