काठमाडौं । नेकपा (एमाले) का महासचिव शंकर पोखरेलले मिसन ०८४ को नेतृत्व प्रधानमन्त्री एवम् पार्टी अध्यक्ष केपी शर्मा ओलीले नै गर्नुपर्ने जनाएका छन् ।
पार्टीको प्रचार तथा प्रकाशन विभागले आयोजना गरेको पत्रकार सम्मेलनमा बोल्दै उनले केन्द्रीय कमिटीको बैठकले ०८४ को जिम्मा अध्यक्ष ओलीलाई नै दिएको जनाएका हुन् ।
‘योग्यता पुगेका महाधिवेशन प्रतिनिधि अध्यक्षको उम्मेदवार हुन पाउँछन् । हामीले कसैलाई छेकेका छैनौ’, महासचिव पोखरेलले भने, ‘तर केन्द्रीय कमिटीको एक मतले मिसन ०८४ को नेतृत्व केपी ओलीले नै गर्नु पर्दछ भनेको छ ।’
पूर्वराष्ट्रपति विद्यादेवी भण्डारी सक्रिय राजनीतिमा आउँदा लोकतन्त्र कमजोर हुने भएकाले लोकतन्त्रलाई बलियो बनाउन भण्डारीलाई रोकिएको स्पष्ट पारे ।
‘विद्या भण्डारी एमालेको राजनीतिमा आउँदा पार्टीलाई फाइदा नै हुन्छ । उहाँको व्यक्तित्वले एमाले बलियो नै हुन्थ्यो’, पोखरेलले भने, ‘तर यस्तो प्रवृतिले लोकतान्त्रिक मूल्य मान्यतालाई खण्डित गर्दछ ।’
