काठमाडौं । टिपरले ठक्कर दिएर स्कुटर चालकको मृत्यु भएपछि काभ्रेको बनेपा तनाबग्रस्त बन्नुका साथै अरनिको राजमार्ग अवरुद्ध भएको छ ।
आक्रोसित स्थानीयले टिपरमा आगो लगाएका छन् । स्थिति नियन्त्रणका लागि ठूलो संख्यामा सुरक्षाकर्मी परिचालन गरिएको छ । सुरक्षाकर्मीको पहलमा अहिले राजमार्ग सञ्चालनमा ल्याइएको छ ।
बनेपाको दूरसञ्चार कार्यालय नजिकै भएको दुर्घटनापछि स्कुटर चालक धुलिखेल नगरपालिका ५ का ३१ वर्षीय ओमन प्रधानको मृत्यु भएको थियो । उनको मृत्यु भएपछि स्थानीयले राजमार्ग अवरुद्ध गरेका थिए ।
बा. प्र. ०१००४ क ३४२३ नम्बरको टिपरले बा. प्र. ०२ ०६३ प ९१८९ नम्बरको स्कुटरलाई बुधबार बिहान ठक्कर दिएको थियो । प्रदर्शनकारीले टिपर जलाउने क्रममा रोक्न खोज्दा प्रहरीले अश्रु ग्याँस पनि प्रहार गरेको थियो ।
