काठमाडौं । देशका केही स्थानमा आज वर्षाको सम्भावना छ । हल्कादेखि मध्यम वर्षाको सम्भावना रहेको हो । काठमाडौंलगायत केही स्थानमा बिहानैबाट वर्षा सुरु भएको छ ।
जल तथा मौसम विज्ञान विभागका अनुसार दिउँसो कोसी, वाग्मती र गण्डकी प्रदेशलगायत देशका हिमाली र पहाडी भूभागमा साधारणतया बादल लाग्नेछ । बाँकी भूभागमा आंशिक बादल लाग्नेछ ।
कोसी, वाग्मती र गण्डकी प्रदेशका हिमाली र पहाडी भूभागका केही स्थानमा, बाँकी हिमाली र पहाडी भूभागका थोरै स्थानमा मेघगर्जन, चट्याङसहित मध्यमसम्म वर्षा, हिमपातको सम्भावना छ ।
मधेस, वाग्मती, गण्डकी र लुम्बिनी प्रदेशका तराई भूभागका एकदुई स्थानमा मेघगर्जन, चट्याङसहित मध्यमसम्म वर्षा, हिमपातको सम्भावना छ ।
विभागले राति कोसी, मधेस, वाग्मती र गण्डकी प्रदेशलगायत देशका हिमाली भूभागमा साधारणतया बादल लाग्ने जनाएको छ । बाँकी भूभागमा आंशिक बादल लाग्ने पूर्वानुमान छ ।
कोसी र मधेस प्रदेशका थोरै स्थानमा, वाग्मती र गण्डकी प्रदेशका हिमाली र पहाडी भूभाग तथा कर्णाली प्रदेशको हिमाली भूभागको एकदुई स्थानमा मेघगर्जन, चट्याङसहित मध्यमसम्मको वर्षा, हिमपातको सम्भावना छ ।
हाल नेपालमा पश्चिमी न्यूनचापीय प्रणाली, स्थानीय वायु र तल्लो वायुमण्डलमा रहेको न्यूनचापीय क्षेत्रको प्रभाव रहेको विभागले जनाएको छ ।
