काठमाडौं । पाकिस्तानको राजधानी इस्लामाबादमा इरान र अमेरिकी प्रतिनिधिमण्डलबीच शनिबार हुने वार्तामा विश्वको नजर छ । वार्तामा सहभागी हुन अमेरिकी उपराष्ट्रपति जेडी भान्स पाकिस्तान पुगिसकेका छन् ।
यसैबीच, अमेरिकी राष्ट्रपति डोनाल्ड ट्रम्पले इरानलाई कडा चेतावनी दिएका छन् । द न्यूयोर्क पोस्टका अनुसार राष्ट्रपति ट्रम्पले पाकिस्तानमा शान्ति वार्ता असफल भएमा इरानमाथि फेरि आक्रमण गर्न अमेरिकी युद्धपोतहरूलाई ‘उच्चस्तरीय गोला बारुद’ले सुसज्जित गरिएको जनाए ।
ट्रम्पले अमेरिकी युद्धपोतहरूलाई उत्कृष्ट हतियारले सुसज्जित गरिएको र आवश्यक परेमा प्रयोग गरिने जनाए ।
यसैबीच, उपराष्ट्रपति भान्सले ट्रम्पले वार्ताका लागि स्पष्ट दिशानिर्देशहरू प्रदान गरेको बताए । उनले इरानलाई चेतावनी दिँदै अमेरिका इमानदारीपूर्वक वार्ता गर्न तयार रहेको जनाए ।
मंगलबार समाप्त भएको दुई हप्ताको युद्धविरामपछि अन्तिम शान्ति सम्झौताको वार्ता गर्न उपराष्ट्रपति भान्ससँग विशेष दूत स्टिभ विटकफ र ट्रम्पका ज्वाइँ जेरेड कुशनर इस्लामाबाद पुगेका हुन् ।
