दैलेख । नेपाल कम्युनिष्ट पाटी (एमाले) का महासचिव शंकर पोखरेलले एमालेले जनतामा आशा जगाउने काम गरिरहेको दाबी गरेका छन ।
एमाले दैलेखको आठौँ जिल्ला अधिवेशनलाई शनिबार यहाँ सम्बोधन गर्दै उनले एमाले अध्यक्ष केपी शर्मा ओली नेतृत्वको सरकारका पालामा आर्थिक विकासले समेत फड्को मारेको उल्लेख गरे ।
उनले एमाले नीति र नेतृत्वमा प्रस्ट रहेको जनाउँदै स्थानीय तहमा रहेका अन्तरविरोधलाई मिलाएर लैजानुपर्नेमा जोड दिए । उनले एमालेले अघि सारेको मिसन–८४ को नारालाई सबैले एक भएर अघि बढाउँदै विभाजन भएको वामपन्थी मतलाई एक ठाउँमा ल्याउनु आवश्यक रहेको जानकारी दिए ।
नेताका टाउका जोडेर पार्टी एकता नहुने भन्दै उनले कार्यकर्ताका मन जोड्दै कम्युनिष्ट आन्दोलन बलियो बनाउनतर्फ एमाले अग्रसर भएको उल्लेख गरे । पोखरेलले दैलेख ऐतिहासिक विरासत बोकेको जिल्ला रहेकाले कम्युनिष्ट आन्दोलन अघि बढाउन यहाँको नाम सधैँ अगाडि आउनेसमेत जानकारी दिए ।
