हेटौंडा । मकवानपुरको भीमफेदी गाउँपालिका–६ जुरीखेतमा सुमो दुर्घटना हुँदा ज्यान गुमाएका ६ जनामध्ये ४ जनाको पहिचान खुलेको छ । आइतबार काठमाडौंबाट हेटौंडातर्फ आउँदै गरेको ना १ ज १७७८ नम्बरको सुमो सडकबाट अन्दाजी एक सय मिटर तल खोल्सामा खसेर दुर्घटना हुँदा दुई जना भारतीयसहित ६ जनाको मृत्यु भएको थियो ।
जिल्ला प्रहरी कार्यालय मकवानपुरका अनुसार दुर्घटनामा मृत्यु हुनेहरुमा भारतको बिहार राज्य पटना बस्ने ४२ वर्षीय रजनिस कुमार, बिहारकै बेगुसराई बस्ने ५० वर्षीय अरबिन्द कुमार रहेका छन् ।
यसैगरी, दुर्घटनामा मकवानपुरको हेटौंडा उपमहानगर–४ कमलडाँडा बस्ने ४० वर्षीया सविता लम्साल, हेटौंडा–२ कान्तिराजपथ बस्ने २९ वर्षीय निखिल अग्रवालको मृत्यु भएको प्रहरीले जनाएको छ ।
दुर्घटनामा गम्भीर घाइते भएका चालक हेटौंडा–४ कर्राचोक बस्ने अन्दाजी ४५ वर्षीय गणेश थापालाई थप उपचारका लागि पुरानो मेडिकल कलेज भरतपुर रिफर गरिएको प्रहरीले जनाएको छ ।
