काठमाडौं । नेपाली राष्ट्रिय क्रिकेट टोलीका लेगस्पीनर सन्दीप लामिछानेले बङ्गलादेश प्रिमियर लिग (बीपीएल) खेल्ने भएका छन्।
राजशाही वारियर्सले आइतबार सन्दीपलाई टोलीमा अनुबन्ध गरिएको जनाएको हो। यस टोलीमा एनपीएल खेलेका न्युजिल्यान्डका अलराउन्डर जिमी नीशम पनि छन्।उक्त टीमले लामिछानेलाई स्वागत गर्दै हिमालयन म्याजिक भनेको छ।
बीपीएलमा पहिले अनुभव भएका लेग स्पिनर लामिछानेले यसअघि प्रतियोगितामा सिल्हेट सिक्सर्सको प्रतिनिधित्व गरेका थिए।
उक्त सिजनमा उनले ६ खेलमा ४ विकेट लिएका थिए। आगामी संस्करणको बीपीएल आउँदो डिसेम्बर २६ बाट सुरु हुनेछ।
अन्तर्राष्ट्रिय क्रिकेटमा प्रदर्शन प्रभावशाली रहँदै आएका सन्दीपले नेपालका लागि ६८ टी–२० अन्तर्राष्ट्रिय खेल खेल्दै १२९ विकेट लिएका छन्। समग्रमा उनले आफ्नो करियरमा १६० टी–२० खेलमा २३७ विकेट लिएका छन्।
