काठमाडौँ । लगातार परेको अविरल वर्षाका कारण कीर्तिपुरस्थित बागमती नदीमा आएको बाढीले राधास्वामी सत्संग परिसरमा रहेको होल्डिङ सेन्टर जलमग्न बनेको छ।
शुक्रबार रातिदेखि बढेको नदीको बहाव सेन्टरभित्र प्रवेश गरेपछि त्यहाँ अस्थायी रूपमा बसोबास गर्दै आएका सुकुमबासी परिवारहरू गम्भीर समस्यामा परेका छन् ।
अचानक बाढीको पानी तीव्र रूपमा सेन्टरभित्र पस्दा उनीहरूले आफ्ना लत्ताकपडा, सरसामान र अन्य आवश्यक सामग्री सुरक्षित राख्ने अवसरसमेत पाएनन् । ज्यान जोगाउने प्रयासमा उनीहरू हतारिँदै कीर्तिपुरको मुख्य सडकसम्म पुग्न बाध्य भएका छन् ।
बाढीका कारण खाद्यान्न, ओछ्यान, लुगाफाटा तथा दैनिक उपभोगका सामग्री पानीमा डुबेर नष्ट भएका छन्। यससँगै प्रभावित परिवारहरू खुला आकाशमुनि बस्नुपर्ने अवस्था सिर्जना भएको छ।
