काठमाडौं । काठमाडौंको भृकुटीमण्डपमा जारी नेकपा (एमाले) को ११ औं महाधिवेशनअन्तर्गत नयाँ नेतृत्व चयनका लागि आज मतदान हुँदैछ ।
निर्वाचन तालिका अनुसार आज दिउँसो १२ बजेदेखि साँझ ६ बजेसम्म मतदान हुनेछ ।
मतदानका लागि ८० वटा विद्युतीय भोटिङ मेसिन प्रयोग हुने एमाले केन्द्रीय निर्वाचन आयोगले जनाएको छ । मतदान सकिएपछि आजै मतगणना हुने जनाईएको छ ।
अध्यक्षका लागि वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलले उम्मेदवारी दिएका छन् ।
ओली पक्षबाट उपाध्यक्षमा विष्णुप्रसाद पौडेल, रामबहादुर थापा, गुरु बराल र पृथ्बीसुब्बा गुरुङले उम्मेदवारी दिएका छन् ।
ओली पक्षबाट महासचिवको उम्मेदवार बन्ने तयारी गरेका प्रदीप ज्ञवालीले उपाध्यक्षमा उम्मेदवारी दिन अस्वीकार गरेका छन् । महासचिव नपाएपछि ज्ञवालीले केन्द्रीय सदस्यमा मात्रै उम्मेदवारी दिएर पदाधिकारीमा नबस्ने निर्णय लिएका हुन् ।
त्यस्तै, ओली पक्षबाट महासचिवमा शंकर पोखरेल उम्मेदवार बनेका छन् भने उपमहासचिवमा विष्णु रिमाल, रघुवीर महासेठ र लेखराज भट्टले उम्मेदवारी दिएका छन् ।
त्यसैगरी, सचिवमा पद्मा अर्याल, शेरधन राई, यामलाल कँडेल, राजन भट्टराई, महेश बस्नेत, छबिलाल विश्वकर्मा, खगराज अधिकारी, हिक्मत कार्की र भानुभक्त ढकालले उम्मेदवारी दिएका छन् ।
प्रचार विभाग प्रमुखसमेत रहेका राजेन्द्र गौतमले उपमहासचिवमा स्वतन्त्र उम्मेदवारी दिएका छन् भने अग्नि खरेल र लालबाबु पण्डितले सचिवमा स्वतन्त्र उम्मेदवारी दिएका छन् ।
त्यस्तै, वरिष्ठ उपाध्यक्ष ईश्वर पोखरेल समूहबाट उपाध्यक्षमा गोकर्ण विष्ट, अरुण नेपाल, बिन्दा पाण्डे, परशुराम मेघी गुरुङ र रघुजी पन्तले उम्मेदवारी दिएका छन् ।
त्यस्तै, महासचिवमा सुरेन्द्र पाण्डे, उपमहासचिवमा योगेश भट्टराई, बैजनाथ चौधरी र आनन्द पोखरेलले उम्मेदवारी दिएका छन् ।
त्यस्तै, सचिवमा गोकुल बास्कोटा, कर्ण थापा, ठाकुर गैरे, रचना खड्का, विनोद ढकाल, पुरुषोत्तम पौडेल र कृष्णगोपाल श्रेष्ठले उम्मेदवारी दिएका छन् ।
